އިއްޔެ ނެރުނު ގޯތި އަދި ފުލެޓް ލިސްޓާއިމެދު އަމަލު ކުރާނެ ގޮތުގެ މަޝްވަރާތައް ދަނީ ކުރިއަށް: ފިރުޒުލް

މި ސަރުކާރުން ހުޅުވާލި ގެދޮރުވެރިޔާ އާއި ބިންވެރިޔާ ސްކީމްގެ ދަށުން ގޯތި އަދި ފުލެޓަށް އެދި ދެވަނަ ފަހަރަށް ހުޅުވާލި ފުރުސަތުގައި 40 ހާހަށްވުރެ ގިނަމީހުން ފޯމު ހުށަހަޅާފައިވާއިރު، އެ ކަމުގައި ޢަމަލު ކުރާނެ ގޮތަކާއި މެދު މަޝްވަރާ ކުރައްވަމުންދާ ކަމަށް އިންތިގާލީ ރައީސުލްޖުމްހޫރިއްޔާ ގެ އޮފީހުން ބުނެފިއެވެ.

ގެދޮރުވެރިޔާ ބިންވެރިޔާ ސްކީމަށް ހުށަހެޅުމުގެ ފުރުސަތު އިއްޔެ ހަމަވެފައިވާއިރު ގެދޮރުވެރިޔާ ސްކީމްގެ ދަށުން ފްލެޓަށް ކުރިމަތިލާން 21،247 ފޯމު އަދި ބިންވެރިޔާ ސްކީމްގެ ދަށުން ގޯއްޗަށް ކުރިމަތިލާން 19،347 ފޯމު ވަނީ ހުށަހަޅައިފަ އެވެ.

މި ސަރުކާރުގެ ދައުރު އަންނަ މަހުގެ 17 އަށް ހަމަވާއިރު، ދެ ވަނަ ބުރުގައި ކުރިމަތިލި 40،000 މީހުންގެ މައުލޫމާތު ސާފުކޮށް، ލިޔުން ހަވާލު ކުރާނެ ކަމެއް ނުވަތަ ނޫން ކަމެއް އަދި ސަރުކާރުން ހާމަކޮށްފައި ނުވާއިރު، އެ ފޯމު ހުށަހެޅި މީހުންނާއި މެދު އަންނަން އޮތް ސަރުކާރުން ކަންކުރާނެ ގޮތަކާއިމެދު މިއަދު އިންތިގާލީ އޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ ސުވާލު ކޮށްފައެވެ.

އެ ސުވާލަށް ޖަވާބު ދެއްވަމުން އިންތިގާލީ ތަރުޖަމާނު މުހައްމަދު ފިރުޒުލް ވިދާޅުވީ، ރިޔާސީ އިންތިޚާބުގެ ކެންޕެއިންގެ ތެރެއިންވެސް އަދި އިންތިޚާބު ކާމިޔާބު ކުރެއްވުމަށްފަހުގައިވެސް، އިންތިޚާބީ ރައީސް ޑރ މުހައްމަދު މުއިއްޒު ވިދާޅުވަމުންދިޔަ ވާހަކަ އަކީ ސަރުކާރުން ލިޔުން ހަވާލުކޮށް ގޯތި ލިބޭނެ ކަމަށް ލިސްޓުގައި ހިމަނާފައިވާ އެއްވެސް ފަރާތެއްގެ އަތުން އެ ގޯތި ނުވަތަ ފުލެޓް އަތު ނުލައްވާނެ ކަމަށެވެ. އަދި އެ ވިދާޅުވި ބަސްފުޅާއި އެއްގޮތަށް ކަން ކުރައްވާނެ ކަމަށްވެސް އޭނާ ވިދާޅުވި އެވެ.

"އެވާހަކަތައް (ގޯތި އަދި ފުލެޓް އަތުނުލާނެ ވާހަކަ) ދައްކަވަމުން ދިޔައިރު ޝާއިޢު ކޮށްފައި އޮތީ ގޯތި އަދި ފުލެޓް ގެ ވަކި ލިސްޓެއް. ފަހުން އަނެއްކާ އިތުރު އިއުލާނެއް ކުރެވިގެން އިތުރު ފަރާތްތަކުން އެޕްލިކޭޝަން ހުށަހެޅި ވާހަކަ އިއްޔެ އަޅުގަނޑުމެންނަށް ޚަބަރު ލިބުނީ. އިންތިޚާބީ ރައީސްގެ ކޮމިޓްމަންޓް ގުޅިފައި މިއޮތީ ކުރިން ޝާޢިއު ކުރެވުނު ލިސްޓަށް. ފަހުން ކުރެވުނު އިއުލާނާ ގުޅިގެން ހުށަހެޅުނު އެޕްލިކޭޝަން ތަކާއި ގުޅޭ ގޮތުން އަޅުގަނޑުމެން އިތުރު މަޝްވަރާތައް ހިންގަމުން އެބަ ގެންދަން. އެކަން ކަމާއި ގުޅޭ ގޮތުން އިތުރު ތަފްސީލެއް ދެއްވަން މިވަގުތު ދަތި."

އިންތިގާލީ ތަރުޖަމާނު ފިރުޒުލް

ބިންވެރިޔާ ސްކީމްގެ ފުރަތަމަ ބުރުގައި ގޯތި ލިބޭ މީހުންނަށް ރަޖިސްޓްރީ ހަވާލުކުރުމުގެ މަސައްކަތް ސަރުކާރުން މިހާރު ވެސް އަންނަނީ ކުރަމުންނެވެ. މިހާތަނަށް ހިއްކާފައި ހުރި ބިންތަކުން ބައެއް މީހުން ގޯތި ކަނޑައި ދީފައި ވެސް ވެ އެވެ. އެ ސްކީމްގެ ދަށުން ހުޅުމާލެ 2، 3 އާއި ގުޅިފަޅު އަދި ގިރާވަރު ފަޅުން ގޯތި ދޭން ވަނީ ނިންމައިފަ އެވެ. މުޢިއްޒު ވަނީ އެ އެންމެނަށްވެސް އެމަނިކުފާނުގެ ވެރިކަމެއްގައި ގޯތި އަދި ފުލެޓު ދެއްވާނެ ކަމަށެވެ.