ބައެއް އިދާރާތަކާއި ކުންފުނިތަކުގެ ހާއްސަ އޮޑިޓެއް ހަދަނީ
ސަރުކާރުގެ ބައެއް އިދާރާތަކާއި ކުންފުނިތަކުގެ ހާއްސަ އޮޑިޓެއް ހަދަން ނިންމާފައިވާ ކަމަށް އިންތިގާލީ އޮފީހުގެ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.
އިންތިގާލީ ރައީސުލްޖުމްހޫރިއްޔާގެ އޮފީހުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ފިރުޒުލް ވިދާޅުވީ، އިންތިގާލީ ކޮމިޓީތަކުން ކުރާ މަސައްކަތްްތަކަކީ އެ ކޮމިޓީގެ ބޭފުޅުން ވަޑައިގަންނަނާ މުއައްސަސާއެއް ނުވަތަ ވުޒާރާއެއްގެ ނުވަތަ ކުންފުނި ތަކުގެ ހާލަތު ހުރިގޮތް ދެނެގަތުމުގެ މަސައްކަތް ކަމަށެވެ. އެގޮތުން ފައިސާއާ ގުޅޭ ހާލަތްތަކާއި މާލީ ހާލަތްތަކާއި އަދި އިދާރީ އަދި މުވައްޒަފުންނާ ގުޅޭ ހާލަތުތައް ދެނެގަތުން ފަދަ ކަންކަން އެ ކޮމިޓީން ކުރަމުންދާ ކަމަށް އޭނާ ވިދާޅުވިއެވެ.
މިއާއެކު ފިރުޒުލް ވިދާޅުވީ، އިންތިގާލީ ކޮމެޓީތަކުން މިހާތަނަށް ކުރި މަސައްކަތްތަކުން ބައެއް އިދާރާތަކާއި ކުންފުނިތަކުގެ ހާލަތު ވަރަށް ދެރަ ކަމަށް ފާހަގަ ކުރެވިފައިވާ ކަމަށެވެ. އަދި އެ ތަންތަނުގެ ހާލަތާއި ގުޅޭ ގޮތުން ކޮމެޓީތަކުން އެކުލަވާލާ ރިޕޯޓުގައިވާ ކަންކަން ތަފްސީލީ ގޮތެއްގައި ދެނެގަނެވޭނީ ހާއްސަ އޮޑިޓެއް ހަދައިގެންކަން ވެސް އޭނާ ފާހަގަ ކުރެއްވި އެވެ.
"އަޅުގަނޑުމެންނަށް ފާހަގަކުރެވިފައި އެބަހުރި އިދާރާތަކަކާއި ކުންފުނިތަކެއް ހާއްސަކޮށް އޮޑިޓެއް ހަދަން ޖެހޭ. އެހެންވީމާ އެ މަސައްކަތް އަޅުގަނޑުމެން އޮޑިޓާ ޖެނެރަލްއާ ގުޅިގެން އެ މަސައްކަތް ކުރިއަށް ގެންދިއުމަށް ދަންނަވާނަން. މި މަސައްކަތްތަކާ މި ނިންމުންތަކާ ގުޅޭ ތަފްސީލް އަޅުގަނޑު ފަހުން ހިއްސާކުރާނަން،"
މުހައްމަދު ފިރުޒުލް
ބައެއް ކުންފުނިތަކާއި އިދާރާތަކުގެ އޮޑިޓް ހެދުމަށް ދަންނަވަން ނިންމަވާފައިވާ ކަމަށް އިންތިގާލީ ރައީސުލްޖުމްހޫރިއްޔާގެ އޮފީހުން ހާމަކުރި ނަމަވެސް އެއީ ކޮން ތަންތަނެއްކަން އަދި ހާމަކޮށްފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
