އުނގޫފާރާއި ރަސްމާދޫ އެއްވަރުވެ، ދުވާފަރަށް ސެމީގެ ޖާގައެއް ކަށަވަރުވެއްޖެ

ރ.އަތޮޅު ކައުންސިލް ފުޓްސަލް ޗެލެންޖު 2023 ގައި ރޭ ކުޅެވުނު ދެވަނަ މެޗުގައި ގްރޫޕް ބީގެ ރަސްމާދޫ އާއި އުނގޫފާރު ވާދަކުރި މެޗު 3-3 ގެ ނަތީޖާއަކުން ދެޓީމް އެއްވަރުވެ, އުނގޫފާރަށް ސެމީގެ ފުރުސަތު ހަނިވެއްޖެ އެވެ.

މުބާރާތުގައި އުނގޫފާރުން ކުޅުނު ފުރަތަަމަ މެޗުގައި 8-1 ގެ ތަފާތުބޮޑު ނަތީޖާއަކުން ދުވާފަރު ސްޕޯޓްސް ކުލަބު އަތުން ބަލިވެފައިވާއިރު، މިއީ ރަސްމާދޫ އިން މުބާރާތުގައި ކުޅުނު ފުރަތަަމަ މެޗެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު މި މެޗުގައި ފުރަތަަމަ ލަނޑުޖަހައި ކުރިހޯދީ އުނގޫފާރުން ނެވެ. މިލަނޑު މެޗު ފެށިގެން ހަތަރުވަނަ މިނެޓުގައި އެޓީމަށް ކާމިޔާބުކޮށްދިނީ މުހައްމަދު ސައިފް އެވެ. މިއީ ރަސްމާދޫ ސްޕޯޓްސް ކުލަބުގެ ހާފު މެދެންހާ ހިސާބުން ލިބުނު ހިލޭ ޖެހުމަކުން ފޮނުވާލި ބާރު ހަމަލާއެއްގައި އޭނާ ކާމިޔާބުކޮށްދިން ލަނޑެކެވެ. އަދި ފުރަތަމަ ހާފުގެ 17 ވަނަ މިނެޓުގައި އުނގޫފާރުން ވަނީ އިތުރު ލަނޑެއް ކާމިޔާބުކޮށް އެޓީމުގެ ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ ޖައިޝަމް މުހައްމަދު އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން އުނގޫފާރު ކުރީގައި އޮވެގެންނެވެ.

މެޗުގެ ދެވަަނަ ހާފުވެސް ވަރުގަދަކޮށް ފެށީ އުނގޫފާރުން ނެވެ. އެގޮތުން ދެވަނަ ހާފު ފެށިގެން ތިންވަނަ މިނެޓުގައި އެޓީމުން ވަނީ އިތުރު ލަނޑެއް ކާމިޔާބުކޮށް ލީޑު ފުޅާކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އެޓީމުގެ ފުރަތަަމަ ލަނޑު ވެސް ކާމިޔާބުކޮށްދިން މުހައްމަދު ސައިފް އެވެ. މީގެ އިތުރުން ވެސް މިހާފުގައި އުނގޫފާރުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

ނަމަވެސް މެޗުގެ ފަހުވަގުތު ކޮޅުގެ ތެރޭގައި ރަސްމާދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ.

ނަތީޖާއެއްގެ ގޮތުން މެޗު ނިމެން ތިން މިނިޓަށްވެފައި ވަނިކޮށް ރަސްމާދޫ ޓީމުން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އަލީ ވިޝާމް އެވެ. އަދި އެޓީމުގެ ދެވަނަ ލަނޑު ފަހުހާފުގެ 40 ވަނަ މިނެޓުގައި ކާމިޔާބުކޮށްދިނީ މުހައްމަދު ފަޒީމް އެވެ. އަދި މެޗުގެ އިތުރު ވަގުތުގެ ތެރޭގައި ފަޒީމް ވަނީ އިތުރު ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-3 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ރަސްމާދޫގެ މުހައްމަދު ފަޒީމް އެވެ.

މިމެޗުން ލިބުނު އެއް ޕޮއިންޓާއެކު ކުޅުނު ދެ މެޗުން އުނގޫފާރަށް ލިބުނު އެއް ޕޮއިންޓާއެކު ލަނޑުގެ ތަފާތުން އެޓީމު މިވަގުތު އޮތީ ގްރޫޕް ބީގެ ފުލުގައެވެ. އަދި މިމެޗުގެ ނަތީޖާއާއެކު، ބާކީ އެއް މެޗު އޮއްވައި މިގުރޫޕްގައި ހިމެނޭ ދުވާފަރަށް މުބާރާތުގެ ސެމީ ފައިނަލުގެ ޖާގައެއް ވަނީ ކަށަވަރުވެފައެވެ. އަދި މާދަމާ ރޭ ކުޅެވޭ މިގުރޫޕްގެ ފަހު މެޗުގައި ރަސްމާދޫ އާއި ދުވާފަރު ވާދަކުރާ މެޗުގެ ނަތީޖާ ނުކުންނަ ގޮތަކުން ސެމީއަށް ދިއުމުގެ ވަރަށް ހަނި ފުރުސަތެއް އުނގޫފާރަށް އަދިވެސް އެބައޮތެވެ.