މިއަދު އެމްޑީޕީ މިވަނީ ޅަފަތުން އަރައިގެންފައި, އަމިއްލަ ފައިމައްޗަށް ތެދުވަން މި ލިބުނީ މުހިންމު ވަގުތަކު: ފައްޔާޒު

އެމްޑީޕީ މިހާރު ޅަފަތުގެ ދައުރުން އަރައިގެންފައިވާ ކަމަށާ، އަމިއްލަ ފައިމައްޗަށް ތެދުވަން އެ ޕާޓީއަށް ފުރުސަތު ލިބިފައިމިވަނީ ވަރަށް މުހިންމު ދަނޑިވަޅެއްގައި ކަމަށް އެޕާޓީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ރާއްޖޭގައި އެންމެ ފުރަތަމަ އުފެދުނު ސިޔާސީ ޕާޓީ ކަމުގައިވާ މޯލްޑިވިއަން ޑިމޮކްރަޓިކް ޕާޓީއަށް 18 އަހަރު ފުރުމާއި ގުޅިގެން ފައްޔާޟް ދެއްވި ޚިތާބުގައި ވަނީ، އެމްޑީޕީ އުފެދުނު އިރު ރާއްޖޭގެ ސިޔާސީ މަޝްރަހުގައި ކަންކަން އޮތް ގޮތަށް އަލިއަޅުއްވާލައްވާފައެވެ.

” އަބަދުވެސް ރާއްޖޭގައި އޮތީ މަތިން ތިރިއަށް ހިނގާ ވެރިކަމުގެ ނިޒާމެއް، ވާދަވެރި ސިޔާސީ ވިސްނުމެއް އޮތުމަކީ އޭރު އެންމެ ބޮޑު ކުށް އެއީ އެންމެ މީހަކު މުޅި އުމުރު ވެރިކަމުގައި ހުރުމަކަށް ހުރަހެއް ނެތް ދުވަސްވަރު، މިނިވަން މުއައްސަސާތަކާ އިންސާނީ ގަދަރާ ކަރާމާތުގައި އެއްވެސް އަގެއް ނެތި އިންތިހާ ދަރަޖައިގެ ބޭ އިންސާފާ ލާއިންސާނީ އަނިޔާ ދިނުމަކީ އޭރު ދައުލަތުގެ ހައިބަތު”

އެމްޑީޕީގެ ޗެއާޕާސަން ފައްޔާޟް އިސްމާއިލް

ފައްޔާޒު ވިދާޅުވީ، އެފަދަ ކަންކަމާއި ދެކޮޅަށް، އެތައް ޒަމާނެއް ވަންދެން ދިވެހިން ހިފަހައްޓައިގެން ތިބި އިހްސާސްތަކާއި، ޝުއޫރު ބޭރަށް ފަޅައިގެން ދިޔަ ވަގުތެއް ދިވެހިރާއްޖެއަށްވެސް އައި ކަމަށެވެ. އަދި  “އެމްޑީޕީ” އަކީ ދިވެހިން ހަށި ފޮޅާލައި މިނިވަންވެގަތުމުގެ އޮއިވަރު އޮބި ނޯވެގެން އުފެދުނު ނަމެއް ކަމަށްވެސް އޭނާ ވިދާޅުވި އެވެ.

ފައްޔާޒް ވިދާޅުވީ އެމްޑީޕީ ހައްގުގައި އެތަކެއް ބައެއް އެތަށް ގުރުބާނީއެއްވެފައިވާ ކަމަށެވެ. އަދި އެފަރާތްތަކަށް ޝުކުރު ކުރުން ހައްގު ކަމުގައިވެސް ވިދާޅުވި އެވެ.

މިއާއެކު އޭނާ ވިދާޅުވީ, ދޫނުދީ ކުރި މަސައްކަތުން އެ ޕާޓީއަށް 2008 ވަނަ އަހަރު ވެރިކަން ލިބުނު ނަމަވެސް ތިން އަހަރު ފަހުން އަނެއްކާވެސް މަގުމަތި ވީ ކަމަށާއި އަލުން އަނެއްކާވެސް ހަތް އަހަރު މަގުތައް މަތީ ގަނަތެޅެން ޖެހުނު ކަމަށެވެ. އަދި އެފަދަ އެތަކެއް މަސައްކަތުން ދިވެހިރާއްޖެ އަނެއްކާވެސް "ސަލާމަތުގެ އައްސޭރިއަށް" ގެންދެވުނު ކަމަށް އޭނާ ވިދާޅުވި އެވެ.

”އެތައް އަހަރަކުން ނުވެ ދިގުލީ އެތައް ތަކުލީފެއްގެ އަގު 2018ގައި އެމްޑީޕީ އުފެއްދި ސަރުކާރުން ދިވެހި ރައްޔިތުންނަށް ލިބެން ފަށައިފި، އަސާސީ ހިދުމަތްތަކާ އިގްތިސާދީ ފުރުސަތު ހުޅުވިގެންދާ ކިތަންމެ މަޝްރޫއެއް މި ފަސް އަހަރު ގެނެވިއްޖެ ސަބަބަކީ އެމްޑީޕީގެ ލޮބުވެތި މެންވަރުން ކުރި މަސައްކަތް”

އެމްޑީޕީގެ ޗެއާޕާސަން ފައްޔާޟް އިސްމާއިލް

ފައްޔާޒު ވިދާޅުވީ، މިއަދު އެމްޑީޕީ އައިސްފައިވާ ހިސާބަަށް އައި ދަތުރަކީ ފަސޭހަ ދަތުރެއް ނޫން ކަމަށެވެ. އެގޮތުން، އެ ޕާޓީގެ އެތެރޭގައި އުފެދުނު ގޮންޖެހުންތަކުން އުފެދުނު ތަކުލީފު ތަކަކަކީ، ސިޔާސީ ޕާޓީއަކުން ތަހައްމަލް ކުރާނެ އެންމެ އުނދަގޫ މަރުހަލާ ކަމަށާ، އެހެންނަމަވެސް، ކެތްތެރިކަމާއިއެކު ކުރި މަސައްކަތުން، އެކަމުންވެސް އަރައި ގަނެވުނު ކަމަށް އޭނާ ވިދާޅުވި އެވެ. އަދި އެ ތަޖުރިބާ އަކީ ކުރިއަށް އޮތްތަނުގައި ކާމިޔާބީ އަށް ހުޅުވުނު އައު ދޮރެއް ކަމަށްވެސް ވިދާޅުވި އެވެ.

މިއަދަކީ އެމްޑީޕީ ޅަފަތުން އަރައިގަތް ދުވަސް. 18 އަހަރުވުމަކީ ތަޞައްރުފް ފުދުން. އަމިއްލަ ފައިމައްޗަށް ތެދުވެ ދެކޮޅު ހޯދާ ބަލާލުމަށް އެމްޑީޕީއަށް ފުރުސަތު މި ލިބުނީ ވަރަށް މުހިންމު ދަނޑިވަޅެއްގައި. މިއަދު އެމްޑީޕީ މެންބަރުން ކުރަން އޮތް ކަމަކީ އެކީއެކަށް ނުކުމެ، މި ޕާޓީއަށް ރިޔާސީ ދެވަނަ ދައުރެއް ހޯދައި ދިނުމަށް މަސައްކަތް ކުރުން. ފާއިތުވި ފަސް އަހަރު ހޯދުނު ކާމިޔާބީ ޒަމާންތަކަކަށް ދެމެހެއްޓޭނެ ގޮތަކީ އެކީ. ހިނގަމުން، ނިންމަމުންދާ މަޝްރޫއުތައް ދެމެހެއްޓެނިވި ކުރެވޭނެ ހަމައެކަނި ގޮތަކީވެސް އެއީ.

އެމްޑީޕީގެ ޗެއާޕާސަން ފައްޔާޟް އިސްމާއިލް

ފައްޔާޒު ވާހަކަ ނިންމަވާ ލެއްވީ މިހާރު ހޯދެމުންދާ ކާމިޔާބީތައް ދޫކޮށް، ނިމިގޮސްފައިވާ އަނިޔާވެރި މާޒީއަށް ދިޔުމަށް އެމްޑީޕީން ފުރުސަތު ނުދޭނެ ކަމަށް ވިދާޅުވެ، އެ ޕާޓީއަށް ކާމިޔާބީ ލިބުމަށް އެދި ދުޢާ ކުރައްވަމުންނެވެ.