ޑެންގީ ހުމާއި ބޭރަށްހިނގުން އިތުރު ވާތީ ސަމާލުވާން އެދިއްޖެ!

ޑެންގީ ހުމާއި ބޭރަށް ހިނގުން ތަންކޮޅެއް ގިނަވެއްޖެކަމަށް ކުޑަކުދިންގެ ޚާއްސަ ޑޮކްޓަރ އަހްމަދު ފައިސަލް ވިދާޅުވެއްޖެއެވެ.

ޑރ ފައިސަލް މިހެން ވިދާޅުވެފައިވަނީ ޑރ ކުރައްވާފައިވާ ޓްވީޓެއްގައެވެ.

ޑރ ފައިސަލް ވިދާޅުވެފައިވަނީ ޑެންގީހުމާއި ބޭރަށް ހިނގުން ތަންކޮޅެއް ގިނަ ވެއްޖެ ކަމަށެވެ. އެގޮތުން އިއްޔެ ހޮސްޕިޓަލުގައި އެނދުމަތިކުރި ކުދިންގެ ތެރެއިން ތިން ކުދިން ބޭއްވީ ޑެންގީ ހުން ޖެހިގެން ކަމަށެވެ.

މީގެއިތުރުން ދެ ކުދިން ބޭރަށް ހިންގާތީ އެނދުމަތިކުރި ކަމަށާއި އަދި އެއްކުއްޖަކު އިންފުލުއެންޒާ އަދި ނިއުމޯނިއާ ޖެހިގެން އެނދުމަތިކޮށްފައިވާ ކަމަށް ޑރ ފައިސަލް ވިދާޅުވެފައިވެއެވެ.

ޑރ ފައިސަލް ވަނީ ރައްކާތެރިވެވެންހުރި ކަންތައްތައް ކުރެއްވުމަށް އިލްތިމާސް ކުރައްވައިފައެވެ.

ޑެންގީހުމަކީ ދޭތެރެ ދޭތެރެއިން ރާއްޖޭގައި ފެތުރޭ ބައްޔެކެވެ. ޑެންގީ އިން ރައްކާތެރިވުމަށް މަދިރިން ރައްކާތެރިވުމަށް ހަށިގަނޑު ރަގަޅަށް ނިވައިވާ ގޮތަށް ހެދުން އެޅުމާއި މަދިރި ލޯޝަން، ސްޕްރޭ އަދި ރެޕެލެންޓްބޭނުން ކުރުން، އަދި   ޑެންގީ ފަތުރާ މަދިރިއަކީ ދުވާލުގެ ހުރިހާ ވަގުތުގައިވެސް ހަފާ މަދިރިއެއް، ހާއްސަކޮށް ފަތިސް ގަޑީގައި އަދި ހަވީރު އިރު އޮއްސޭ ވަގުތު ގިނަވާތީ ގޭގެ ދޮރުތަކާއި ކުޑަ ދޮރުތައް އެ ގަޑިތަކުގައި ލައްޕާފައި ބެހެއްޓުން ހިމެނެއެވެ.

މީގެ އިތުރުން  ޑެންގީފަތުރާ މަދިރި އާލާވާ ތަންތަން ނައްތާލުން، ތިން ދުވަހަށް ވުރެ ގިނައިން ހުން އަންނަނަމަ، ނުވަތަ ޑެންގޫގެ ނުރައްކާތެރި އަލާމާތްތައް  ފެނިއްޖެނަމަ ލަސްނުކޮށް ޑޮކްޓަރަކަށް ދެއްކުން ހިމެނެއެވެ.

ޑެންގީގެ ޢަލާމާތްތަކަކީ ކުޑަކަމު ދެވޭ މިންވަރު މަދުވުން، އާދަޔާ ހިލާފަށް ވަރު ދެރަވުން، ބަނޑުގައި ރިއްސުން އަދި ތުއްތުކުދިންނަށް  ކައިރިން ނުބޮވުން ހިމެނެއެވެ.

ޢާންމުކޮށް ފެތުރޭ ރޯގާ ތަކުން ރައްކާތެރިވުމަށް ސައިބޯނިލައިގެން ސާފުކޮށް އަތްދޮވުމަށް ހާއްސަ ސަމާލުކަމެއްދިނުމަށް އަބަދުވެސް ޑޮކްޓަރުން އިރުޝާދު ދެއްވައެވެ.