ހަމަލާތައް ހުއްޓާލައިފައިވާ މުއްދަތު އިތުރުކުރުމަށް އިޒްރާއިލަށް ޕްރެޝަރކުރަނީ

އިޒްރާއިލާއި ފަލަސްޠީނުގެ މުޖާހިދުންނާއި ދެމެދު ބަދަލުކުރެވެމުންދިޔަ ހަމަލާތައް ހުއްޓައިލައިފައިވާ މުއްދަތު އިތުރުކުރުމަށް މިޞްރު، ޤަޠަރު އަދި އެމެރިކާއިން ޕްރެޝަރުކުރަމުންދާ ކަމަށް ބޭރުގެ މީޑިއާ ތަކުން ބުނެފިއެވެ.

އިޒްރާއިލްގެ ސިފައިންގެ ފައުޖާއި ވާހަކަދައްކަމުން އިޒްރާއިލްގެ ބޮޑުވަޒީރު ނަތަންޔާހޫ ބުނެފައިވައިވަނީ އެމީހުން ހުއްޓުވޭނެ އެއްވެސް ގޮތެއް ނޯންނާނެ ކަމަށެވެ. އެހެން ނަމަވެސް ހަމަލާބަދަލު ކުރުންތައް ހުއްޓުވުމަށް މެދުވެރިއަކަށް ވި މިޞްރު، ޤަޠަރު އަދި އެމެރިކާއިން ދަނީ ހަމަލާތައް ހުއްޓައިލައިފައި އޮތް އޮތުން ދިގުދަންމާލުމަށް އިޒްރާއިލަށް ޕްރެޝަރު ކުރަމުން ކަަމަށް އަލްޖަޒީރާގައި ބުނެފައިވެއެވެ.

އަލްޖަޒީރާގައި ނަތަންޔާހޫ އެމެރިކާގެ ރައީސް ޖޯ ބައިޑަން އަށް ބުނި ކަމަށް ބުނެފައިވަނީ ހަމަލާދިނުން މަޑުޖައްސައިލާ ކޮންމެ ދުވަހަކަށް ހަމާސްއިން ރަހީނު ކޮށްފައިވާ މީހުންގެ ތެރެއިން 10 މީހަކު މިނިވަން ކުރާނަމަ ހަމަލާތައް މަޑުޖައްސައިލައިފައިވާ މުއްދަތު ދިގުދަންމައިލެވިދާނެ ކަމަށެވެ.

ރަހިނުކޮށްފައިވާ ޢާންމުން ދޫކޮށްލުމުގެ ތިންވަނަ ބުރުގެ ތެރެއިން އިއްޔެ ހަމާސްގެ މުޖާހިދުންވަނީ އިޒްރާއިލްގެ 13 މީހަކާއި، ތައިލެންޑްގެ 3މީހަކާއި އިޒްރާއިލީ ރަޝިއަން މީހަކު މިނިވަން ކޮށްފައެވެ. އަދި އިޒްރާއިލުން ވަނީ ފަލަސްޠީނުގެ 39 މީހަކު މިނިވަންކޮށްފައެވެ. މިއާއިއެކު ހުޅަނގުއައްސޭރީގައި ވަނީ އެކަމުގެ އުފާ ފާޅުކުރުންތައް ކުރިއަށް ގެންގޮސްފައެވެ.

އިޒްރާއިލުން ޣައްޒާއަށް ދިން ހަމަލާތަކުގައި 14854 މީހަކު ވަނީ ޝަހީދުކޮށްލައިފައެވެ.