ބާރު ބޮޑުވެ، އޭޑީކޭގެ އޯޕީޑީ ކޮޓަރިތައް ޚާއްސަ ފަރުވާދޭ ކޮޓަރިތަކަށް ބަދަލުކޮށްފި!

މާލޭގައި ބޭރަށް ހިންގުން ކުއްލިއަކަށް އިތުރުވެ، ގިނަ ބަޔަކު ފަރުވާ ހޯދުމަށް ހޮސްޕިޓަލަށް އަންނަމުންދާތީ، އޭޑީކޭ ހޮސްޕިޓަލުގެ ގްރައުންޑް ފްލޯ ގެ އޯޕީޑީ ކޮޓަރިތައް ވަގުތީ ގޮތުން، ޚާއްސަ އޯޕީޑީ އަދި ފަރުވާދޭ ކޮޓަރިތަކަށް ބަދަލުކޮށްފިއެވެ.

ހޮޑުލެވުމާއި ބޭރަށް ހިންގުން މާލޭ ސަރަހައްދުގައި ބާރު މިނެއްގައި އިތުރުވެ، އޭޑީކޭ ހޮސްޕިޓަލުގެ އިތުރުން އައިޖީއެމްއެޗްގެ އެމަޖެންސީ ރޫމަށްވެސް ވަނީ ބާރު ބޮޑުވެފައެވެ. މާލޭގެ އިތުރުން ހުޅުމާލޭގައިވެސް ރޯގާ ޖެހޭ ކުޑަކުދިންގެ އަދަދު އިތުރުވެ، ހުޅުމާލޭ ހޮސްޕިޓަލަށްވެސް ވަރަށް ބާރު ބޮޑުވެފައިވާއިރު އެ ހޮސްޕިޓަލަށް ގެންދާ ކުޑަކުދިންގެ އަދަދު އިތުރުވި ނަމަވެސް، އެތަނުގައި ހިދުމަތް ދެމުން އަންނަނީ އެންމެ ކައުންޓަރަކުން ކަމަށްވާތީ ފަރުވާ ނުލިބި ގިނަ އިރުވާކަމުގެ ޝަކުވާ ވެސް ބައެއް ފަރާތް ތަކުން އަންނަނީ ކުރަމުންނެވެ.

ފެތުރެމުންދާ މި ބަލި މަޑު ކަމާއި ގުޅިގެން އޭޑީކޭ ހޮސްޕިޓަލުގެ ކުޑަކުދިންގެ ޚާއްސަ ޑޮކްޓަރު އަބްދުالله ނިޔާފް ކުރެއްވި ޓުވީޓެއްގައި ވަނީ، ބޭރަށް ހިންގާތީ ހޮސްޕިޓަލުގެ އެމެޖެންސީ އަށް ދައްކާ ތުއްތު ކުދިންނާއި، ކުޑަ ކުދިންގެ އަދަދު ވަރަށް ބޮޑަށް އިތުރު ވެފައިވާ ކަން ފާހަގަކޮށް އެކަމާއި ކަންބޮޑުވުން ފާޅުކުރައްވާފައެވެ.

އެހެންކަމުން، އެ ބަލިން ރައްކާތެރިވުމަށް، ތިމާ ބޯ ފެނަކީ، ސާފު ބޯފެންތޯ ޔަގީން ކުރުމަށް ނިޔާފް ވަނީ އިރުޝާދު ދެއްވާފައެވެ. އެގޮތުން، ކެއްކުމަށްފަހު، ފިނި ކޮށްފައި ހުންނަ ފެނާއި، ފިލްޓަރ ކޮށްފައި ހުންނަ ފެނަކީ ރައްކާތެރި ފެން ކަން ޑޮކްޓަރ ފާހަގަކުރެއްވިއެވެ.

ހޮޑުލެވުމާއި ބޭރަށް ހިންގުން ފެތުރެމުންދާ ސަބަބެއް ކަމުގައި ޑޮކްޓަރ ލަފާކުރައްވާފައި ވަނީ، ނޮރޯވައިރަސް، ރޮޓާވައިރަސް ފަދަ ފެނާއި، ކާބޯތަކެއްޗާއި، ތަޣައްޔަރުވެފައިވާ ތަންތަނުގައި ހަލުއިކަމާއި އެކު ފެތުރޭ ވައިރަސް ތަކެވެ.

މި ބަލި ޖެހިއްޖެ ނަމަ، ގިނަގިނައިން އޯ އާރް އެސް ޕެކެޓް ފެން ބުއިމާއި، ހޮޑަށް ބޭސް (Domperidone, Ondansetron,) ކެއުމަށް ޑޮކްޓަރ ލަފާދެއްވައެވެ.

ގޭގައި ބޭސްކައި ފަރުވާކުރުމުންވެސް، ހޮޑުލުން ނުހުއްޓި، އެއްވެސް އެއްޗެއް ކައި ބޮއި ނުހެދޭ ނަމަ، ނުވަތަ ޑީހައިޑްރޭޓް ވުމުގެ އަލާމާތްތައް ( ކުޑަ ކަމު ނުދެވި މާ ގިނަ އިރުވުން، ތަލި ހިކިފައި ހުރުން) ނުވަތަ މާ ބޮޑަށް ވަރުބަލި ވާ ނަމަ، ލަސް ނުކޮށް ޑޮކްޓަރަށް ދެއްކުމަށް ޑރ. ނިޔާފް ވަނީ އެދިލައްވާފައެވެ.

މީގެ އިތުރުން ޑރ. ވިދާޅުވީ، ޑޮކްޓަރަށް ދައްކަން އަންނައިރު، ހޮސްޕިޓަލުގެ އީއާރު އާއި އޯޕީޑީ އަށް ވަރަށް ބާރު ބޮޑު ވާނެ ކަމަށާ، އެތަނުގެ މުވައްޒަފުން މަސައްކަތް ކުރައްވަމުންދަނީ ޑިމާންޑާއި އެއްވަރަށް ވީ ވަރަކުން ޚިދުމަތް ދެވޭތޯ ކަމަށެވެ.

މިއާއެކު ޑރ. ވިދާޅުވީ، ހޮސްޕިޓަލުގެ އީއާރް އަށް އާއްމުކޮށް ދައްކަން އަންނަނީ ތުއްތު ކުދިން ކަމަށާ، އެހެންނަމަވެސް ބޮޑެތި މީހުންވެސް މަދުން ނަމަވެސް ރޭ އައިސްފައިވާ ކަމަށެވެ.

އަދި ބަލި މީހުން އިތުރުވަމުންދާތީ، ފަރުވާ އަވަސް ކުރުމަށް އޭޑީކޭ ހޮސްޕިޓަލުގެ ގްރައުންޑް ފްލޯ ގެ އޯޕީޑީ ކޮޓަރިތައް ވަގުތީ ގޮތުން، ޚާއްސަ އޯޕީޑީ އަދި ފަރުވާދޭ ކޮޓަރިތަކަށް ބަދަލުކޮށްފައިވާ ކަމަށެވެ.