ޝަހީދު ހުސައިން އާދަމްގެ ޢާއިލާއަށް އިދިކޮޅުު ކޯލިޝަންގެ ތަޢުޒިޔާ!
ޝަހީދު ޙުސައިން އާދަމްގެ ބައްޕާފުޅު ނިޔާވުމާއި ގުޅިގެން ޕީޕީއެމް/ޕީއެންސީން، އެ ޢާއިލާއަށް ތަޢުޒިޔާ ދަންނަވައިފިއެވެ.
ޝަހީދު ހުސައިން އާދަމްގެ ބައްޕާފުޅު ނިޔާވުމުގެ ހިތާމައިގައި ޕީޕީއެމް/ޕީއެންސީ ކޯލިޝަނުން ނެރުނު ބަޔާނެއްގައި ބުނީ، 1998 ނޮވެމްބަރު 3 ވަނަ ދުވަހު ރާއްޖެއަށް ކުރިމަތިވި ޢުދުވާނީ ޙަމަލައިގައި ޓެރަރިސްޓުންގެ ކިބައިން ރާއްޖެ ސަލާމަތް ކުރުމުގައި ޙަރަކާތްތެރިވެވަޑައިންނެވި ބަޠަލު ޝަހީދު ކޯޕްރަލް ޙުސައިން އާދަމްގެ ލޮބުވެތި ބައްޕާފުޅު އާދަމް މުޙައްމަދު އަވަހާރަވި ޚަބަރު އެ ކޯލިޝަންގެ އެންމެހާ މެންބަރުން އެހީ ވަރަށްވެސް ފުން ހިތަމާއާއި އަސަރާއެކު ކަމަށެވެ.
މިއާއެކު އެ ކޯލިޝަނުން ވަނީ މަރްހޫމްގެ ފުރާނައަށް ރަޙުމަތް ލައްވާ ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކުރެއްވުމަށް އެދި ދުއާ ދަންނަވާފައެވެ.
ޝަޙީދު ކޯޕްރަލް ޙުސައިން އާދަމްގެ ބައްޕާފުޅު އަވަހާރަވުމުގެ ހިތާމައިގައި މިކޯލިޝަންގެ އެންމެހައި މެންބަރުން ބައިވެރިވެ، ޝަހީޑު ކޯޕްރަލް ޙުސައިން އާދަމްގެ މަންމާފުޅާއި ޢާއިލާއަށް މިކޯލިޝަންގެ ލީޑަރު، ޕީޕީއެމްގެ ރައިސް ރައީސް ޔާމީން ޢަބްދުލްޤައްޔޫމާއި މިކޯލިޝަންގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒާއި އެމަނިކުފާނުގެ ރަނިންގ މޭޓް ޙުސައިން މުޙައްމަދު ލަޠީފާއި މިކޯލިޝަންގެ ލީޑާރޝިޕާއި، ސެނެޓަރުންނާއި، ޕާލަމަންޓްރީ ގްރޫޕްގެ މެންބަރުންނާއި، ދާއިރާ ރައީސުންނާއި، ސްޓިއަރިންގ ކޮމިޓީތަކާއި އަދި މިކޯލިޝަނަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވަމެވެ.
ޝަހީދު ހުސައިން އާދަމްގެ ބައްޕަ ނިޔާވުމުގެ ހިތާމައިގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒު ވެސް ވަނީ އާއިލާއަށް ތައުޒިޔާ ފޮނުއްވައިފައެވެ.
މިއަދުގެ ވަގުތެއްގައި އާދަމް މުހައްމަދު ނިޔާވެފައިވަނީ ކުޅުދުއްފުށީ ރީޖަނަލް ހޮސްޕިޓަލްގައި ފަރުވާދެމުން އަންނަނިކޮށެވެ. އާދަމް ނިޔާވިއިރު ދުނިޔޭގައި އަންބަކާއި 6 ދަރިން އެބަ ތިއްބެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
