ޢިމާރާތްތައް ކުރުމާއި ގުޅޭ ދާއިރާތަކާއި ގުޅޭ އެމްއޯޔޫއެއްގައި ސޮއިކޮށްފި!

ޢިމާރާތްތައް ކުރުމާއި ގުޅޭ ދާއިރާތަކާއި ގުޅޭ އެމްއޯޔޫއެއްގައި އެފްޑީސީ އާއި އިސްލާމީ ވުޒާރާ ސޮއިކޮށްފިއެވެ.

އިސްލާމީ ވުޒާރާ އާއި ފަހި ދިރިއުޅުން ކޯޕަރޭޝަނާއި ދެމެދު އެއްބަސްވެވުނު މި އެއްބަސް ވުމަކީ އިންފްރާސްޓްރަކްޗަރ މަޝްރޫޢުތައް ފަރުމާ ކުރުމާއި، ޕްރޮޖެކްޓްތަކަށް ބޭނުންވާ ޕްރޮޕޯސަލް ތައްޔާރުކުރުމާއި، ޕްރޮޖެކްޓް މެނޭޖްމަންޓާއި ޓެކްނިކަލް ކޮންސަލްޓަންސީގެ ޚިދުމަތް ދިނުމާއި އިމާރާތްކުރުމުގެ އޮނިގަނޑެއް ޤާއިމްކުރުމަށް ވެވުނު އެއްބަސްވުމެކެވެ.

އެ ވުޒާރާގައި ބޭއްވި ރަސްމިއްޔާތެއްގައި އެ އެމް.އޯ.ޔޫގައި މި ވުޒާރާގެ ފަރާތުން ސޮއިކުރެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުއެވެ. އަދި ފަހި ދިރިއުޅުން ކޯޕަރޭޝަން ލިމިޓެޑްގެ ފަރާތުން ސޮއި ކުރެއްވީ އެ ކޯޕްރޭޝަންގެ މެނޭޖިންގ ޑިރެކްޓަރ ހަމްދާން ޝަކީލް އެވެ.

ފަހި ދިރިއުޅުން ކޯޕަރޭޝަން ލިމިޓެޑުން އެހީތެރިކަން ފޯރުކޮށްދިނުމަށް އެއްބަސްވާ ކަންތައްތަކަކީ:

1. މިނިސްޓްރީން ހިންގާ ޕްރޮޖެކްޓްތަކަށް ޓެކްނިކަލް ކޮންސަލްޓެންސީ ދިނުން

2. ޕްރޮޖެކްޓްތަކަށް ބޭނުންވާ ޕްރޮޕޯސަލް ތައްޔާރުކުރުމުގައި ފަންނީ އެހީތެރިކަންދިނުން

3. ޕްރޮޖެކްޓްތައް މެނޭޖްކުރުމަށް ކޮންސަލްޓެންސީ ދިނުން

4. މިސްކިތްތަކާއި ވަޤުފް އިމާރާތްތަކާއި އެހެނިހެން އިންފްރާސްޓްރަކްޗަރ މަޝްރޫޢުތައް ފަރުމާކޮށްދިނުން

5. މިސްކިތްތަކާއި ވަޤުފް އިމާރާތްތަކާއި އެހެނިހެން އިންފްރާސްޓްރަކްޗަރ މަޝްރޫޢުތައް އިމާރާތްކުރުން

6. ގުޅުންހުރި ދާއިރާތަކުން މީހުން ބިނާކުރުމާއި އިތުރު ފަންނީ އެހީތެރިކަން ފޯރުކޮށްދިނުން