ފްރާންސުން، ޝީން އަދި ޓީމޫފަދަ ފާސްޓް ފެޝަން ކުންފުނިތައް ޖޫރިމަނާ ކުރުމުގެ ޤާނޫނެއް ފާސްކޮށްފި

ޝީން ޓީމޫ އަދި އެލިއެކްސްޕްރެސް ފަދަ އޮންލައިން ފާސްޓް ފެޝަން ކުންފުނިތައް ހިފެހެއްޓުމަށް އަމާޒުކޮށް ފްރާންސްގެ ސެނެޓުން ބިލެއް ފާސްކޮށްފިއެވެ.

ދެ އަހަރަށް ވުރެ ގިނަ ދުވަހުގެ ބަހުސަށް ފަހު ހޯމަ ދުވަހު ފާސްކުރި މި ޤާނޫނުގެ ދަށުން އަލްޓްރާ ފާސްޓް ފެޝަން ކުންފުނިތައް ކޮންމެ ޕްރޮޑަކްޓަކަށް 0.25 ޔޫރޯ އާއި 6 ޔޫރޯ އާ ދެމެދުގެ ޖޫރިމަނާއެއް ދައްކަން ޖެހޭނެއެވެ. މި ޖޫރިމަނާ 2030 ވަނަ އަހަރާ ހަމައަށް ޕްރޮޑަކްޓަކަށް 10 ޔޫރޯ އާ ހަމައަށް ބޮޑުވާނެއެވެ.

މީގެ އިތުރުން އަލްޓްރާ ފާސްޓް ފެޝަން ކުންފުނިތަކުން އިޝްތިހާރު ކުރުމާއި އޮންލައިން އިންފްލުއެންސަރުން މެދުވެރިކޮށް އެ ކުންފުނިތައް ޕްރޮމޯޓް ކުރުން ވެސް މި ޤާނޫނުން މަނާ ކުރެއެވެ.

މި ޤާނޫނު ތަންފީޒު ކުރެވޭނީ ރައީސް ތަޞްދީޤު ކުރެއްވުމުންނެވެ. ޝީން އިން ބުނީ މި ބިލުގެ ބައެއް ފިޔަވަޅުތައް ޔޫރަޕިއަން ޔޫނިއަންގެ ޤާނޫނީ އޮނިގަނޑާ ފުށުއެރުންތަކެއް ހުރި ކަމަށް ފެންނަ ކަމަށެވެ.

މި ބިލުގެ ފުރަތަމަ ވާޝަން 2024 ވަނަ އަހަރުގެ މާރިޗު މަހު ތިރީ ގެއިން ފާސްކުރިއިރު 2025 ވަނަ އަހަރުގެ ޖޫން މަހު ސެނެޓުން ފާސްކުރި ވާޝަން ވަނީ ހަމައެކަނި އޮންލައިން ޕްލެޓްފޯމްތަކަށް އަމާޒުކޮށް ޒާރާ އަދި އެޗްއެންޑެމް ފަދަ ޔޫރަޕިއަން ފާސްޓް ފެޝަން ކުންފުނިތައް އިސްތިސްނާ ކޮށްފައެވެ.