އޯގަސްޓުމަހު ސަރުކާރު ފްލެޓުތަކުގެ 8 ޓަވަރަށް މީހުންނަށް ވަދެވޭނެ: ފައްޔާޒު
މި އަހަރުގެ އޯގަސްޓު މަސް ނިމުމުގެ ކުރިން މި ސަރުކާރުން ބޯހިޔާވަހިކަމަށް އަޅާ ފްލެޓުތަކުގެ 8 ޓަވަރުގައި މީހުންނަށް ދިރިއުޅެން ފެށޭނެކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
ފައްޔާޒު މިފަދައިން ވިދާޅުވެފައިވަނީ ސަރުކާރުގެ ބޯހިޔާވަހިކަމުގެ މަޝްރޫއު މިހާރު އޮތް ހިސާބާއި، ސަރުކާރުން އިއުލާނުކޮށްފައިވާ ސްކީމްގެ ދަށުން، ފްލެޓު ލިބޭ ފަރާތްތަކުގެ ލިސްޓު އާންމުކޮށް، މީހުންނަށް ފުލެޓުތަކުގައި ދިރިއުޅެން ފެށޭނީ ކިހާ ހިސާބަކުތޯ އަހާ "ވޮއިސް" އިން ކުރި ސުވާލަކަށް ޖަވާބުދެއްވަމުން ނެވެ.
ފައްޔާޒު ވިދާޅުވީ އޮގަސްޓުމަހާއި ހިސާބަށް ޓަވަރުތަކުގެ ސްޓްރަކްޗާތައް ނިމޭނެ ކަމަށެވެ. އަދި އެ ޓަވަރުތަކުގެ ތެރެއިން 8 ޓަވަރަށް މީހުން ވެއްދޭނެކަމަށް ބެލެވޭކަމަށް މިނިސްޓަރު ވިދާޅުވި އެވެ.
"އޯގަސްޓު ހިސާބަށް ޓަވަރުތަކުގެ ސްޓްރަކްޗާތައް ނިމޭނެ، އަދި އޭގެން 8 ޓަވަރަށް މީހުންނަށް ވަދެވޭވަރު ކުރުން."
އިކޮނޮމިކް މިނިސްޓަރު ފައްޔާޒު
މި ސަރުކާރުގެ ބީހިޔާވަހިކަމުގެ ސްކީމުގެ ތެރެއިން ފްލެޓުތައް ލިބޭ ފަރާތްތަކުގެ ލިސްޓު މި ޖޫން މަހު އިއުލާނު ކުރައްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވަނީ ވިދާޅުވެފަ އެވެ.
އޭގެ އިތުރުން އެމަނިކުފާނު ވިދާޅުވީ މާލެ ސަރަހައްދުން ދޫކުރާ ގޯތި ދޫކުރާ ސްކީމަށް ހުށައަޅާފައިވާ ފަރާތްތަކުގެ ތެރެއިން އެންމެ ހައްގުވެރިން ހޯދުމުގެ މަސައްކަތް މިހާރު ކުރަމުންދާ ކަމަށެވެ. މިހާރު ފޯމުތައް ބަލައިގެންފައިވާއިރު، އެ ސްކީމުގެ ތެރެއިން ގޯތި ހައްގުވާ ފަރާތްތަކަށް ދިނުމަށް ބަލަންޖެހޭ ކަންކަން ކަށަވަރުކުރުމަށް ސަރުކާރުން މަސައްކަތް ކުރައްވާނެކަމަށް ރައީސް ޞާލިހު ވިދާޅުވި އެވެ.
އެމަނިކުފާނު ވިދާޅުވީ މި ދައުރު ނިމުމުގެ ކުރިން ސަރުކާރުން ބޯހިޔާވަހިކަމަށް އަޅާ ފްލެޓުތަކަށް މީހުންނަށް ވަދެވޭނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
