މިހިނގާ ޖުލައިމަހުގެ ތެރޭގައި ހުޅުމާލޭ ހޮސްޕިޓަލްގައި މުހިންމު ހިދުމަތްތަކެއް ފަށަނީ

މިހިނގާ ޖުލައިމަހުގެ ތެރޭގައި ހުޅުމާލޭ ހޮސްޕިޓަލުގައި މުހިންމު އާ ހިދުމަތްތަކެއް ފެށިގެންދާނޭކަމަށް މާލެ ސިޓީ ގްރޫޕް އޮފް ހޮސްޕިޓަލްސްއިން ހާމަކޮށްފިއެވެ.

ޕީއެސްއެމްނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤު ޙަލީމް ވިދާޅުވީ ރައީސުސލްޖުމްހޫރިއްޔާ ޑރ.މުހައްމަދުގެ ރިޔާސީ ވައުދުފުޅުގައި ބަޔާންކޮށްފައިވާ ގޮތަށް ހުޅޭ ހޮސްޕިޓަލްގައި މުހިންމު ހިދުމަތްތަކެއް ފެށުމަށް ތައްޔާރުވަމުންދާކަމަށެވެ. އެގޮތުން ކުރިއަށްއޮތް ދިވެހިރާއްޖޭގެ މިނިވަންދުވަހުގެ ކުރިން އެ ހޮސްޕިޓަލްގައި ފެށުމަށް ނިންމި އާ ހިދުމަތްތައް ދޭން ފަށާނޭކަމަށް ހަލީމް ވިދާޅުވިއެވެ.

އޭނާ ވިދާޅުވީ މިހިނގާ ޖުލައިމަހުގެ 26 ގެ ކުރިން ހުޅުމާލޭ ހޮސްޕިޓަލްގައި ގެސްޓްރޯއެންޓޮލޮޖީގެ ޚިދުމަތް ފަށައި، މިމަހުގެ ތެރޭގައި ގޮހޮރާއި މައިދާގެ ބަލިތަކަށް ޚާއްސަ ބަލިމީހުން ބެލުމުގެ އޯޕީޑީ ޚިދުމަތް ލިބެންފަށާނޭކަމަށެވެ. މި ހިދުމަތް ދޭނީ އައިޖީއެމްއެޗްގެ ޑޮކްޓަރުންގެ ޓީމާ ގުޅިގެން ކަމަށާއި، މިހިދުމަތް ހުޅުމާލޭ ހޮސްޕިޓަލުގައި ދޭން ފެށުމުން ހުޅުމާލޭގައި ދިރިއުޅޭ މީހުން އެކަމަށް ފަރުވާހޯދަން އައިޖީއެމްއެޗަށް މާލެ ދާން ޖެހޭޖެހުމަށް ލިޔެއް ލިބިގެންދާނޭކަމަށެވެ.

މީގެ އިތުރުން މީގެކުރިން ހުޅުމާލޭ ހޮސްޕިޓަލުން މީގެ ކުރިން ލިބެމުން ނުދާ ޔޫރޮލޮޖީ ނެފްރޮލޮޖީގެ ޚިދުމަތް ވެސް ޖުލައިމަސް ނިމުމުގެ ކުރިން ދިނުމަށް ނިންމާފައިވާަކަމަށް ހަލީމް ވިދާޅުވިއެވެ.

ނާރުގެ ޚިދުމަތްތަކަށް މި ޑޮކްޓަރު ދެއްކުމުގެ ކަންކަންވެސް ހުޅުމާލޭ ހޮސްޕިޓަލުގައި އިރާދަކުރެއްވިއްޔާ ޖުލައި ސައްބީހުގެ ކުރިން އަޅުގަނޑުމެން ފަށާނަން. އޭގެ ތެރޭގައި ނާރުގެ ބަލިތަކަށް ހާއްސަ ކްލިނިކެއް ގާއިމް ކުރެވޭނެ. ހަމަ މިހާރު އަޅުގަނޑުމެންގެ ނިއުރޮލޮޖިސްޓެއް ހުޅުމާލޭ ހޮސްޕިޓަލުގައި މިހާރު އެބަހުރި އިނގޭތޯ

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤު ޙަލީމް

އެ ހިދުމަތްތަކުގެ އިތުރުން ހުޅުމާލޭ ހޮސްޕިޓަލްގައި ގްލޮކޯމާ ދެނެގަތުމަށް ބޭނުންވާ އެންމެހާ ޑައިގްނޯސްޓިކް ތަޙުލީލުތަކާ ޓެސްޓުތަކުގެ ޚިދުމަތްތައްވެސް ދިނުމަށް ތައްޔާރުވަމުންނެވެ. މި ހިދުމަތުގެ ތެރެއިން ގުލްކޯމާ އޮޕަރޭޝަންތަކާއި ސާޖަރީތައްވެސް ހުޅުމާލޭ ހޮސްޕިޓަލްގައި ފެށުމަށް ދަނީ ތައްޔާރުވަމުންނެވެ.މީގެ އިތުރުން ކެންސަރާއި އޮންކޮލޮޖީގެ ހިދުމަތްތައްވެސް ފުޅާކުރުމަށް ދަނީ މަސައްކަތްކުރަމުންނެވެ.

ހުޅުމާލެއަކީ މިހާރު އެންމެ ހަލުވިކަމާއެކު އާބާދީ އިތުރުވަމުން އަންނަ ސިޓީއެވެ. ހުޅުމާލޭގައި ދިރިއުޅެމުންދާ ރައްޔިތުންނަށް ރަނަގޅު ސިއްހީ ހިދުމަތެއް ފޯރުކޮށްދިނުމަށް ހުޅުމާލެ ހޮސްޕިޓަލަށް އޮތް އެންމެބޮޑު އެއް ގޮންޖެހުމަކީ ޖާގައިގެ ދަތިކަންކަމަށް އެ ހޮސްޕިޓަލުން ފާަހަގަކުރެއެވެ.