ކްރެޑިޓް ކާޑުން ޑޮލަރުގެ މުޢާމަލާތް ކުރެވޭ މައްސަލައަކީ ކޮންމެވެސް ގޮތެއް ހަދަންޖެހޭ މައްސަލައެއް: ފައްޔާޟު

ކްރެޑިޓް ކާޑުން ޑޮލަރުގެ މުޢާމަލާތް ކުރެވޭ މައްސަލައަކީ “ކޮންމެވެސް ގޮތެއް ހަދަންޖެހޭ ކަމެއް” ކަމަށް އިދިކޮޅު އެމްޑީޕީގެ ޗެއަރޕާސަން ފައްޔާޟު ޢިސްމާޢީލް ވިދާޅުވެއްޖެއެވެ.

ރުފިޔާ ކާޑުން ޑޮލަރުގެ މުޢާމަލާތް ނުކުރެވޭ ގޮތް ހަދައި، ޑޮލަރުގެ މުޢާމަލާތް ކުރެވޭ ލިމިޓް ކުޑަކުރުމަށް ނިންމާފައުވާ ކަމަށް މި މަހުގެ 25 ވަނަ ދުވަހު ބީއެމްއެލްއިން ނިންމިއެވެ.

އެއާއެކު ވަރަށް ގިނަ ރައްޔިތުންގެ ނުރުހުން ސަރުކާރަށް އަމާޒުވެ، ސަރުކާރު ވައްޓާލަފާނެ ކަމުގެ އިންޒާރުވެސް މީސްމީޑިއާގައި ދެމުންދަނިކޮށް، އެދުވަހު މެންދުރު އެމްއެމްއޭގެ އިރުޝާދާއެކު ބީއެމްއެލް އިން ވަނީ އެނިންމުން އަނބުރާ ގެންގޮސްފައެވެ.

ނަމަވެސް ބީއެމްއެލްގެ އެ ނިންމުމާއެކު ބަޣާވާތަކުން ސަރުކާރު ވައްޓާލަން އުޅުނު މައްސަލައެއް ފުލުހުން ބަލަން ފަށާފައިވާ ކަމަށް އެ އިދާރާއިން ރޭ ވަނީ ބުނެފައެވެ.

އެގޮތުން ފުލުހުން ނެރުނު ބަޔާނެއްގައި ބުނީ، ސަރުކާރުގެ މައި ހިއްސާ އޮންނަ ބޭންކަކުން ސަރުކާރުގެ މަޝްވަރާއާ ޚިލާފަށް ދިވެހި ގިނަ ރައްޔިތުންނަށް ކުއްލި ސިހުމެއް ލިބޭ ފަދަ ނިންމުމެއް ނިންމި ވަގުތާ ދިމާކޮށް ސިޔާސީ ފަރާތްތަކުން ސަރުކާރުގެ މާލީ ހާލަތާ ބެހޭ ގޮތުން ނޫސްވެރިންގެ ބައްދަލުވުމެއް ބޭއްވި ކަމަށެވެ.

އެ ބައްދަލުވުން ބޭއްވި އެ ވަގުތު ސޯޝަލް މީޑިއާ އެތައް ސަތޭކަ ބޮޓް އެކައުންޓް ބޭނުންކޮށް ސަރުކާރު ވައްޓާލަން މަގުތަކަށް ނުކުތުމަށާއު އާންމު ހަމަޖެހުން ނަގާލުމަށް ގޮވައި، ގައުމުގެ މަސްލަހަތު ނަގާލުމަށް ހިތްވަރުދީ ހަދައިފައިވާތީ، އެކަމަކީ ގާނޫނީ ސަރުކާރެއް ޣައިރު ގާނޫނީކޮށް ބަދަލުކޮށްލުމަށް ކުރި ކަމެއް ކަމަށް ބެލުމުގެ ޖާގަ އޮތް ކަމަށް ބަޔާނުގައިވެއެވެ.

އެހެން ކަމުން، އެ މައްސަލަ ފުލުހުންގެ ފަރާތުން ތަހުގީގުކުރަން ފެށީ ކަމަށް ބަޔާނުގައިވެއެވެ.

އެފަދަ ތުހުމަތު ތަކެއް ރައީސުލްޖުމްހޫރިއްޔާ ޑރ މުހައްމަދު މުޢިއްޒު އާއި މަސްވެރިކަމާއިބެހޭ ވަޒީރު އަހުމަދު ޝިޔާމްވެސް ވަނީ ރޭގެ ޕީއެންސީ ޖަގަހަ ޖަލްސާގައި އެމްޑީޕީއަށް ކުރައްވާފައެވެ.

އެވާހަކަތަކަލާއި ގުޅިގެން ނޫސްވެރިއަކު ކުރި ސުވާލަށް ޖަވާބު ދެއްވަމުން ފައްޔާޒު ވިދާޅުވީ، ބީއެމްއެލްގެ އެ ނިންމެވުމަކީ އެމްޑީޕީއާއި މަޝްވަރާ ކޮށްގެން ނިންމި ނިންމުމެއް ނޫން ކަމަށާ އެ ބޭންކުގެ ބޯޑުގައި ތިއްބެވީ “ ކޮންބައެއްކަންވެސް ނޭނގޭ” ކަމަށެވެ.

އަދި ޑޮލަރުގެ މައްސަލައާއި ގުޅޭ ބޭންކުގެ ބޯޑުން ހޮނިހިރު ދުވަހު އެ ނިންމި ނިންމުމަށްފަހު، އެ ރޭ، އެ ބޯޑުގެ ޗެއަރޕާސަން އާއިޝަތު ނޫރައްދީން މަގާމުން ވަކި ކުރުމުން އެކަމާއި ގުޅުވައި ޓުވީޓެއް ކުރެއްވި ކަމަށް ފައްޔާޒު ވިދާޅުވިއެވެ.

“އެހެން ނަމަވެސް، އޮ ޑޮލަރާބެހޭ ވާހަކައެއްވެސް އަޅުގަނޑަށް ހިޔެއް ނުވޭ މިނިސްޓަރ އަމީރު ދެއްކެވި ހެންނެއް. އެއަށްވެސް ޖަވާބުދިނީ އަޅުގަނޑުމެން ޓުވިޓަރ ގައި. ޓުވިޓަރ ގައި އަޅުގަނޑު ޖަވާބު ދިނިން ވިސްނާލިންތޯ މިވަރުގެ ކުއްލި ބަދަލެއް ގެންނަން…”ފައްޔާޒު ވިދާޅުވުއެވެ.

އަޅުގަނޑަށްވެސް އެނގޭ، އެއަށް ގޮތްތަކެއް ހަދަންޖެހޭ ކަމެއް އެއީ. އެހެން ނަމަވެސް އޯވަރ ނައިޓް ކުރާވަރުގެ ކަމެއްނޫން އެއީ. ކުއްލިއަކަށް މިއަދު މި ނިންމަނީ މާދަމާއިން ފެށިގެން ކްރެޑިޓްކާޑުގަ ޑޮލަރު ބޭނުމެއް ނުކުރެވޭނެއޭ. އޭރު،  ކިޔަވަންގޮސް ކުދިން އެބަތިބި، ބޭސްފަރުވާއަށްގޮސް އެބަތިބި، ވެބްސައިޓް ތަކަށް ސޮފްޓްވެއަރ ތަކަށް މަންތުލީ ޕޭމަންޓް ދޭންޖެހޭ. އެއަށް މީހުންނަށް ވަގުތު ދޭންޖެހޭނެތާ؟ އެއަށްހައްލެއް.

ފައްޔާޒު އިސްމާޢީލް

ފައްޔާޒު ވިދާޅުވީ ބީއެމްއެލްގެ ނިންމުމާގުޅިގެން އެއިން ނުކުންނާނެ ނަތީޖާ މެދު ވިސްނުމަށް އެދި ކުރެއްވި ޓުވީޓް ފިޔަވައި އިތުރު ޓުވީޓެއް ނުކުރައްވާ ކަމަށެވެ.