ވަރލްޑްކަޕާ ގުޅުންހުރި އާޖެންޓީނާގެ މައްސަލަތަކެއް ފީފާއިން ބަލަން ފަށައިފި

ވަރލްޑް ކަޕް މުބާރާތުގެ ތެރޭގައި ފީފާގެ އެކި ގަވާއިދުތަކާ ޚިލާފު ޢަމަލުތަކެއް ހިންގާފައިވާ ކަމަށް ބެލެވޭތީ އާޖެންޓީނާގެ ޓީމާ ދެކޮޅަށް އަދަބީ ފިޔަވަޅު އެޅުމުގެ މައްސަލަތަކެއް ބެލުމުގެ މަސައްކަތް ފީފާއިން ފަށައިފިއެވެ.

ފީފާއިން ބަލަމުންދާ މައްސަލަތަކުގެ ތެރޭގައި ތަފާތުކުރުން އެކުލެވޭ ހަޅޭއްލެވުމާއި އިޝާރާތްތައް ކުރުމާއި އަދި ޓީމުގެ ފަރާތުން ފެނުނު ނުރަނގަޅު ސުލޫކާއި ސަލާމަތީ ޕްރޮޓޮކޯލްތަކާ ޚިލާފުވެފައިވާ މައްސަލަތައް ހިމެނެއެވެ. މީގެ އިތުރުން ސެމީ ފައިނަލުގައި 2-1 ގެ ނަތީޖާއިން އިންގްލެންޑް ބަލިކުރި މެޗަށް ފަހު "ފޯކްލޭންޑަކީ އާޖެންޓީނާގެ ތަނެއް" ކަމަށް ލިޔެފައިވާ ބެނާއެއް ކުޅުންތެރިން ދައްކާފައިވާ މައްސަލަ ވެސް ހިމެނެއެވެ. ފީފާގެ ގަވާއިދުގެ 13 ވަނަ މާއްދާގެ 2 ވަނަ ނަންބަރުގެ (ސ) ބުނާ ގޮތުން ކުޅިވަރުގެ މައިދާނަކީ ކުޅިވަރާ ގުޅުމެއް ނެތް ކަންކަން އިޝްތިހާރުކޮށް މުޒާހަރާކުރުމަށް ބޭނުންކުރެވޭނެ ތަނެއް ނޫނެވެ.

ފައިނަލް މެޗުގައި ސްޕެއިން އަތުން 1-0 އިން އާޖެންޓީނާ ބަލިވި މެޗު ނިމުމާ އެކު ހިނގި ހަމަނުޖެހުންތަކާ ގުޅޭ ގޮތުންވެސް ވަކި ކުޅުންތެރިންނާ ދެކޮޅަށް ދަނީ މައްސަލަ ބަލަމުންނެވެ. ސްޕެއިންގެ ކުޅުންތެރިންގެ ގައިގައި ތިން ފަހަރެއްގެ މަތިން އަތްލައި ކޮއްޕި ކަމުގެ ތުހުމަތުގައި ލިއޮނާޑޯ ޕަރޭޑޭސްއާ ދެކޮޅަށް ފީފާގެ ޑިސިޕްލިނަރީ ކޯޑުގެ 14 ވަނަ މާއްދާގެ 1 ވަނަ ނަންބަރުގެ (އައި) ދަށުން ހަމަލާދިނުމުގެ ތިން ދައުވާއެއް ވަނީ ހުށަހެޅިފައެވެ.

މެޗު ނިމުނު ވަގުތު ރޮޑްރީގެ ގައިގައި ޖެހި ނަހުއެލް މޮލީނާ އާއި ތިއާގޯ އަލްމާޑާ އަދި ކޯޗު ރޮބާޓޯ އަޔާލާއާ ދެކޮޅަށް ވެސް މައްސަލަ ބެލުމުގެ މަސައްކަތް ވަނީ ފެށިފައެވެ. ހަމައެހެންމެ ސްޕެއިންގެ މިޑްފީލްޑަރު ގާވީއާ ދެކޮޅަށް ވެސް ކުޅިވަރުގެ ރޫޙާ ޚިލާފު ޢަމަލެއް ހިންގި ކަމުގެ ވަކި މައްސަލައެއް ފީފާއަށް ހުށަހެޅިފައިވެއެވެ.

މި ހުރިހާ މައްސަލަތަކެއް ބެލުމަށް ފަހު ފީފާގެ ޑިސިޕްލިނަރީ ކޮމިޓީން ނިންމާ ނިންމުމެއް ފަހުން ހާމަކުރާނެ ކަމަށް ބެލެވެއެވެ.