އެމެރިކާ އިން ހުށަހެޅި ހަނގުރާމަ ހުއްޓާލުމުގެ އެއްބަސްވުން އިސްރާއީލުން ގަބޫލުކޮށްފި: ބްލިންކެން
އެމެރިކާ އިން ހުށަހެޅި ހަނގުރާމަ ހުއްޓާލުމުގެ އެއްބަސްވުން އިސްރާއީލުން ގަބޫލުކޮށްފިކަމަށް ބްލިންކެންވިދާޅުވެއްޖެއެވެ.
އެމެރިކާގެ ސްޓޭޓް ސެކްރެޓަރީ އެންޓަނީ ބްލިންކެން މިއަދު ވިދާޅުވެފައިވަނީ އެމެރިކާގެ އެހީތެރިކަމާއެކު ހުށަހަޅާފައިވާ ހަނގުރާމަ ހުއްޓާލުމާއި ރަހީނުން ދޫކޮށްލުމުގެ އެއްބަސްވުމަށް އިސްރާއީލުން އެއްބަސްވެފައިވާ ކަމަށެވެ. އަދި މި އެއްބަސްވުމަށް ހަމާސްއިން ވެސް އެއްބަސްވުމަށް އޭނާވަނީ ގޮވާލައްވާފައެވެ.
އެސޯސިއޭޓެޑް ޕްރެސް (އޭޕީ) ގެ ރިޕޯޓުގައިވާ ގޮތުން، ބްލިންކެން މިފަދައިން ވިދާޅުވެފައިވަނީ އިސްރާއީލުގެ ބޮޑުވަޒީރު ބެންޖަމިން ނެތަންޔާހޫއާއެކު 2 ގަޑިއިރާއި 30 މިނެޓުގެ ބައްދަލުވުމެއް ބޭއްވުމަށްފަހުގައެވެ.
"މިއަދު ބޮޑުވަޒީރު ނެތަންޔާހޫއާއެކު ބޭއްވުނު ވަރަށް ބިނާކުރަނިވި ބައްދަލުވުމެއްގައި އޭނާ އަހަރެންނަށް ޔަގީންކޮށްދެއްވީ އިސްރާއީލުން މި އެއްބަސްވުމަށް ތާއީދުކުރާކަން، ދެން އޮތް މުހިންމު ފިޔަވަޅަކީ ހަމާސްއިން 'އާނއެކޭ' ބުނުން"
ބްލިންކެން ނޫސްވެރިންނަށް ވިދާޅުވިއެވެ.
މި އެއްބަސްވުމުގެ ދަށުން ގައްޒާގައި ހިނގަމުންދާ ހަނގުރާމަ ހުއްޓާލުމާއި، ހަމާސްއިން ހިފަހައްޓާފައިވާ ރަހީނުން ދޫކޮށްލުމަށް މަގުފަހިވެގެންދާނެއެވެ. މިއީ މި ސަރަހައްދުގައި އަމާންކަން ގާއިމުކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
އެހެންނަމަވެސް މި ހުށަހެޅުމާ މެދު ހަމާސްއިން އަދިވެސް ވަކިއެއްޗެއް ނުބުނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
