ކުޑަގިރި, ފަތުރުވެރިންނަށް ވެސް ހާއްސަ މަންޒިލެއް!

ޒަމާނީ ވަސީލަތްކާއިއެކު ދަތުރު ގޮސް ކުރާނެ ގިނަ ކަންތައްތަކެއް, ކުޑަ ގިރީގައި ޤާއިމު ކުރުމުގެ ބޭނުމަކީ ދިވެހިންނަށާއި، ފަތުރުވެރިންނަށް ވެސް ހެޔޮ އަގެއްގައި ރާއްޖޭގެ ހިތްފަސޭހަ ކަމާއި ގުދުރަތީ ރީތިކަން ތަޖުރިބާ ކޮށްލެއްވޭނެ ގޮތެއް ފަހި ކޮށްދިނުން ކަމަށްް އަރބަންކޯއިން ބުނެފިއެވެ.

އަރބަންކޯއިން މިހެން ބުނެފައިވަނީ އެ ކޯޕަރޭޝަންއިން މިއަދު ނެރެފައިވާ ނޫސް ބަޔާނެއްގައެވެ.

އެގޮތުން މާލެ ސަރަހައްދުގައި ޕިކްނިކް އައިލެންޑެއް ވަކިން ހިއްކާ، މަސައްކަތް ފެށިތާ މިހާރު ކުޑަ ދުވަސްކޮޅެއް ވެފައިވާކަން ފާހަގަކޮށް، އަރބަންކޯއިން ބުނެފައިވަނީ ކުޑަގިރި އަކީ އާއްމުންގެ މެދުގައި މިހާރުވެސް ހަފުތާ ބަންދުތަކުގައި އާއިލާ އާއި ރަހުމަތްތެރިންނާއިއެކު އުފާވެރި ވަގުތުތަކެއް ހޭދަ ކުރުމަށް މަޤުބޫލު ރަށެއް ކަމަށެވެ.

މިއާއިއެކު ގިނަ ވަސީލަތްތަކާއި ފަސޭހަތަކާއިއެކު ރާވައި ތަރައްޤީ ކުރެވިފައިވާ މި ރަށް ބަލަހައްޓަމުން ގެންދާ އަރބަންކޯ އިން އަބަދުވެސް މަސައްކަތް ކުރަމުން ދަނީ، ކުޑަގިރިން ލިބިދޭ ހިދުމަތްތައް އިތުރުކޮށް، ފެންވަރު އިތުރަށް ރަނގަޅު ކުރުމަށް ކަމަށް އެ ކޯޕަރޭޝަން އިން ވަނީ ބުނެފައެވެ.

ދިވެހިންނަށް ކުޑަގިރިއަށް ހިލޭ ދަތުރު ދިއުމަށް ކަނޑައަޅައި، ޕްލޭން ކުރެވިފައިވީ ނަމަވެސް މާލެ ސަރަހައްދުގައި ދިރިއުޅޭ ބޭރު މީހުންނާއި ފަތުރުވެރިންނަށް ކަނޑައަޅާފައިވަނީ ކުޑަ ފީ އެއް ދައްކައިގެން އެ ރަށް ބޭނުން ކުރެވޭގޮތަށެވެ.

މިރަށުގައި މިހާރުވެސް ކެފޭ ރެސްޓޯރަންޓް، މޫދުގެ އެކި ކުޅިވަރުތަކާއި، ބީޗް ކުޅިވަރުތައް އަދި ޑައިވިންގ ސްކޫލް ފަދަ ޒަމާނީ ވަސީލަތްކާއި، ދަތުރު ގޮސް ކުރާނެ ގިނަ ކަންތައްތަކެއް ހުރެއެވެ.

މިފަދަ ހިދުމަތްތައް ކުޑަ ގިރީގައި ޤާއިމު ކުރުމުގެ އެންމެ ބޮޑު ބޭނުމަކީ ދިވެހިންނަށާއި، ހަފުތާ ބަންދު ނޫން ދުވަސްތަކުގައި ރަށަށް ޒިޔާރަތް ކުރާ ފަތުރުވެރިންނަށް ވެސް ހެޔޮ އަގެއްގައި ރާއްޖޭގެ ހިތްފަސޭހަ ކަމާއި ގުދުރަތީ ރީތިކަން ފަސޭހައިން ތަޖުރިބާ ކޮށްލެއްވޭނެ ގޮތެއް ފަހި ކޮށްދިނުން ކަމަށް އަރބަންކޯގެ ބަޔާނުގައި ވަނީ ބުނެފައެވެ.

މީގެ އިތުރުން ރާއްޖޭގެ ފަތުރުވެރިކަން ކުރިއެރުވުމަށް ސަރުކާރުން ކުރަމުން ގެންދާ ގިނަ މަސައްކަތްތަކުގެ ތެރެއިން، ކުދި އަދި މެދު ފަންތީގެ ވިޔަފާރިތައް ނުވަތަ ގެސްޓް ހައުސްތައް މިހާރު އިތުރުވެފައި ކަން ފާހަގަކޮށް، މާލެ ސަރަހައްދުގެ ގިނަ ރަށްތަކެއްގައި އެކި ފެންވަރުގައި ހިންގަމުން ދާ ގެސްޓް ހައުސްތަކަށް ކުޑަގިރި ވެފައި ވަނީ ބޮޑު އެހީ އަކަށް ކަމަށް އަރބަންކޯއިން ވަނީ ބުނެފައެވެ.

އެގޮތުން، މިހާރުވެސް މި ގެސްޓް ހައުސްތަކުގެ ފަތުރުވެރިން ކުޑަގިރިއަށް ޑޭ ޓްރިޕް އަށް ގެންދާއިރު، މި ގެސްޓް ހައުސްތަކުން ހިދުމަތް ދިނުމަށް ބޭނުންވާ ގިނަ ވަސީލަތްތަކެއް ހެޔޮ އަގެއްގައި އެއްތަނަކުން ލިބިގެން ދިޔުމުގެ އިތުރުން، ފަތުރުވެރިންނަށް ވެސް އައު މާހައުލެއްގައި ގިނަ ހަރަކާތްތަކެއްގައި ބައިވެރި ވުމުގެ ފުރުޞަތު ލިބިގެންދާ ކަމަށް އަރބަންކޯއިން ވަނީ ބުނެފައެވެ.

މިއާއިއެކު ޤަވައިދުން ހުޅުމާލެއިން ކުޑަގިރިއަށް ކޮންމެ ދުވަހަކުވެސް ކަނޑައެޅިފައިވާ ގަޑިތަކުގައި ފެރީ ދަތުރުތައް މިހާރުވެސް ކުރަމުން ދިޔުމުގެ ސަބަބުން ކުޑަގިރިއަށް ދިއުމަށާއި ވަސީލަތްތައް ބޭނުން ކުރުމަށް ގިނަ ފަސޭހަތަކެއް ގެސްޓް ހައުސް ވިޔަފާރިތައް ހިންގާ ފަރާތްތަކަށް ލިބިގެންދާ ކަމަށް އަރބަންކޯއިން ވަނީ ބުނެފައެވެ.

އަރބަންކޯއިން އިތުރަށް ފާހަގަކޮށްފައިވަނީ އެ ކޯޕަރޭޝަންގެ އަމާޒަކީ ކުޑަގިރިން އާއްމުންނަށް ދެމުންގެންދާ ހިދުމަތްތައް އަދިވެސް އިތުރުކޮށް ފަތުރުވެރިކަމުގެ ސިނާޔަތް ކުރިއެރުވުމަށް މިފަދަ ގެސްޓް ހައުސް ވިޔަފާރިތަކަށް ވެސް ގިނަ ލުއިތަކެއް ހޯދައިދިނުން ކަމަށެވެ.