މަސައްކަތްތެރިންގެ ހައްގުތައް ހިމާޔަތް ކުރުމަށް ދެ ބިލެއް އަވަހަށް ފާސްކުރުމަށް ފައްޔާޟް އެދިއްޖެ
މަސައްކަތްތެރިންގެ ހައްގުތައް ހިމާޔަތްކުރުމަށް މުހިންމު ދެ ބިލެއްގެ ބަހުސްކޮށް އަވަހަށް ފާސްކޮށްދިނުމަށް އިކޮނޮމިކް މިނިސްޓަރު ފައްޔާޒު އިސްމާއިލް އެދިލައްވައިފި އެވެ.
މަޖިލީހުގެ ރައީސް މުހައްމަދު ނަޝީދު ޓެގް ކުރައްވައި ފައްޔާޟް ކުރެއްވި ޓުވީޓެއްގައި އަވަސް ކޮށްދެއްވުމަށް އެދިލައްވާފައިވަނީ އިންޑަސްޓްރިއަލް ރިލޭޝަންސް އަދި އޮކިއުޕޭޝަނަލް ސޭފްޓީ ބިލެވެ.
ފައްޔާޒު ވިދާޅުވީ އެ ދެ ބިލަކީ މަސައްކަތްތެރިންގެ ހައްގުތައް ހިމާޔައްކުރުމަށް އަދި އިގްތިސޯދަށް ވަރައް މުހިއްމު ދެ ބިލް ކަމަށެވެ.
"މި އެޖެންޑާކޮއް ބަހުސްކޮއް ފާސްކުރުން އެއީ ކޮންމެހެން ކުރަންޖެހޭ ކަމެއް. ޤަރާރުތަކެކޭ އެއްފަދައިން މުހިއްމު."
އިންޑަސްޓްރިއަލް ރިލޭޝަންސް ބިލުގައި ވަނީ މަސައްކަތްތެރިންނާއި ވަޒީފާދޭ ފަރާތްތަކާ ދެމެދު އުފެދޭ ދެބަސްވުންތަކާއި މައްސަލަތައް މަޝްވަރާގެ އުސޫލުން ހައްލުކުރުމުގެ ހަރުދަނާ ނިޒާމެއް ގާއިމުކުރުމާއި މަސައްކަތްތެރިންނާއި ވަޒީފާދޭ ފަރާތްތަކާ ދެމެދު އުފެދޭ ދެބަސްވުންތަކާއި މައްސަލަތައް މަޝްވަރާގެ އުސޫލުން ހައްލުކުރުމުގެ ހަރުދަނާ ނިޒާމެއް ގާއިމުކުރާނެ ގޮތްތައް ކަނޑައަޅާފަ އެވެ. އަދި މަސައްކަތްތެރިންނަށް ގާނޫނުން ލިބިދޭ ހައްގުތައް ހިފެހެއްޓޭ ހާލަތުގައި އެފަދަ އަމަލުތަކަށް ޒިންމާވާ ފަރާތްތައް ޖަވާބުދާރީކުރެވޭނެ ނިޒާމެއް އެކަށައެޅުން ވެސް އެ ބިލުގައި ވެއެވެ.
ބިލްގެ އިބްތިދާއީ ބަހުސް މިދިޔަ މަހުގައި ފެށުމަށްފަހު އިތުރު މަސައްކަތެއް މަޖިލީހުން ކޮށްފައެއް ނުވެ އެވެ.
އޮކިއުޕޭޝަނަލް ސޭފްޓީ ބިލުގައި މަސައްކަތުގެ މާހައުލަކީ މަސައްކަތް ކުރާ ފަރާތްތަކާއި އެ މާހައުލުގައި ހަރަކާތްތެރިވާ އެނޫންވެސް ފަރާތްތަކަށް ސިއްހީ ގޮތުން ރައްކާތެރި މާހައުލެއްކަން ކަށަވަރުކުުމަށް ބޭނުންވާ އަސާސީ އުސޫލުތައް ކަނޑައަޅާފައިވާއިރު، މަސައްކަތު މާހައުލުން ލިބޭ އަނިޔާ އާއި ގެއްލުންތައް ރިޕޯޓުކޮށް، މައްސަލަ ބަލައި ފިޔަވަޅު އެޅޭނެ/ބަދަލުދެވޭނެ ނިޒާމެއް ގާއިމްކުރުން ވެސް ވެއެވެ.
މިދިޔަ އަހަރުގެ ނޮވެމްބަރު މަހު މަޖިލީހަށް ހުށަހެޅުނު އެ ބިލް މިހާރު އޮތީ ކޮމިޓީ މަރުހަލާގަ އެވެ.
ރައްޔިތުންގެ މަޖިލީހަށް "ބޭކާރު" ގަރާރު ތަކާއި ކުއްލި މައްސަލަތައް ލައި ބަހުސް ކުރަމުންދާ ކަމަށް ސަރުކާރަށް ތާއީދުކުރާ މެންބަރުން އަންނަނީ ބުނަމުންނެވެ. އަދި އެފަދަ ގަރާރު ތަކާއި މައްސަލަ ތަކުގެ ސަބަބުން، ސަރުކާރުގެ ސިޔާސަތުތައް ތަންފީޒުކުރުމަށް މުހިންމު، ބިލް ތަކުގެ މަސައްކަތް ލަސްވަމުންދާ ކަމަށް އެ މެންބަރުން އަންނަނީ ބުނަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
