އިމިގްރޭޝަން އިން އަޅާނުލި؛ ޗައިނާ މީހާ އެއާޕޯޓް ގައި ކޭންޕު ޖަހައިފި!
ވެލާނާ އިންޓަރނޭޝަނަލް އެއަރޕޯޓްގައި އެހެން މީހުންނަށް އުނދަގޫ ކޮށް ހަދާތީ ފުލުހުންގެ ބެލުމުގެ ދަށަށް ގެންދިޔުމަށްފަހު އިމިގްރޭޝަނާ ހަވާލުކުރި ޗައިނާ އަންހެން މީހާ ޕޮލިސް ސްޓޭޝަންގައި ބަނޑަހަ ޖަހައިގެން އުޅުމަށްފަހު އަނެއްކާވެސް އެއާޕޯޓް ގައި ދިރިއުޅެން ފަށައިފިއެވެ.
މިމަހުގެ 19 ވަނަ ދުވަހު އެ ޗައިނާ މީހާ ފުލުހުންގެ ބެލުމުގެ ދަށަށް ގެންގޮސްފައިވަނީ އެއަރޕޯޓްތެރޭގައި އެހެން މީހުންނަށް އުނދަގޫ ވާނެ ހެން އަޑުގަދަކޮށް ތަންތަނަށް ކުޅުޖެހުން ފަދަ ޢަމަލުތައް ހިންގަމުން ދަނިކޮށެވެ.
އޭރުވެސް އޭނާ އެއަރޕޯޓް ތެރޭގައި އުޅޭތާ ގިނަ ދުވަސްތަކެއް ވެފައިވާ ކަމަށް މައުލޫމާތު ލިބޭއިރު، އެހާ ގިނަ ދުވަހު އޭނާ އެއަރޕޯޓް ތެރޭގައި އުޅެފައިވަނީ ވިސާގެ މައްސަލަ ޖެހިގެން ކަމަށްވެސް މައުލޫމާތު ލިބެއެވެ.
މި މީހާ ފުލުހުންގެ ބެލުމުގެ ދަށަށް ގެންދިޔުމަށްފަހު އިމިގްރޭޝަން އާ ހަވާލުކޮށްފައިވާ ކަމަށް މިމަހު 19 ވަނަ ދުވަހު ފުލުހުންގެ އިދާރާއިން ވަނީ މައުލޫމާތު ދީފައެވެ.
ނަމަވެސް އިމިގްރޭޝަން ޑިޓެންޝަން ގައި އަންހެނުން ބައިތިއްބާނެ ތަނެއް ނުހުންނާތީ އަންހެން މީހާ އެތަނުގައި ނުބެހެއްޓޭނެ ކަމަށް ބުނެ ދޫކޮށްލާފައިވާ ކަމަށް މައުލޫމާތު ލިބިފައިވެއެވެ. މިފަދަ މީހުން ބެލެހެއްޓުމުގެ ޒިންމާ ހަވާލުކުރެވިފައިވާނީ އިމިގްރޭޝަނައާއެވެ.
އެފަހުން އޭނާ މާފަންނު ޕޮލިސް ސްޓޭޝަނުގައި ކޭންޕު ޖަހައިގެން ގާތްގަނޑަކަށް 6 ދުވަހަށްވުރެ ގިނަ ދުވަހު އުޅެފައިވާ އިރު އިމިޤްރޭޝަނުން އޭނާގެ ކަންކަމާ ހަވާލުވެފައެއްނުވެއެވެ.
އަންހެން މީހާ ޕޮލިސް ސްޓޭޝަންގައި އުޅޭ މައްސަލަ އާއި ގުޅިގެން މިމަހު 26 ވަނަ ދުވަހު ފުލުހުންގެ މީޑިއާ އޮފިޝަލް ވިދާޅުވީ، އެމީހާ އަކީ ފުލުހުންގެ ބެލުމުގެ ދަށުގައި ނުވަތަ ބަންދެއްގައިވެސް ހުރި މީހެއް ނޫން ކަމަށެވެ.
"އޭނާ ޕޮލިސް ސްޓޭޝަންގައި އުޅޭތީ ތަކުރާރުކޮށް ނަސޭހަތްދީ އެގޮތަށް ކަންތައް ނުކުރުމަށް އެދިފައި ވާނެ. އޭނާ އަކީ އޮކްޓޯބަރ 19 ވަނަ ދުވަހު އިމިގްރޭޝަން އާއި ހަވާލު ކޮށްފައިވާ މީހެއް." މީޑިއާ އޮފިޝަލް ވިދާޅުވެފައިވެއެވެ.
އެއަށްފަހު އަންހެން މީހާ އަނެއްކާވެސް އެއާޕޯޓަށްގޮސް، އެތަނުގައި "ކޭންޕު" ޖަހައިގެން އުޅެން ފަށާފައިވާ ކަމަށް 'ވޮއިސް' އަށް ވަނީ މައުލޫމާތު ލިބިފައެވެ.
މި މައްސަލައިގައި އިމިގްރޭޝަން ގެ ބަހެއް ލިބޭތޯ ތަކުރާރުކޮށް މަސައްކަތް ކޮށްވެސް އަދި މިހާތަނަށްވެސް އެ އިދާރާއިން ޖަވާބެއް ދީފައެއް ނުވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
