އެމްޑީޕީގެ ކެމްޕެއިނަށް ހުރަސް އަޅާނަމަ ރާއްޖޭގެ އެއްވެސް ރަށެއްގައި އިދިކޮޅަށް ކެމްޕެއިނެއް ނުކުރެވޭނެ: ފައްޔާޒު

ކުރިއަށް އޮތް ރިޔާސީ އިންތިހާބަށް އެމްޑީޕީން ކުރަމުންދާ ކެމްޕެއިނަށް ހުރަސް އަޅާނަމަ ރާއްޖޭގެ އެއްވެސް ރަށެއްގައި އިދިކޮޅު ފަރާތްތަކަށް ކެމްޕެއިން ނުކުރެވޭނެކަމަށް އެމްޑީޕީގެ ޗެއަރޕާސަން އަދި އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ރިޔާސީ ކެންޕެއިނަށް ފުވައްމުލަކު ސިޓީއަށް ވަޑައިގަތުމުން އިދިކޮޅު ފަރާތްތަކުން ވަނީ އިހްތިޖާޖު ކޮށް، ރައީސް ޞާލިހު އިސްތިއުފާ ދެއްވުމަށް ގޮވާލާފައެވެ. ފުވައްމުލަކުގެ އިތުރުން އެހެން ރަށްރަށަށްވެސް ރައީސް ޞާލިހު ވަޑައިގަތުމުން އިދިކޮޅުން އިހްތިޖާޖު ކޮށް އިސްތިއުފާ އަށް ގޮވާފައި ވެއެވެ.

އެކަމާއި ގުޅިގެން ފުވައްމުލަކު ސިޓީގައި ރޭ ބޭއްވި ޖަލްސާގައި ވާހަަކަދައްކަވަމުން ފައްޔާޒު ވިދާޅުވީ ރިޔާސީ އިންތިހާބުގެ ވޯޓު ލުމަށް މިހާރު 40 ދުވަހަށް ވެފައިވާ ކަމަށެވެ. އެހެންކަމުން އިދިކޮޅު ފަރާތަކަށް ނަސޭހަތެއް ދެއްވަން ބޭނުންވާ ކަމަށް ވިދާޅުވެ، ފައްޔާޒު ވަނީ، އިދިކޮޅުުން ރިޔާސީ ކެންޑިޑޭޓެއް ދެއްކުމަށްފަހު ކެންޕެއިނާއިގެން ކުރިއަށް ދިޔުމަށް އެދިވަޑައިގެންފައެވެ.

ހަގީގަތަކީ ރައީސް ޞާލިހާއި ޗެލެންޖުކޮށްލަން ނުކެރިގެން، ކެންޑިޑޭޓެއް ދައްކަން ނުކެރިގެން، ދައްކާހާ، ބޭކާރު މަންޒަރުތަކެއް މި ދައްކަވަނީ. ތިހެން ނަހައްދަވާ. އެއްވެސް ބިރުވެރިކަމެއް މިގައުމަކު މިއަދަކު ނެތް. އަޅުގަނޑުމެން 2018 ގައި، އެބޭފުޅުން ގެ ވެރިކަމުގައި އިންތިހާބު ކުރަންޖެހުނީ ނުހަނު ބިރުވެރިކަމާ. ވާނެ ގޮތެއް ނޭނގި ކޮންމެ ދުވަހަކު މަގު މައްޗަށް ނުކުންނަނީ. މިއަދު އެ ބޭފުޅުން (ޕީޕީއެމް/ޕީއެންސީ) އެ ނުކުންނަވަނީ އެއްވެސް ބިރުވެރިކަމެއް ނެތި.

ފައްޔާޒު އިސްމާއިލް

މިއާއެކު ފައްޔާޒު ވަނީ އިދިކޮޅުންވެސް އެމްޑީޕީގެ ކެމްޕެއިނަށް ހުރަސް ނާޅައި، ކެންޕެއިން ކުރުމަށް ތަކުރާރުކޮށް އެދިލައްވާފައެވެ. އަދި އެމްޑީޕީގެ ކެންޕެއިނަށް ހުރަސްއަޅާނަމަ ރާއްޖޭގެ އެއްވެސް ސަރަހައްދެއްގައި އިދިކޮޅު ފަރާތްކަށްވެސް ކެމްޕެއިން ނުކުރެއްވޭނެ ކަމަށްވެސް ފައްޔާޒު ވިދާޅުވި އެވެ.

"ކެމްޕެއިނަށް ހުރަސް ނާޅާ، ކެނޑިޑޭޓެއް ދައްކަވާފައި ދެން ކެމްޕެއިން ކުރައްވާށޭ. ރައީސް (ސާލިހު) އަކީ ވަރަށް ހިތްތިރި ބޭފުޅެއް. އަޅުގަނޑުމެންނަކީ އެހާ ހިތްތިރި ބައެއް ނޫން. އަޅުގަނޑު މެންގެ ކެމްޕެއިނަށް ތާ އަބަދު އެގޮތަށް ހުރަސް އަޅަންޏާމުން ދިވެހިރާއްޖޭގެ އެއްވެސް ރަށެއްގައި، އެބޭފުޅުންނަށް (އިދިކޮޅަށް) ކެމްޕެއިނެއް ނުކުރެވޭނެ. އެހެންވީމާ އެކަން ހުއްޓާލަން މިހާރުން މިހާރަށް އެބޭފުޅުންނަށް މި ދަންނަވާލަނީ. ކެންޕެއިން ކުރައްވާށޭ. އަޅުގަނޑު މެންގެ ކެމްޕެއިނަށް ހުރަސް ނާޅުއްވާށޭ.

ފައްޔާޒު އިސްމާއިލް

ފައްޔާޒު އިތުރަށް ވިދާޅުވީ، އެމްޑީޕީ ގެ އަޒުމެއް ނުގުޑާނެ ކަމަށެވެ. އަދި އެ "އޮޑިއެއް ނުފެތޭނެ" ކަމަށާ، އެ ޕާޓީ ރޫޅާވެސް ނުލެވޭނެ ކަމަށެވެ.