ރޮމުން، ކޮއްކޮ ކިޔައިދިނީ ބޭބެ މަރާލިގޮތް: "މިއީ ދައްކަން ފަސޭހަ ވާހަކައެއް ނޫން"

އައްޑޫސިޓީ މަރަދޫފޭދޫގައި ހިންގި މާރާމާރީއެއްގައި މަސްތުގެ ޙާލަތުގައި ހުރެގެން އެއްބަނޑު އެއްބަފާ ބޭބެއަށް ތޫނުއެއްޗަކުން ހަމަލާދީ މަރާލިކަމަށް ހުސެއިން މަވާޒް އިޢްތިރާފް ވެއްޖެއެވެ.

މިމައްސަލައިގެ ދަޢުވާގެ އަޑުއެހުމެއް މިއަދު ކްރިމިނަލް ކޯޓުގައިވަނީ ކުރިއަށް ގެންގޮސްފައެވެ.

މިއަދު ކްރިމިނަލް ކޯޓުގައި ކުރިއަށް ގެނގޮސްފައިވަނީ ދައުވާއަށް ޖަވާބުދާރީ ވުމެވެ. މިމައްސަލައިގެ ދައުވާ އިއްވައި މީގެ ކުރިން ވަނީ ދައުވާ ސާފު ކޮށްދީފައެވެ.

މިއަދުގެ އަޑު އެހުމުގައި ދައުވާ ލިބެ މުވާޒް ވާހަކަދައްކަމުން ބުނެފައިވަނީ އޭނާ އެކަމަށް އިޢްތިރާފް ވާ ކަމަށާއި ބޭނުންވަނީ ވީހާވެސް ކުޑައަދަބެއް ކަމަށެވެ. އަދި މައްސަލައިގައި ކުރިއަށް ދާން ބޭނުންވަނީ މައްސަލައިގެ ތަހްޤީޤަށް ދީފައިވާ އިޢްތިރާފުގެ ބަޔާނާއި އެއްގޮތައް ކަމަށެވެ.

އިތުރަށް މަވާޒް ބުނެފައިވަނީ އެވާހަކަތަކަކީ ދައްކަން އުނދަގޫ ވާހަކަތަކެއް ކަމަށެވެ.

މަވާޒްގެ މައްޗަށް ކޮށްފައިވަނީ ގަސްދުގައި މީހަކު މެރުމުގެ ކުށުގެ ދައުވާއެވެ. މައްސަލަ ބައްލަވާ ކްރިމިނަލް ކޯޓުގެ އިސް ގާޒީ އާދަމް މުޙައްމަދު ވަނީ މަވާޒްގެ އިޢްތިރަފަކީ ސައްޚަ އިޢްތިރަފެއްތޯ ބެލުމަށްކުރަން ޖެހޭ ސުވާލުތައް ކުރައްވައިފައެވެ.

އެސުވާލުތަކަށް މަވާޒް ޖަވާބު ދާރީ ވެފައިވަނީ ރޮމުންނެވެ.

އެ ކަންތައް ހިނގައިދިޔަ ގޮތް ކިޔައިދެމުން އޭނަ ބުނެފައިވަނީ އެކަން ހިނގައިދިޔައީ 31 މެއި 2023 ގައި ކަމަށެވެ. އަދި އެރޭ އޭނާއާއި އޭނާގެ ބޭބެ ރެސްޓޯރެންޓެއްގެ ތެރެއިން ދިމާވި ކަމަށާއި އެތަނުން ބޭބެގެ ފޯނު ނަގައިގެން ގެންދިޔަ ކަމަށް އޭނާ ބުނެފައިވެއެވެ.

އަދި އޭގެ ފަހުން މަސްތުވާ ބާވަތެއް ކަމުގައިވަ ބޮގަރު ބަލައި ގެއަށް ދިޔަ ކަމަށާއި ގެއަށް ދިޔަ ވަގުތު ބޭބެ ފޯނާއި މެދު ސުވާލު ކުރިކަމަށެވެ. އަދި ފޯނުގެ ސިމް އާއި އެކު ފޯނު ވިއްކާލި ކަމަށް އޭނާ ބުނުމުން މައްސަލަ ގޯސްވެ ދެމީހުންގެ ދެމެދުގައި މާރާމާރީއެއް ފެށުނު ކަމަށް މަވާޒް ބުނެފައިވެއެވެ. އޭނާ ހުރީ އޭރުވެސް ރާބޮއެ މަސްތުވެގެން ކަމަށް ޝަރީޢަތުގެ މަޖިލީހުގައި އެނާ އިޢްތިރާފް ވެފައި ވެއެވެ.

މަވާޒް ބުނެފައިވަނީ އޭނާ އެނާގެ ބޭބެއަށް ހަމަލާދިނީ ތިން އިންޗި ބައި ދިގު މިންހުރި ކަތުރެއްގެ ތިލައަކުން ކަމަށާއި، ހަމަލާ އަމާޒުވީ ވާއަތު ކަރާއި ދިމާލުން ތިރިއަށް މެއަށްކަމަށެވެ.

މަވާޒް ބުނެފައިވަނީ އެކަންކަން ހަނދާނުގައި އެބަހުރިކަމަށެވެ. އޭނާ ބުނީ އޭނާގެ މަންމަ އައިސް އޭނާގައިގައި ތަޅަންވެސް ތެޅި ކަމަށާއި ކުރެވުނު ކަންތަކާއި މެދުގައި ބިރެއް އިޙްސާސް ކުރެވުނު ކަމަށެވެ.

މަވާޒް ބުނީ އޭނާގެ ބޭބެ ނިޔާވިކަން އެނގުނީ އޭގެ ހާދިސާ ހިނގި ދުވަހުގެ އަނެއް ދުވަހު ކަމަށާއި، ބޭބެގެ ގަޔަށް އަޅަން ލޭ ބޭނުންވެގެން އުޅުނު ވަގުތު ލޭ ހޯދުމުގެ މަސައްކަތްވެސް ކުރި ކަމަށް އޭނާ ބުނެފައިވެއެވެ.

މަވާޒް  ބުނެފައިވަނީ  އޭނާގެ ރައްޓެއްސަކު ބޭބެ ނިޔާވި ވާހަކަ ބުނުމުން ހަތަރު ފަހަރު ސުވާލު ކުރެވުނު ކަމަށެވެ. އެ ޚަބަރު ލިބުމުން އަމިއްލައަށް މަރުވާން ބޭނުންވެ އެވާހަކަ ބުނިކަމަށްވެސް މަވާޒް ބުނެފައިވެއެވެ.

މީގެއިތުރުން މަވާޒް ބުނެފައިވަނީ އޭރު އޭނާގެ ބައްޕަ ގުޅައިފައި އޭނާއަށް މަޢާފްކުރި ކަމަށް ބުނި ކަމަށާއި މަވާޒް ގަސްދުގައި މީހަކު ނުމަރާނެ ކަން އެނގޭ ކަމަށް ބައްޕަ ބުނި ކަމަށް މަވާޒް ބުންޏެވެ.

މައްސަލައިގެ އަޑު އެހުމުގެ ތެރެއިން ދައުލަތުން ވަނީ މި މައްސަލައިގައި އޭނާއާއެކު ވެފައިވާ އިއުތިރާފު އެއްބަސްވުމެއް ކޯޓަށް ހުށައަޅާފައެވެ.

މަވާޒްގެ މައްޗަށް 2019 ވަނަ އަހަރު ކުރި ރޭޕްކުރިކަމުގެ ކުށުގެ ދައުވާއެއް ސާބިތުވާކަމަށް 13 އޯގަސްޓު 2023ގައި ވަނީ ކްރިމިނަލް ކޯޓުން ޙުކުމެއް އައިސްފައެވެ. އެކަމާ ގުޅިގެން އޭނާގެ އަދަބުގެ ދަރަޖަ މަތިކޮށްފައިވާއިރު، ދައުލަތުން ވަނީ އިއުތިރާފާއި، ކުށް ހިނގާދިޔަ ގޮތަށް ބަލާއިރު، އޭނާގެ މައްޗަށް ކަނޑައަޅަން ދައުލަތުން އެދޭ އަދަބާ ގުޅޭ ތަފްސީލުތައް ހިއްސާ ކުރައްވާފައެވެ.

އެގޮތުން މަވާޒްގެ އިޢުތިރާފު އެއްބަސްވުން ބަލައިގަންނަ ޙާލަތުގައި އޭނާގެ މައްޗަށް އަންނާނީ 12 އަހަރާއި 6 މަސް ދުވަހުގެ ޖަލު ޙުކުމެއްކަމަށް ދައުލަތުގެ ވަކީލު ވިދާޅުވިއެވެ.

މައްސަލައިގައި މަވާޒް ތަމްސީލް ކުރައްވާ ވަކީލް ވިދާޅުވީ އޭނާ އަމިއްލައަށް ފުލުހަށް ހާޒިރުވުމާއި، ތަހުޤީޤަށް އެއްބާރުލުން ދީފައިވުމާއި، އެކަންކަމަށް ބަލާއިރު، އޭނާއަށް ލުއި އަދަބެއް ދޭން ދިފާއުން އެދޭ ކަމަށެވެ.

ހެކި ހޯދުމަށްވެސް ފުލުހުންނަށް ފަސޭހަވެގެން ދިޔައީ އޭނާ ދިން އެއްބާރުލުމާއި އެކުގައިކަމަށާއި، ކަތުރު އޮތްތަންވެސް ދެއްކީ އޭނާކަމަށް ދިފާއީ ވަކީލު ވިދާޅުވިއެވެ.

އިޢުތިރާފު އެއްބަސްވުން ދަމަހައްޓަން ބޭނުންވޭތޯ މަވާޒާއި ގާޒީ ސުވާލުކުރެއްވަމުން ގާޒީ ވިދާޅުވީ، އިޢުތިރާފު އެއްބަސްވުމާއެކު ކުރިއަށްދާން ބޭނުންވާނަމަ، ކަނޑައެޅޭނީ އެ އެއްބަސްވުމުގައި އޮތް އަދަބެއް ކަމަށެވެ.

އެއަށްފަހު އަވަސްނިޔާގެ އަޑުއެހުމެއް ކުރިއަށް ގެންދަވައި ގާޒީ ވަނީ އޭނާ ވެފައިވާ އިޢުތިރާފަކީ ސައްޙަ އިޢުތިރާފެއްކަމަށް ކަނޑައަޅުއްވާފައެވެ. އަދި އޭނާގެ މައްޗަށް ކޮށްފައިވާ އެނގިހުރެ މީހަކު މެރުމުގެ ކުށުގެ ދައުވާ ސާބިތުވާކަމަށް ގާޒީ ވަނީ ނިންމަވާފައެވެ.

ގާޒީ ވިދާޅުވީ، އަދަބު ކަނޑައެޅުމަށްޓަކައި އިޢުތިރާފު އެއްބަސްވުން ދަމަހައްޓަން ބޭނުންވާކަން ނުވަތަ ނޫންކަން ދެން އޮންނަ އަޑުއެހުމެއްގައި އަންގަންވާނެ ކަމަށާއި، އެއަށްފަހު އަދަބާ ގުޅޭގޮތުން ދައްކަން ހުރި ވާހަކައެއް ދެއްކެވުމަށް ފުރުސަތު ދެއްވުމަށްފަހު ޙުކުމް ކުރައްވާނެ ކަމަށް ގާޒީ ވިދާޅުވިއެވެ.