ވާރޭގެ ސަބަބުން ލިބޭ ގެއްލުން ކުޑަ ކުރެވޭނެހެން މަގުތައް ތަރައްގީ ކުރަން ވަނީ ރޭވިފަ: ރައީސް ޑރ.މުއިއްޒު

ވިއްސާރައިގެ ސަބަބުން ލިބޭ ގެއްލުން ކުޑަ ކުރެވޭނެހެން މަގުތައް ތަރައްގީ ކުރަން ސަރުކާރުން ރާވާފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުއިއްޒު ވިދާޅުވެއްޖެއެވެ.

މިއަދު ފެނުގެ އަސަރުކޮށް ގެއްލުން ލިބުނު ބައެއް ގެތަކަށް ކުރެއްވި ޒިޔާރަތަށް ފަހު ނޫސްވެރިންނާއި ބައްދަލުކޮށް ވާހަކަފުޅު ދައްކަވަމުން އެމަނިކުފާނު ވިދާޅުވީ މާލޭ ގެ އިތުރުން ރާއްޖޭ ގެ އެހެން ރަށް ރަށުގެ މަގުތައްވެސް ރަނގަޅު ފެންވަރަކަށް ހެދުމަށް ނިންމަވާފައިވާ ކަމަށެވެ.

އެމަނިކުފާނު ވިދާޅުވީ ހުރިހާ މަގެއް ހަދާއިރު އަޑީގައި ފަލަ ހޮޅި ތަކަކާއި ވަރުގަދަ ޕަންޕިން ނިޒާމެއް ލައި، ވަރަށް ވަރުގަދަ ސްޓޯމް ވޯޓާ ނިޒާމެއް ގާއިމު ކުރާނެ ކަމަށެވެ. އޭރުން މިފަދަ ހާލަތެއް ކުރިމަތި ވިޔަސް ގެތައް ސަލާމަތްވެ މީހުންގެ މުދަލާ ފުރާނަ އާއި ދިރިއުޅުމަށް ކުރާ މަސައްކަތްތަކާއި ވިޔަފާރިތަައް ސަލާމަތް ކުރެވޭނެ ކަމަށް ރައީސް ޑރ.މުއިއްޒު ވިދާޅުވިއެވެ.

"މިއަށް ވުރެ މާ ބޮޑު ތަނުން ރަނގަޅު ކުރުން އަޅުގަނޑުމެންގެ މަސައްކަތް ރޭވިފައި ހުރި ގޮތަކީ. އެއީ މާލޭގަ. ހަމަ އެގޮތަށް ރަށް ރަށުގައި ވެސް އެމަސައްކަތް ކުރެވޭނެ. "

ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ ޑިސާސްޓާ މެނޭޖް މެންޓް ގައި އެހީވުމުގެ ބައިގެ ކެޕޭސިޓީ ވަރުގަދަ ކުރުންވެސް އެބައޮތް ކަމަށެެވެ. މިގޮތުން އެމަޖެންސީގައި ގޭގެއަށް ދޭން ޖެހޭ އެހީތެރި ކަމާއި މީހުންނަށް ދޭން ޖެހޭ އެހީތެރި ކަމާއި ތަކެތި ފޯރު ކޮށްދިނުމަށް ވަގުތީ ހިޔާ އާއި މިނޫންވެސް އެހެނިހެން ކަންކަން ވެސް މިހާރަށް ވުރެ ރަނގަޅުކުރުމަށް ޑިސާސްޓާ މެނޭޖެމަންޓް ގެ ނިޒާމް ވަރުގަދަ ކުރުންވެސް ކުރިއަށް ގެންދަވާނެ ކަމަށް އެމަނިކުފާނު ވިދާޅުވިއެވެ.

ރައީސް ޑރ.މުއިއްޒު ވިދާޅުވީ މިއަދު މި ލިބުނު ގެއްލުމުގެ ސަބަބުން މީހުނަށް އެހީތެރި ވުމުގެ މަސައްކަތް ކަމާ ގުޅޭ ހުރިހާ ވުޒާރާ ތަކަކާއި ހުރިހާ ފަރާތްތައް ބައިވެރިވެގެން ވަރަށް ބާރު މިނުގައި ކުރިއަށް ދާކަމަށެވެ.

ވިއްސާރައިގެ ސަބަބުން މިރެއިން މިރެޔަށް ބަދަލު ކުރަން ޖެހޭ ގޭގެ ބަލަމުން ދާ ކަމަށާއި 96 ގެޔެއްގެ މީހުން މާލެއިން ވަގުތީ ހިޔާ އަށް ބަދަލު ކުރަން ޖެހޭ ކަމަށް ޑިސާސްޓާ މެނޭޖްމަންޓް އިން މައުލޫމާތު ދޭ ކަމަށް ވެސް އެމަނިކުފާނު ވިދާޅުވިއެވެ.