ފާޑުކިޔުންތަކަށް ފައްޔާޒުގެ ރައްދު: މި ގައުމުގެ ހައްގުގައި އެމްޑީޕީން އަޑު އުފުލާނެ.

މި ގައުމުގެ ހައްގުގައި އެމްޑީޕީން އަޑު އުފުލާނެ ކަމަށް ވިދާޅުވެ އެމްޑީޕީގެ ސިލްސިލާ މުޒާހަރާތަކާއި ގުޅިގެން އިލެކްޝަންސް ކޮމިޝަނާއި ހިއުމަންރައިޓްސް ކޮމިޝަނުން ނެެެރުނު ބަޔާނަށް އެމްޑީޕީގެ ޗެއާޕާސަން ފައްޔާޒް އިސްމާއީލް ރައްދު ދެއްވައިފި އެވެ.

މީގެ ހަފްތާއެއްހާ ދުވަސްކުރީން ފެށިގެން އެމްޑީޕީގެ ސަޕޯޓަރުން ދަނީ މާލޭގައި ސިލްސިލާ މުޒާހަރާތަކެއް ކުރަމުންނެވެ. މި މުޒާހަރާތަކުގެ ތެރެއިން އިހަކަށް ރޭ އޮތް މުޒާހަރާގައި އެމްޑީޕީގެ އެކްޓިވިސްޓް މަރިޔަމް ޒުބައިރު ވަނީ ރައީސް މުއިއްޒުގެ ދަރިކަލުންނާއި ގުޅޭގޮތުން ދޮގު ވާހަކަތަކެއް ދައްކަވާފަ އެވެ.

ސިޔާސީ ކަންކަމުގެ ތެރޭގައި ކުޑަކުދީންގެ ކަރާމާތަށް އަރައިނުގަތުމަށް އިލްތިމާސްކޮށް އިލެކްޝަންސް ކޮމިޝަނާއި ހިއުމަންރައިޓްސް ކޮމިޝަނުން ރޭ ވަނީ ބަޔާން ނެރެފަ އެވެ.

އެކަމާއި ގުޅިގެން އެމްޑީޕީން ވެސް މިއަދު ވަނީ ބަޔާނެއް ނެރެފަ އެވެ. އެ ބަޔާން ރި-ޕޯސްޓް ކުރައްވާ ފައްޔާޒު ކުރެއްވި ޕޯސްޓެއްގައި ވިދާޅުވީ ރައީސް މުއިއްޒުގެ ސަރުކާރުން ރާއްޖޭގެ އެތައް ރައްޔިތުންނެއްގެ ހައްގުތަކަށް އަރައިގަނެއްޖެ ކަމަށާ އެތައް ބައެއްގެ އެތައް ހައްގެއް ނިގުޅައިގެންފި ކަމަށެވެ.

‏އަދި އެ ހައްގުތައް ހޯދަން ދާނެ އެއްވެސް މަހުކަމާއެއް މިހާރު މި ގައުމަކު ނެތް ކަމަށް ވިދާޅުވި އެވެ. ރައްޔިތުންނަށް އެކަން ކޮށްދޭނެ މުއައްސަސާއެއް، ކޮމިޝަނެއް ނެތް ކަމަށާ އަބަދުވެސް ހައްގު ހޯދަން ނުކުންނަ މީހުންނަށް، ބާރުވެރިކަމުގައި ފުދިގެން ތިބޭ މީހުން ފުރައްސާރަ ކުރާނެ ކަމަށް ފައްޔާޒު ވިދާޅުވި އެވެ.

‏”ދައުލަތް ހިންގަން ތިބި މީހުންގެ ޖަރީމާތައް ފޮރުވަން ބައިހަދާފަ ނުކުމެ ފުރައްސާރަ ކުރިޔަސް އެމްޑީޕީ މެންބަރުން ފަހަތަށް ޖެހުމެއް ނެތް،” އެމްޑީޕީގެ އެކްޓިސްޓުގެ ވާހަކަތައް ދިފާއު ކުރައްވާ ފައްޔާޒު ވިދާޅުވި އެވެ.

‏ފައްޔާޒު ވަނީ މި ގައުމުގެ ހައްގުގައި އެމްޑީޕީން އަޑު އުފުލާނެ ކަމަށް ވިދާޅުވެފަ އެވެ.

ސިޔާސީ ކަންކަމުގެ ތެރެއަށް މައުސޫމް ކުޑަކުދީންގެ ނަން ގެނެސް އެކުދީންގެ ކަރާމާތަށް އަރައިގަތުން ދީނީ އިލްމުވެރިންނާއި ސިޔާސީ ބޭފުޅުންނާއި އާންމުންގެ ގިނަ ބަޔަކު ވެސް ދަނީ ކުށްވެރި ކުރަމުންނެވެ.