ވަޢުދުވީ ގޮތަށް ކޮމަންޑޫ ކައިރީއޮތް ދިގުވެލިދޫގައި އެއާޕޯޓެއް އަޅައިދޭނަން: ރައީސް ޑރ. މުޢިއްޒު
ލިޔުންތެރިޔާ
ޚަދީޖާ އަރުފާ
ރިޔާސީ އިންތިހާބުގެ ކެންޕެއިން ތެރެއިން، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ވަޢުދުވެވަޑައިގެންފައިވާ ގޮތަށް، ކޮމަންޑޫ ކައިރީ އޮންނަ ދިގުވެލިދޫގައި އެއާޕޯޓެއް އަޅުއްވާނެ ކަމަށް އެމަނިކުފާނު ވިދާޅުވެއްޖެެއެވެ.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު ށ. ކޮމަންޑޫ ރައްޔިތުންނާއި ބައްދަލު ކުރެއްވުމަށް މިއަދު އެރަށުގައި ބޭއްވި ޖަލްސާގައި ވާހަކަ ދައްކަވަމުން އެމަނިކުފާނު ވިދާޅުވީ، އެ ރަށުގައި ފަށާފައި ހުއްޓިފައި، ނޫނީ މަސައްކަތް ލަސްވެފައި ހުރި މަޝްރޫޢުތައް ކުރިއަށް ގެންދިޔުމަކީ ރަށުގެ ރައްޔިތުން މިވަގުތައް އެންމެ ބޭނުންވާ އެއް ކަން ކަމަށެވެ.
އެގޮތުން އެ ރަށުގެ ބަނދަރުގެ މަސައްކަތާއި، ފެނާއި ނަރުދަމާ އާއި، ގޮނޑުދޮށް ހިމާޔަތް ކުރުމާއި ބޯހިޔާވަހިކަމުގެ މަޝްރޫޢު އެމަނިކުފާނު ފާހަގަކުރެއްވިއެވެ. މީގެ އިތުރުން ކޮމަންޑޫއާ މަތި ކޮމަންޑޫއާ ގުޅާލުމަކީވެސް އެރަށު ރައްޔިތުންގެ އެދުމެއް ކަމަށާ، އެ ހުވަފެން ހަގީގަތަކަށް ހަދައިދެއްވާނެ ކަމަށް އެމަނިކުފާނު ވިދާޅުވި އެވެ. އަދި އެކަންކަން މި އަހަރު ތެރޭގައި ކުރައްވާނެ ކަމަށްވެސް ވިދާޅުވި އެވެ.
އަދި ހަމައެއާއެކީގައި އެންމެ ގިނަ ޒަމާން ވަންދެން އިންތިޒާރު ކުރާ މަޝްރޫޢު އަކީ އެއާޕޯޓް. ދިގު ވެލިދޫ ގައި އެއާޕޯޓްއެއް އަޅައި ދިނުމަކީ އަޅުގަނޑު ކެންޕެއިން ތެރޭގައި، ވެފައި ހުރި ގިނަ ވަޢުދު ތަކުގެ ތެރޭގައި ހިމެނޭ އެންމެ މުހިންމު ވަޢުދު. އަޅުގަނޑު ވަޢުދުވީ ގޮތަށް އެކަން ކުރާނަން.
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
މިކަން ކަމުގެ އިތުރުން، ސިއްހީ ނިޒާމް ވަރުގަދަ ކުރުމާއި، ތަޢުލީމީ ނިޒާމުގެ ތެރޭގައި ހިމެނޭ ކަންކަމާއި، ކޮމަންޑޫގައި އައިސް ޕްލާންޓެއް ގާއިމް ކުރުމުގެ މަސައްކަތް ވެސް ކުރިއަށް ގެންދިޔުމަށް ނިންމަވާފައިވާ ކަމަށް ރައީސް ވިދާޅުވި އެވެ.
އެހުރިހާ ކަމެއްވެސް ކުރިއަށް ގެންދަވާނެ ކަމުގެ ޔަގީންކަން ދެއްވަމުން ރައީސުލްޖުމުހޫރިއްޔާ ވަނީ ހުރިހާ ކަމެއްވެސް ކުރިއަށް ގެންދަވާނީ ރައްޔިތުންނާއި މަޝްވަރާ ކޮށްގެން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
