ތުރުކީ ވިލާތަށް ބާރުގަދަ ބިންހެލުންތަކެއް

ތުރުކީގެ އެންމެ ބޮޑު އާބާދީ އޮންނަ ސިޓީ އިސްތަންބޫލަށް ބާރު ގަދަ ބިންހެލުންތަކެއް އައިސްފިއެވެ. ތުރުކީގެ ކާރިސާ އަދި ކުއްލި ނުރައްކަލުގެ ހާލަތު މެނޭޖްކުރާ އިދާރާ (އޭއެފްއޭޑީ) އިން ބުނާ ގޮތުގައި މި ބިންހެލުން އައީ ރިކްޓަރ ސްކޭލްގައި 6.2 އެވެ.

ބިންހެލުން އައި ވަގުތު، އެތައް ބަޔަކު އިމާރާތްތަކުން ނުކުމެ މަގުމައްޗަށް އެއްވެފައިވާ މަންޒަރު ވީޑިއޯ ތަކުން ފެނިގެން ދިޔައެވެ.

ޖަރުމަނުގެ ޖިއޯސައިންސް ރިސަރޗް ސެންޓަރ (ޖީއެފްޒެޑް) އިން ބުނާ ގޮތުގައި މި ބިންހެލުމުގެ ބާރުމިނުގައި 6.02 މެގްނެޓިޔުޑް ހުއްޓެވެ. އަދި ބިންހެލުން އުފެދުނު ފުންމިނަކީ ބިމުގެ އަޑިން 10 ކިލޯމީޓަރު (6.21 މޭލު) ކަމަށްވެސް އެ މަރުކަޒުން ބުނެފައިވެއެވެ.

މި ބިންހެލުމަށްފަހުވެސް އިތުރު ބިންހެލުންތަކެއް އައި ކަމަށް އެ ސަރަހައްދުގައި ދިރިއުޅޭ މީހުންނާ ހަވާލާދީ މީޑިއާތަކުން ރިޕޯޓް ކޮަށްފައިވެއެވެ.

އިސްތަންބޫލަކީ 16 މިލިއަނަށްވުރެ ގިނަ މީހުން ދިރިއުޅޭ، ތުރުކީގެ އެންމެ ބޮޑު އާބާދީ އޮންނަ ސިޓީއެވެ.

މި ބިންހެލުމުން މީހުންނަށް ނުވަތަ ތަންތަނަށް ލިބުނު ގެއްލުމެއްގެ މަޢުލޫމާތު މިހާތަނަށް ލިބިފައެއް ނުވެއެވެ.

6 ފެބްރުއަރީ 2023 ގައިވެސް 7.8 މެގްނެޓިޔުޑްގެ ބާރުމިނުގައި ތުރުކީއަށް ބިންހެލުމެއް އައެވެ. އަދި އޭގެ ގަޑިއިރުތަކެއް ފަހުން އިތުރު ބޮޑު ބިންހެލުމެއް އައިސް، ތުރުކީގެ ދެކުނާއި ދެކުނު އިރުމަތީގައި ހިމެނޭ 11 ސަރަޙައްދަކަށް ބޮޑެތި ގެއްލުންތަކެއް ލިބުނެވެ.

މި ދެ ބިންހެލުމުގެ ސަބަބުން އެތައް ހާސް އިމާރާތަކަށް ވަނީ ގެއްލުން ލިބިފައެވެ. އަދި 53،000 އަށްވުރެ ގިނަ މީހުންގެ ފުރާނަ ގެއްލުނުއިރު އަވަށްޓެރި ސީރިއާގެ އުތުރު ސަރަޙައްދުތަކުގައި މި ކާރިސާގެ ސަބަބުން އިތުރު 6،000 މީހުން މަރުވިއެވެ.