ޣައްޒާއަކީ މި ޒަމާނުގެ އެންމެ ލާއިންސާނީ ޖަލު ކަމަށް އެރުދޮޣާން ސިފަކޮށްފި

ޣައްޒާއަކީ މިހާރު ދުނިޔެ ދެކެމުންދާ އެންމެ އިންސާނިއްޔަތާ ޚިލާފު އަދި ލަދުވެތި އިސްތިޢުމާރީ ޖަލު ކަމަށް ތުރުކީވިލާތުގެ ރައީސް ރަޖަބް ޠައްޔިބް އެރުދޮޣާން ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އދ. ގެ ޢާންމު މަޖިލީހުގައި ތަޤުރީރު ކުރައްވަމުންނެވެ.

އދ. ގެ މައި މަރުކަޒުގައި ވާހަކަފުޅު ދައްކަވަމުން، ބައްޕައެއް އަދި ކާފައެއްގެ ހައިސިއްޔަތުން ޣައްޒާގެ ހިތްދަތި ޙާލަތު ބަޔާންކުރައްވައި އެރުދޮޣާން ވިދާޅުވީ، ޣައްޒާއަކީ މިއަދު ދުނިޔޭގައިވާ ކުޑަކުދީންގެ އެންމެ ބޮޑު ޤަބުރުސްތާނު ކަމަށެވެ. އަދި ދުނިޔޭގެ ނިސްބަތުން ހަށިގަނޑުގެ ގުނަވަންތައް ބުރިވެފައިވާ ކުޑަކުދީން އެންމެ ގިނައީ ވެސް ޣައްޒާގައި ކަމަށް އެމަނިކުފާނު ހިތާމައާއެކު ފާހަގަކުރެއްވިއެވެ. މީގެ އިތުރުން، ވޭތުވެދިޔަ ތިން އަހަރު ދުވަހުގެ ތެރޭގައި އިސްރާއީލުގެ ޢަސްކަރިއްޔާއިން 74,000 އަށް ވުރެ ގިނަ މީހުން ޝަހީދުކޮށްލާފައިވާ ކަމަށް ވެސް އެމަނިކުފާނު ވިދާޅުވިއެވެ.

ތުރުކީގެ ރައީސްގެ ތަޤުރީރުގައި އިތުރަށް ވިދާޅުވީ، ޣައްޒާގެ ރައްޔިތުން އަދިވެސް ހުއްޓުމެއް ނެތި ގެންދަނީ ވެއްޓިފައިވާ ޢިމާރާތްތަކާއި ގާކުނޑިތަކުގެ ދަށުން އެ މީހުންގެ ލޯބިވާ އަނބިދަރީންނާއި، ފިރީންނާއި އަދި މައިންބަފައިންގެ ހަށިތައް ހޯދައި ނެރުމުގެ މަސައްކަތް ކުރަމުން ކަމަށެވެ. ހަމައެއާއެކު، ހުޅަނގު އައްސޭރީގައި ޔަހޫދީ ވަޒަންވެރީން ހިންގަމުންދަނީ ތާރީޚުގައި ވެސް ދުވަހަކު ދެކެފައި ނުވާ ފަދަ އަނިޔާވެރި ޢުދުވާނާއި ބިރުވެރިކަން ކަމަށާއި، މިސްކިތްތަކާއި ފައްޅިތަކަށް މުސްލިމުންނާއި ކްރިސްޓިއަނުން ވަނުމަށް ވެސް ޔަހޫދީން ހުރަސްއަޅަމުންދާ ކަމަށް އެރުދޮޣާން ވިދާޅުވިއެވެ.

މީގެއިތުރުން، އެމެރިކާއިން ވިސާ ނުދިނުމުގެ ސަބަބުން ފަލަސްޠީނުގެ ރައީސް މަޙްމޫދު ޢައްބާސަށް އދ. ގެ ޢާންމު މަޖިލީހަށް ވަޑައިނުގެންނެވުނު މައްސަލަ ވެސް އެރުދޮޣާންގެ ވާހަކަފުޅުގައި ވަނީ ވަރަށް ބޮޑަށް ކުށްވެރިކުރައްވާފައެވެ. އެމަނިކުފާނު ވިދާޅުވީ ފަލަސްޠީނުގެ އަޚުންނާއި އުޚުތުންނާ ދެކޮޅަށް ހިންގަމުންދާ މި އަނިޔާވެރި ޢަމަލުތަކުގެ ސަބަބުން މުޅި އިންސާނިއްޔަތުގެ ޟަމީރު ކަތިލެވިފައިވާ ކަމަށެވެ.

އިސްރާއީލުން ހިންގަމުންދާ ލާއިންސާނީ ޢަސްކަރީ ޙަމަލާތައް ހުއްޓުމެއްނެތި ކުރިއަށްދާ މި ދަނޑިވަޅުގައި، ބައިނަލްއަޤުވާމީ މައިދާނުގައި ފަލަސްޠީނުގެ ރައްޔިތުންގެ ޙައްޤުތައް ހިމާޔަތްކޮށްދިނުމަށް ގޮވައިލާ އަޑުތައް އަންނަނީ ދުވަހެއް ދުވަހަކަށް ގަދަވަމުންނެވެ.