ފައްޔާޒު، ޑިމޮކްރެޓްސްއަށް: މިހާލަތަށް ދިޔައީ އަމިއްލަ އެދުމަށް “އިބޫ ނޫން ގޮތެއް” ހޯދަންއުޅުނީމާ، ޒިންމާ ނަގަންޖެހޭ!

ރާއްޖޭގެ ހާލަތު މި ހިސާބަށް ވެއްޓުނީ ކުރީގެ ރައީސް "އިބޫ ނޫން ގޮތެއް" ހޯދަން ކަމަށް ބުނެ ޑިމޮކްރަޓްސް ޕާޓީން ކުރި މަސައްކަތުގެ ސަބަބުން ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ރޭ އޮތް، އެމްޑީޕީގެ ގައުމީ މަޖިލީހުގައި ވާހަކަ ދައްކަވަމުން ފައްޔާޒް ވިދާޅުވީ ، ކުރީގެ ރައީސް އިބްރާޙީމް މުހައްމަދު ޞާލިހުގެ ވެރިކަން ވެއްޓުނީ، އެމަނިކުފާނުގެ ސަރުކާރާއި ގުޅުވައި އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒުއާއި މި ސަރުކާރުގެ އިސްބޭފުޅުން ހެއްދެވި “ދޮގު ތަކުގެ” ސަބަބުން ކަމަށެވެ. އަދި އެ “ދޮގުތައް” ރައްޔިތުން ގަބޫލުކޮށް މި ސަރުކާރު ގެނައީ ކަމަށް އޭނާ ވިދާޅުވިއެވެ.

މިއާއެކު ފައްޔާޒު ވަނީ، އެ “ދޮގުތައް” ރައްޔިތުން ގަބޫލުކުރީ އެ ޕާޓީގެ ތެރޭގައި ތިބި ބައެއް ބޭފުޅުން އެކަން ތެދު ކުރުމުން ކަމަށް ވިދާޅުވެ، އެމްޑީޕީން ވަކިވެގެން ޑިމޮކްރެޓްސްގެ ނަމުގައި ވަކި ޕާޓީއެއް އުފެއްދެވި، އެ ޕާޓީގެ މެންބަރުންނަށް ބަހުގެ ހަމަލާތަކެއް ރައްދު ކުރައްވާފައެވެ.

އެ (ދޮގުތައް) ގަބޫލުކުރަންޖެހުނީ، އެއްވެސް ޝައްކެއްނެތް ގޮތުގައި، އަޅުގަނޑުމެންގެ ތެރޭގައި ތިބި، އަޅުގަނޑުމެންގެ ވަރުގަދަ ބަޔަކު، އެ ދޮގުތައް އެގޮތަށް ދިވެހި ރައްޔިތުންނަށް ގަބޫލުކޮށްދިނީތީވެ. މިއަދު މި ގައުމު މި އޮތް ހާލަތަށް ވެއްޓުމުގެ އެންމެ ފުރިހަމަ ޒިންމާއެއް ނަންގަވަންޖެހޭ ބޭފުޅުންނަކީ އެއީ. (ޑިމޮކްރެޓްސް) އަމިއްލަ ބޭނުންތަކަށް, އަމިއްލަ އެދުމަށް “އިބޫ ނޫން ގޮތެއް”ދިވެހި ރައްޔިތުންނަށް ހޯއްދަވައި ދެއްވީ. އާދެ މިއަދު އެކަމުގެ ހިތާމައިގެ ފެށުން ދިވެހި ރައްޔިތުން ތަހައްމަލު ކުރަމުން މި ދަނީ. ކުރިއަށް އޮތީ ބަނަ ދުވަސްތަކެއް."

ފައްޔާޒު އިސްމާޢީލް

ފައްޔާޒް ވިދާޅުވީ މިހާރު، މުވައްޒަފުންނަށް މުސާރަ ނުދެވި, އަމިއްލަ ވިޔަފާރިތައް ހުއްޓޭ ހިސާބަށް ގޮސްފައިވާ ކަމަށެވެ. އެހެން ނަމަވެސް، އެމްޑީޕީން ތިބީ ރައްޔިތުން އާ އެކޭ ބުނި ސަރުކާރަށް ފުރުސަތު ދީގެން ކަމަށާ، އަވަށްޓެރި ސްރީލަންކާއަށް ވީގޮތް ރާއްޖެއަށް ވާން ބޭނުން ނުވާ ކަމަށެވެ.

"އަޅުގަނޑުމެން ބޭނުމެއް ނޫން މުލިއާގޭގެ ޖަކޫޒީއަށް ދިވެހި ރައްޔިތުން އަރައިގެން ތިބޭތަން ބަލާކަށެއް. އަޅުގަނޑުމެން ބޭނުމެއް ނޫން މުލިއާގޭގައި ހުރި ކަރޯކޭ ސިސްޓަމްތައް ނަގައިގެން ދިވެހި ރައްޔިތުން ލަވަ ކިޔާތަން ބަލަން ތިބޭކަށެއް. އާދެ އަޅުގަނޑުމެން ބޭނުމެއް ނޫން ދިވެހިރާއްޖޭގެ ރައީސުލްޖުމްހޫރިއްޔާއަކު ފުރައިގެން ގޮސް ލަންކާގެ ހިމާޔަތަށް ދާކަށެއް،"

ފައްޔާޒު އިސްމާއީލް

ފައްޔާޒް އިތުރަށް ވިދާޅުވި ރިޔާސީ އިންތިހާބުގައި ރައްޔިތުން އެމްޑީޕީއަށް ނޫނެކޭ ބުނުމުން އޮޕޮސިޝަންގެ ގޮތުގައި އެ ނިންމުމަށް އެ ޕާޓީން އިހްތިރާމްކޮށްގެން ތިބި ކަމަށެވެ. އަދި އޮޕޮސިޝަންގައި ތިބެގެންވެސް ގައުމުގެ ކަންކަން ރަނގަޅުކުރަން މަސައްކަތް ކުރުމުގައި އެމްޑީޕީ ދެމި އޮންނާނެ ކަމަށެވެ.