އިސްރާއީލުން ކުއްޖަކު ގެއްލިގެން ފަލަސްތީނުގެ އަވަށެއްގައި ހަމަނުޖެހުން ހިންގާ އެކަކު ޝަހީދުކޮށްލައިފި

އިސްރާއީލުން ކުއްޖަކު ގެއްލިގެން ފަލަސްތީނުގެ އަވަށެއްގައި ހަމަނުޖެހުން ހިންގާ އެކަކު ޝަހީދުކޮށްލައިފިއެވެ.

އިސްރާއީލުގެ މީޑިއާތަކުން ރިޕޯޓްކުރާ ގޮތުގައި ހުކުރު ދުވަހު ގެއްލުނު އިސްރާއީލުގެ 14 އަހަރުގެ ކުއްޖަކު ހޯދުމަށް އެތައް ސަތޭކަ ވޮލަންޓިއަރުންނެއް ފުލުހުންނާއި އިސްރާއީލުގެ ސިފައިންނާ ގުޅިގެން ދަނީ މަސައްކަތް ކުރަމުންނެވެ. އަދި ފުލުހުންނާއި އިސްރާއިޅުގެ ބައެއް ޢާންމު ރައްޔިތުން ވަނީ ރަމަﷲ ކައިރީގައި އޮންނަ އަލް މުޣައްޔިރު އަވަށަށް ވަދެ، ހިފާފައިވާ ހުޅަނގު އައްސޭރީގައި ވަނީ ބޮޑު ހަމަ ނުޖެހުންތަކެއް ހިންގާފައެވެ.

މިއަދު ހެނދުނުގެ ވަގުތެއްގައި އަލް މުޣައްޔިރު އަވަށުން ހަމަނުޖެހުން ހިނގާފައިވާ ކަމަށް ރިޕޯޓްކޮށްފައިވާއިރު، އިސްރާއީލު ފުލުހުންނާއި ޢާންމު ރައްޔިތުން ވަނީ، ފަލަސްތީނުގެ ބައެއް މީހުން ޒަޚަމްކޮށްފައި ކަމަށް ފަލަސްތީނުގެ ވަފާ ނޫސް އެޖެންސީން ބުނެއެވެ. އެގޮތުން މިހާތަނަށް 25 އަށް ވުރެ ގިނަ ފަލަސްތީނުގެ ރައްޔިތުން ޒަޚަމްކޮށްލާފައިވާއިރު އެކަކު ވަނީ ޝަހީދު ކޮށްލާފައެވެ.

ނިރުބަވެރި އިސްރާއީލުން އަލް މުޣައްޔިރު އަވަށުގައި ހިންގި ހަމަނުޖެހުންތަކުގައި ޝަހީދުކޮށްލާފައިވަނީ ޢުމުރުން 26 އަހަރުގެ ޖިހާދް އަލް އަލިޔާ ނަމަކަށް ކިޔުނު ޒުވާނެކެވެ. މި ޒުވާނާ ޝަހީދުކޮށްލާފައިވަނީ ބަޑި ޖަހާފައެވެ. ބަޑި ޖެހީ އިސްރާއިލު ސިފައިންކަމެއް ނުވަތަ ހަމަނުޖެހުން ހިންގި ޢާންމު ރައްޔިތުން ކަމެއް ސާފެއް ނުވެއެވެ.

އިސްރާއީލު ސިފައިން ވަނީ ޝަހީދުވި މީހާގެ ހަށިގަނޑު އޭނާގެ އުފަން ރަށަށް ގެންދިޔަ ކޮންވޯއީއަށް ބަޑިޖަހާ، އާއިލާއަށް، ޖަނާޒާއެއް ބާއްވަންވެސް ހުރަސް އަޅާފައެވެ.

އިސްރާއީލުގެ ޢަންމު ރައްޔިތުން ވަނީ، ފަލަސްތީނުގެ އަލްމުޣައްޔިރުގެ އިތުރުން ދޫމާއާއި، ރަމަالله އަދި ނަބްލޫސްގެ އިރުދެކުނުގެ އެހެން ރަށްތަކަށް ވެސް ހަމަލާދީފަ އެވެ. ދޫމާގައި އިސްރާއީލު ސިފައިން ބަލަން ތިއްބާ، އިސްރާއީލު މީހުން، ބައެއް ގެތަކާއި ކާރުތަކުގައި އަލިފާން ރޯކޮށްފައިވާ ކަމަށް އެ ސަރަހައްދުގެ މީހުން އަލްޖަޒީރާއަށް ކިޔައިދިނެވެ. އަދި ފަލަސްތީނުގެ ރެޑް ކްރެސެންޓުން ބުނި ގޮތުގައި މަދުވެގެން އަށް މީހެއްގެ ގައިގައިވަނީ އަލިފާންވެސް ޖެހާފައެވެ.

ގެއްލިގެން ހޯދަމުންދިޔަ އުމުރުން 14 އަހަރުގެ އިސްރާއީލު ކުއްޖާގެ ހަށިގަނޑު މަރާލާފައި އޮއްވާ، ދޫމާއިން ފެނިފައިވާކަމަށް އިސްރާއީލު ސިފައިން ވަނީ ރިޕޯޓުކޮށްފައެވެ.