އަންޗެލޮޓީ ނޫނެކޭ ބުނުމުން، ކުރީގެ ކޯޗު ސްކޮލާރީ ގެނައުމަށް ބްރެޒިލް އިން މަސައްކަތްފަށައިފި

ބްރެޒިލްގެ ގައުމީ ފުޓްބޯޅަ ޓީމުގެ ކޯޗަކަށް އެ ގައުމުގެ ކުރީގެ ކޯޗު ލުއިސް ފިލިޕޭ ސްކޮލާރީ ގެނައުމަށް ބްރެޒިލްގެ ފުޓުބޯޅަ ފެޑެރޭޝަނުން މަސައްކަތް ފަށައިފި އެވެ.

އުމުރުން 75 އަހަރުގެ ސްކޮލާރީ އެންމެ ފުރަތަަމަ ބްރެޒި ގައުމީ ޓީމާއި ހަވާލުވީ 2001 ވަނަ އަހަރު އެވެ. އެއަށްފަހު ޖަޕާނާއި ސައުތު ކޮރެއާގައި 2002 ވަނަ އަހަރު ބޭއްވުނު ވޯލްޑްކަޕް މެޗަކުން ބަލިނުވެ، ބްރެޒިއަށް ކާމިޔާބުކޮށްދިނެވެ. އަދި ޖެހިގެން އައި އަހަރު ޕޯޗުގަލްގެ ގައުމީ ޓީމާއި ހަވާލުވުމަށް ފަހު 2004 ވަނަ އަހަރު ބޭއްވުނު ޔޫރޯ ފުޓްބޯޅަ މުބާރާތުގެ ފައިނަލަށް އެޓީމު ގެންގޮސްދީފައިވެއެވެ.

2012 ވަނަ އަހަރު ދެވަނަ ފަހަރަށް ބްރެޒިލްގެ ގައުމީ ޓީމާއި ހަވާލުވުމަށް ފަހު 2013 ވަނަ އަހަރު ބޭއްވުނު ފީފާ ކޮންފެޑެރޭޝަން ކަޕުގެ ފައިނަލުގައި 3-0 ގެ ނަތީޖާއަކުން ސްޕެއިން ބަލިކޮށް މުބާރާތުގެ ތަށި އެޓީމަށް ކާމިޔާބުކޮށްދިނެވެ. އަދި 2014 ވަނަ އަހަރު ބްރެޒިލްގައި ބޭއްވުނު ވޯލްޑްކަޕް ފުޓްބޯޅަ މުބާރާތުގެ ސެމީ ފައިނަލުގައި ނެދަލޭންޑްސް އަތުން 3-0 ގެ ނަތީޖާއަކުން ބަލިވި މެޗަށްފަހު އެއަހަރު ސްކޮލާރީ ފެނިގެން ގޮސްފައިވަނީ ބްރެޒިލްގެ ގްރޭމިއޯގެ ބެންޗުންނެވެ. އަދި މިވަގުތު އޭނާ ހުރީ ބްރެޒިލްގެ އެތްލެޓިކޯ މިނެއިރޯގެ ކޯޗުކަމުގެ މަގާމުގަ އެވެ.

ބްރެޒިލުން ސްކޮލާރީ ގެނައުމަށް މަސައްކަތް ފެށީ އިޓަލީގެ ތަޖުރިބާކާރު ކޯޗު ކާލޯ އެންޗެލޯޓީ ހޯދުމަށް ކުރި މަސައްކަތް ނާކާމިޔާބު ވުމުންނެވެ. 2022 ވަނަ އަހަރު ގަތަރުގައި ބޭއްވުނު ވޯލްޑްކަޕުގެ ނާކާމިޔާބީއާއެކު އެންޗެލޯޓީ ކޯޗަކަށް ގެނައުމަށް ބްރެޒިލްގެ ފެޑެރޭޝަނުން އޭނާއާއެކު އަނގަބަހުން އެއްބަސްވުމަކަށް އައެވެ. ނަމަވެސް މިދިޔަ ޑިސެމްބަރު މަހުގެ ތެރޭގައި އެންޗެލޯޓީ ވަނީ އޭނާ ރެއާލް މެޑްރިޑާއި އެކު ހަދާފައިވާ އެއްބަސްވުން 2026 ވަނަ އަހަރުގެ ޖޫން މަހުގެ ނިޔަލަށް އިތުރުކޮށްފިއެވެ.

ބްރެޒިލަށް 2002 ވަނަ އަހަރުގެ ފަހުން ވޯލްޑް ކަޕް ކާމިޔާބުކުރެވިފައިނުވާއިރު، ސްކޮލާރީގެ ކޯޗުކަމުގައި 2014 ވަނަ އަހަރުގެ ސެމީ ފައިނަލަށް ދިޔަ ފަހުން އެ ގައުމަށް މުބާރާތުގެ ކުއާޓާ ފައިނަލް ފަހަނައަޅައި ކުރިއަށް ދެވިފައެއް ނުވެއެވެ.