އީރާނުގެ ޔުނިވަރސިޓީއެއްގެ ކައިރީގައި ހުރި މިސްކިތަކަށާއި ގޭސް ސްޓޭޝަނަކަށް ހަމަލާދީފި

އިސްރާއީލާއި އެމެރިކާގެ އަސްކަރީ ބާރުތަކުން އީރާނުގެ ވެރިރަށް ތެހެރާނަށް ދިން ހަމަލާތަކެއްގައި، އެ ރަށުގެ މަޝްހޫރު ޝަރީފް ޔުނިވަރސިޓީ އޮފް ޓެކްނޮލޮޖީ ކައިރީގައި ހުރި މިސްކިތަކަށާއި ގޭސް ސްޓޭޝަނަކަށް ބޮޑެތި ގެއްލުންތަކެއް ލިބިއްޖެއެވެ.

މި ހަމަލާއަކީ ދީފައިވަނީ ރޭގެ ވަގުތެއްގައެވެ. އެ ގޮތުން، މިހަމަލާއަކީ އެ ސަރަހައްދުގެ އާންމު ހިދުމަތްތަކަށް އަމާޒުކޮށް ދެވުނު ހަމަލާއެއް ކަމަށް ރިޕޯޓްތައް ބުނެއެވެ.

އީރާނުގެ މީޑިއާތަކުން ރިޕޯޓްކޮށްފައިވާ ގޮތުގައި، މި ހަމަލާގެ ސަބަބުން ޔުނިވަރސިޓީގެ ގޭސް ސްޓޭޝަނަށް ވަނީ ވަރަށް ބޮޑަށް ގެއްލުން ވެފައެވެ. މީގެ ސަބަބުން އެ ސަރަހައްދުގެ ގޭހުގެ ހިދުމަތް މެދުކެނޑި، އާންމު ދިރިއުޅުމަށް ވަނީ ދަތިތަކަކާ ކުރިމަތިލާން ޖެހިފައެވެ.

މީގެ އިތުރުން، ތަސްނީމް ނިއުސް އެޖެންސީން ހާމަކޮށްފައިވާ ފޮޓޯތަކުން ފެންނަ ގޮތުގައި ޔުނިވަރސިޓީގެ މިސްކިތުގެ ކުޑަދޮރުތަކާއި ސީލިންގަށް ވަނީ ބޮޑެތި ގެއްލުންތަކެއް ލިބިފައެވެ. މިސްކިތުގެ އެތެރޭގެ ބައެއް ތަންތަން ވެއްޓި، ބިއްލޫރިތައް ތަޅައިގެން ގޮސްފައިވާ މަންޒަރު އެ ފޮޓޯތަކުން ފެންނަން ހުއްޓެވެ.

އީރާނު ސަރުކާރުގެ ތަރުޖަމާނަކު މައުލޫމާތު ދެއްވި ގޮތުގައި، ފެބުރުވަރީ 28 ގައި ހަނގުރާމަ ފެށުނީއްސުރެ އެމެރިކާ އާއި އިސްރާއީލުގެ ބާރުތަކުން އަންނަނީ އީރާނުގެ ތައުލީމީ މަރުކަޒުތަކަށް އަމާޒުކޮށް ހަމަލާދެމުންނެވެ. މިގޮތުން މިހާތަނަށް ދިހަވަރަކަށް ޔުނިވަރސިޓީތަކާއި، ސްކޫލްތަކާއި، އަދި ދިރާސާކުރާ މަރުކަޒުތަކަށް ހަމަލާދީފައިވާ ކަމަށް އޭނާ ވިދާޅުވިއެވެ.

މި ހަމަލާތަކާ ގުޅިގެން ސަރަހައްދީ މަސްލަހަތު އިތުރަށް ގޯސްވެފައިވާއިރު، މަދަނީ ތަންތަނަށް ލިބެމުންދާ ގެއްލުންތަކުގެ ސަބަބުން އިންސާނީ އެހީތެރިކަމަށް ބޭނުންވާ މިންވަރު ވަނީ އިތުރުވެފައެވެ. އީރާނުން ދަނީ މި ހަމަލާތަކަކީ ބައިނަލްއަގުވާމީ ގާނޫނުތަކާ ހިލާފަށް ދެވޭ ހަމަލާތަކެއް ކަމަށް ބުނަމުންނެވެ.