މެސީ ޤައުމީޓީމަށް ކުޅުނު ވަދާއީ މެޗް ނިންމާލީ މޮޅަކުން

ދުނިޔޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާގެ ގޮތުގައި ގިނަބަޔަކު ގަބޫލްކުރާ އާޖެންޓީނާގެ ލިއޮނެލް މެސީ ޤައުމީޓީމަށް ކުޅުނު ވަދާއީމެޗް މޮޅަކުން ނިންމާލައިފިއެވެ.

ބުއެނޯސް އައިރީސްގައި ކުޅުނު މެސީގެ ވަދާއީ މެޗްގައި ނިކުތީ ބެނިންއާ ދެކޮޅަށެވެ. މި މެޗުން އާޖެންޓީނާ މޮޅުވީ 3-0 ގެ ނަތީޖާއަކުންނެވެ. އުމުރުން 39 އަހަރުގެ މެސީ ވަނީ މިމެޗްގައިވެސް މޮޅު ކުޅުމެއް ދައްކައި ލަނޑެއް ޖަހައި އަދި އިތުރު ދެ ލަނޑު ޖެހުމަށް ފުރުސަތު ތަނަވަސްކޮށްދީފައެވެ.

މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފެށިގެން ކުޑަވަގުތުކޮޅެއްގެ ތެރޭގައި މެސީ ދިން ބޯޅައަކުން ނިކޮލަސް އޮޓަމެންޑީ ވަނީ އާޖެންޓީނާއަށް ކުރިހޯދައިދީފައެވެ. އޭގެ ފަހުން ނިކޯ ޕާޒް ޖެހި ހިތްގައިމު ލަނޑަށް ވެސް މަގުފަހިކޮށްދިނީ މެސީއެވެ.

މެޗުގެ ފަހު ލަނޑު ފެނިގެންދިޔައީ ލިބުނު ޕެނަލްޓީއަކުން މެސީ ކާމިޔާބުކުރި ލަނޑުންނެވެ. މެޗަށްފަހު މެސީވަނީ އޭނާގެ ޓީމުގެ ކުޅުންތެރިންނާ އަދި ބެނިންގެ ކުޅުންތެރިންނާ ސަލާމްކޮށްފައެވެ. އަދި ދަނޑަށް ހާޒިރުވެތިބި އެންމެނާ އަތުގެ އިޝާރާތުން ވަނީ ވަދާއީ ސަލާމްކޮށްފައެވެ.

މެސީގެ ކެރިއަރުގައި އާޖެންޓީނާގެ ޤައުމީ ޓީމަށް ހޯދައިދިން އެންމެ ބޮޑު ކާމިޔާބީއަކީ 2022 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިނުމެވެ. އަދި ހަމަ އެހެންމެ މެސީ ވަނީ އާޖެންޓީނާއަށް 2021 ގެ ކޮޕާ އެމެރިކާ އަދި 2022 ގެ ފިނަލިސިމާ ވެސް އޭނާ ވަނީ ކާމިޔާބުކޮށްފައެވެ. މެސީގެ ވަދާއީމެޗަށް ބުއެނޯސް އައިރީސްގެ މަޝްހޫރު ޕްލާޒާ ޑެ ލާ ރެޕަބްލިކާ ސަރަހައްދަށް އެތައްހާސްބަޔަކު ވަނީ އެއްވެފައެވެ.