ދިރާގުން އައު ސައިބަރ ސެކިއުރިޓީ ހިދުމަތެއް ތައާރަފުކޮށްފި

ދިރާގާއި ސައިބަރ ސެކިއުރިޓީ ކުންފުނި 'އީސެޓް' (eset) ގުޅިގެން 'ސައިބަރ ޕްރޮޓެކްޓް'ގެ ނަމުގައި މެނޭޖްޑް އެންޑްޕޮއިންޓް ސެކިއުރިޓީ ހިދުމަތެއް ތައާރަފުކޮށްފިއެވެ.

ދިރާގުން ބުނީ މި ހިދުމަތަކީ ރާއްޖޭގެ ކުންފުނިތަކާއި އިދާރާތަކުގެ ސައިބަރ ސެކިއުރިޓީ ވަރުގަދަ ކުރުމަށްޓަކައި އެންމެ ފަހުގެ ޓެކްނޮލޮޖީ ބޭނުންކޮށްގެން ފޯރުކޮށްދޭ އެންޓަރޕްރައިޒް-ގްރޭޑް ސޮލިއުޝަނެއް ކަމަށެވެ.

މުވައްޒަފުން ބޭނުންކުރާ ލެޕްޓޮޕާއި ޑެސްކްޓޮޕާއި ސާވަރތައް މަލްވެއަރ އަދި ރެންސަމްވެއަރ ފަދަ ނުރައްކާތަކުން ރައްކާތެރިކޮށްދިނުމުގެ އިތުރުން އީމެއިލްއާއި ކްލައުޑް އެޕްލިކޭޝަންތަކަށް އަމާޒުވާ ފިޝިންގ ހަމަލާތަކުން ވެސް ރައްކާތެރިކަން ކަށަވަރުކޮށްދޭ ކަމަށް އެ ކުންފުނިން ބުނެފައިވެއެވެ.

މީގެ އިތުރުން ސެކިއުރިޓީ އޮޕަރޭޝަން ސެންޓަރެއްގެ އެހީގައި ފަންނީ މާހިރުން 24 ގަޑިއިރު ސިސްޓަމްތައް މޮނިޓަރކޮށް ޝައްކުކުރެވޭ ކަންކަން ވަގުތުން ދެނެގަނެ ފިޔަވަޅު އަޅާނެ ކަމަށްވެސް ދިރާގުން ހާމަކޮށްފައިވެއެވެ.

ސަބްސްކްރިޕްޝަން އުސޫލުން ފޯރުކޮށްދޭ މި ހިދުމަތް ބަހާލެވިފައިވަނީ ހަތަރު ޕެކޭޖަކަށެވެ. ދިރާގުން ބުނިގޮތުގައި މިއީ ކުންފުނިތަކުގެ މަސައްކަތުގެ ބާވަތާއި ބޭނުންވާ ރައްކާތެރިކަމުގެ މިންވަރަށް ބަލައި އެންމެ އެކަށީގެންވާ ޕެކޭޖެއް އިހްތިޔާރު ކުރުމުގެ ފުރުސަތު ދިނުމުގެ ގޮތުން ފަރުމާކޮށްފައިވާ ހިދުމަތެއް ކަމަށެވެ. މި ހިދުމަތާ ގުޅޭ އިތުރު މައުލޫމާތު ދިރާގުގެ ވެބްސައިޓް މެދުވެރިކޮށް ލިބޭނެ ކަމަށް އެ ކުންފުނިން ބުނެފައިވެއެވެ.