ދިރާގު މޯލްޑިވްސް ގޭމިންގ ކޮންކުއެސްޓް 2026 – ރާއްޖޭގެ އެންމެ ބޮޑު އީ-ސްޕޯޓްސް މުބާރާތް ބާއްވާ ތާރީހު އިއުލާނުކޮށްފި!

ރާއްޖޭގެ އެންމެ ބޮޑު އީ ސްޕޯޓްސް އިވެންޓް ކަމުގައިވާ ދިރާގު މޯލްޑިވްސް ގޭމިންގ ކޮންކުއެސްޓް (ޑީއެމްޖީސީ) 2026 ބާއްވާނެ ދުވަސްތައް ދިރާގު ގޭމާސް ގިލްޑް (ޑީޖީޖީ) އިން އިއުލާނުކޮށްފިއެވެ.

ޑީޖީޖީން ބުނެފައިވާ ގޮތުގައި، މި އަހަރުގެ ޑީއެމްޖީސީ ބާއްވާނީ ނޮވެމްބަރު 26 އިން 28 އަށް، ކަލާފާނު ސްކޫލުގައެވެ. އެ އިވެންޓް ބާއްވަނީ ހިލޭ، ހުރިހާ ފަރާތްތަކަށް ހުޅުވައިލައިގެންނެވެ. ރާއްޖޭގެ ގޭމިންގ ކޮމިއުނިޓީ އެއްތަނަކަށް ޖަމާކޮށް، ވާދަވެރި މާހައުލެއްގައި ހުނަރު ދައްކާލުމުގެ ފުރުސަތު ދިނުމަކީ ޑީއެމްޖީސީގެ މަޤްޞަދެވެ.

މި ފަހަރުގެ އިވެންޓުގައި މޯބައިލް، ޕީސީ އަދި ކޮންސޯލް ޕްލެޓްފޯމްތަކުގެ މުބާރާތްތައް ކުރިއަށްދާނެ ކަމަށް ޑީޖީޖީން ބުނެފައިވެއެވެ. ޕަބްޖީ މޯބައިލް، މޯބައިލް ލެޖެންޑްސް ބޭންގ ބޭންގ އަދި ރޮކެޓް ލީގްގެ ފައިނަލް މެޗުތައް އެ ތަނުގައި ކުޅެވޭނެއެވެ. އީއޭ ސްޕޯޓްސް އެފްސީ 27 އާއި ޓެކެންގެ މުބާރާތްތަކުގެ ތަފްސީލު ވަރަށް އަވަހަށް އިއުލާނުކުރާނެ ކަމަށް ވެސް ދިރާގުން ބުނެއެވެ.

މި މުބާރާތްތަކުގެ އިތުރުން ވެސް، މި އިވެންޓުގައި މުނިފޫހިފިލުވުމުގެ ތަފާތު އެކި ހަރަކާތްތައް ކުރިއަށްދާނެއެވެ. މީގެ ތެރޭގައި ވާޗުއަލް ރިއަލިޓީ، ރޭސިންގ ސިމިއުލޭޓަރ އަދި މަގްބޫލު ޓޭބަލްޓޮޕް ގޭމެއް ކަމުގައިވާ "ޑަންޖަންސް އެންޑް ޑްރެގަންސް (ޑީ.އެންޑް.ޑީ)" ފަދަ ޝައުގުވެރި ކުޅިވަރުތައް ތަޖުރިބާކޮށްލުމުގެ ފުރުސަތު ލިބިގެންދާނެއެވެ

މި އަހަރުގެ މުބާރާތުގައި ޖުމްލަ 150,000 ރުފިޔާގެ ފައިސާގެ އިނާމު ދެވޭނެ ކަމަށް ޑީޖީޖީން ބުނެއެވެ. ވޭތުވެދިޔަ އަހަރު ބޭއްވި ޑީއެމްޖީސީގައި ރާއްޖޭގެ އެކި ސަރަހައްދުތަކުން 1,500 އަށްވުރެ ގިނަ ކުޅުންތެރިން ބައިވެރިވިއެވެ.

ރާއްޖޭގެ އެންމެ ބޮޑު ގޭމިންގ ޕްލެޓްފޯމް ކަމަށް ސިފަކުރާ ޑީޖީޖީން ދަނީ ޤައުމީ ފެންވަރުގައި އީ ސްޕޯޓްސް އާއި ގޭމިންގ ކޮމިއުނިޓީ ކުރިއެރުވުމަށް މަސައްކަތްކުރަމުންނެވެ. މުބާރާތާ ގުޅޭ އެންމެ ފަހުގެ މަޢުލޫމާތު އެ ފަރާތުގެ ވެބްސައިޓުން ލިބިގެންދާނެއެވެ.