ވެނެޒުއޭލާގެ 65 ބިލިއަން ފީފާ ތެލުގެ ކޮންޓްރޯލް އެމެރިކާއަށް ލިބޭ އެއްބަސްވުމެއް ހަދައިފި

ވެނެޒުއޭލާގެ ރަސްމީ ތެލުގެ ރިޒާވުން 65 ބިލިއަނަށް ވުރެ ގިނަ ފީފާގެ މެޖޯރިޓީ ކޮންޓްރޯލް އެމެރިކާއަށް ލިބޭ ގޮތަށް ދެ ޤައުމުގެ ދެމެދުގައި އެއްބަސްވުމެއް ޤާއިމުކޮށްފައިވާކަން ޑޮނަލްޑް ޓްރަމްޕް އިޢުލާންކޮށްފިއެވެ.

ޓްރޫތް ސޯޝަލް މެދުވެރިކޮށް ޓްރަމްޕް ވިދާޅުވީ މި މުޢާމަލާތުގެ ސަބަބުން އެމެރިކާގެ ތެލުގެ ރިޒާވް ދެ ގުނައަށް ވުރެ އިތުރުވެ ރައްޔިތުންނަށް ތެލުގެ އަގު ބޮޑުތަނުން ހެޔޮވާނެ ކަމަށެވެ. މި އެއްބަސްވުމަކީ ދުނިޔޭގެ ތާރީޚުގައި ވެސް ކަނޑައެޅޭ އެންމެ ބޮޑު ތެލުގެ މުޢާމަލާތް ކަމަށް އޭނާ ސިފަކޮށްފައިވެއެވެ. ހަފުތާތަކެއް ވަންދެން ކުރެވުނު މަޝްވަރާތަކަށް ފަހު ޢިއުލާންކުރި މި އެއްބަސްވުމުގައި އެމެރިކާގެ ކުންފުނިތަކަށް ވެނެޒުއޭލާގެ ތެޔޮ ވަޅުތަކުން ދިގު މުއްދަތަކަށް ތެޔޮ ނެގުމުގެ ފުރުޞަތު ހިމެނެއެވެ.

"ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒްއާ ގުޅިގެން ސެކްރެޓަރީ އޮފް ސްޓޭޓް މާކޯ ރޫބިއޯ އާއި ސެކްރެޓަރީ އޮފް ވާރ ޕީޓް ހެގްސެތް، އަޅުގަނޑުގެ އިރުޝާދުގެ ދަށުން ކުރެއްވި މަސައްކަތުން އަމިއްލަ ވިޔަފާރިތަކާއެކު އޮތް ބައިވެރިވުމެއްގެ ތެރެއިން ވެނެޒުއޭލާގެ 65 ބިލިއަނަށްވުރެ ގިނަ ފީފާގެ ތެލުގެ ރިޒާވްގެ މެޖޯރިޓީ ކޮންޓްރޯލް އެމެރިކާއަށް ވަނީ ކަށަވަރުކޮށްދީފައި. މީގެ ސަބަބުން އެމެރިކާގެ ޓެކްސް ދައްކާ ރައްޔިތުންގެ އަތުން އެއްވެސް ޚަރަދެއް ނުދާނެ" ޓްރަމްޕް ލިޔެފައިވެއެވެ.

ވެނެޒުއޭލާގެ ވަގުތީ ރައީސާ ޑެލްސީ ރޮޑްރިގޭޒް ވެސް މި އެއްބަސްވުމަށް މަރުޙަބާ ކިޔާފައިވެއެވެ. މި މުޢާމަލާތުން ވެނެޒުއޭލާގެ ދައުލަތުގެ ޚަޒާނާއަށް 209 ބިލިއަން ޑޮލަރު ލިބޭނެ ކަމަށް ބެލެވެއެވެ. ހަމައެއާ އެކު އެމެރިކާގެ ޚާރިޖީ ވަޒީރު މާކޯ ރޫބިއޯ ބުނީ މި އެއްބަސްވުމުން ދެ ފަރާތަށް ވެސް ކާމިޔާބީ ލިބޭ ކަމަށާއި އެމެރިކާއަށް ދާއިމީ ގޮތެއްގައި އަގުހެޔޮކޮށް ތެޔޮ ލިބި ޕެޓްރޯލްގެ އަގު ދަށްކުރެވޭނެ ކަމަށެވެ. ވެނެޒުއޭލާއަށް ގާތްގަނޑަކަށް 100 ބިލިއަން ޑޮލަރުގެ އަމިއްލަ އިންވެސްޓްމަންޓު ލިބި މަތީ އާމްދަނީ ލިބޭ އެތައް ހާސް ވަޒީފާއެއް އުފެދޭނެ ކަމަށް ވެސް ރޫބިއޯ ފާހަގަކޮށްފައިވެއެވެ.

ދުނިޔޭގައި އެންމެ ބޮޑު ތެލުގެ ރިޒާވް އޮތް ވެނެޒުއޭލާގައި އިންވެސްޓްމަންޓް މަދުވުމާއި ނުރަނގަޅު ހިންގުމާއި ދަތިކުރުމުގެ ފިޔަވަޅުތަކާ ހެދި މިހާރު ދުވާލަކު އުފެއްދެނީ 1.25 މިލިއަން ފީފާ ތެލެވެ. ނަމަވެސް ތެލުގެ ސިނާޢަތު ދައުލަތުގެ ބާރުގެ ދަށުގައި އޮންނަންވާނެ ކަމަށް ބުނާ ވެނެޒުއޭލާގެ ޤާނޫނީ އަދި ދުސްތޫރީ ގޮންޖެހުންތައް މި އެއްބަސްވުމަށް ކުރިމަތިވެދާނެ ކަމަށް ވަނީ ބެލެވިފައެވެ. އެއްބަސްވުމުގައި ހިމެނޭ ވަކިވަކި ވަޅުތަކާއި ކުންފުނިތަކުގެ ތަފުސީލެއް ޓްރަމްޕް ހާމަކޮށްފައި ނުވާ އިރު ވެނެޒުއޭލާގެ އޮފިޝަލުން ތައްޔާރުވަމުން ދަނީ އަންނަ ހަފުތާގައި އެމެރިކާގެ ކުންފުނިތަކަށް ތެޔޮ ހޯދުމާއި އުފެއްދުމުގެ އައު ހުއްދަ ދޭ އެއްބަސްވުންތަކުގައި ސޮއިކުރުމަށެވެ.