ޔުއެފާ ޗެްޕިއަންސްލީގް؛ ލިވަޕޫލް އަދި ސްޕާސް ބަލިވިއިރު، ނިއުކާސަލް މެޗް އެއްވަރު

ޔުއެފާ ޗެމްޕިއަންސްލީގްގައި ރޭ ލިވަޕޫލް، އަދި ސްޕާސް ކުޅުނު މެޗްތަކުން އެޓީމްތައް ބަލިވިއިރު، ނިއުކާސަލް ކުޅުނު މެޗް އެއްވަރުވެއްޖެއެވެ.

ޗެމްޕިއަންސްލީގްގައި ރޭ ތުރުކީގެ ގަލަތަސަރާއީ އާއި ލިވަޕޫލް ބައްދަލުކުރިމެޗް ގަލަތަސަރާއީ ކާމިޔާބުކުރީ 0-1 ގެ ނަތީޖާއަކުންނެވެ. ގަލަތަސަރާއީގެ ދަނޑުގައި ކުޅުނު މިމެޗްގައި އެޓީމުން ވަނީ މެޗްގެ ވަރަށް ކުރީކޮޅު ލަނޑެއް ޖަހައި ލިވަޕޫލް ހިފަހައްޓާފައެވެ. މި ލަނޑު ކާމިޔާބުކޮށްދިނީ ހަތްވަނަ މިނެޓް ތެރޭގައި މާރިއޯ ލެމީނާ އެވެ.

މެޗްގައި ގަލަތަސަރާއީ ކުޅުންތެރިން އިތުރު ލަނޑެއް ޖެހިނަމަވެސް ރެފްރީ ނިންމީ އެއީ އޯފްސައިޑް ލަނޑެއްގެ ގޮތުގައެވެ. ރޭގެ މެޗްގައި ލިވަޕޫލަށް ލަނޑެއް ނުޖެހުނު ނަމަވެސް ގޯލަށް އަމާޒުކޮށް ނުރައްކާތެރި ގިނަ ހަމަލާތައް އުފައްދާފައިވަނީ ލިވަޕޫލުންނެވެ.

ޔުއެފާ ޗެމްޕިއަންސްލީގްގައި ރޭ ސްޕާސް އާ ސްޕެއިންގެ އެތްލެޓިކޯ މެޑްރިޑް ބައްދަލުކުރިމެޗް 5-2 ގެ ނަތީޖާއަކުން ކާމިޔާބުކުރީ އެތްލެޓިކީޯ މެޑްރިޑެވެ. އެތްލެޓިކޯއަށް ގޯލް ހުޅުވާލަދިނީ ހަވަނަ މިނެޓް ތެރޭގައި ލޮރެންޓޯއެވެ. މެޗްގައި ދެން އެތްލެޓިކޯއަށް ލަނޑުތައް ކާމިޔާބުކޮށްދިނީ ތަޖުރިބާކާރު ފޯވަޑް ގްރިޒްމަން، އަލްވަރެޒް އަދި ނޯމަންޑެވެ. މެޗްގައި އަލްވަރެޒް ވަނީ ދެ ލަނޑު ކާމިޔާބުކޮށްދީފައެވެ.

ރޭ ސްޕާސްއަށް ލަނޑުތައް ކާމިޔާބުކޮށްދިނީ ޕޮރޯ އަދި ސޮލަންކާއެވެ.

ޔުއެފާ ޗެމްޕިއަންސްލީގްގައި ރޭ އިނގިރޭސި ޓީމްތަކުގެ ތެރެއިން އެންމެ ރަނަގޅު ނަތީޖާއެއް ހޯދީ ނިއުކާސަލް ޔުނައިޓެޑެވެ. ނިއުކާސަލުން ވަނީ ސްޕެއިންގެ ގަދަ ބާރު ބާސެލޯނާ މޮޅުވިޔަ ނުދީ ހިފަހައްޓާފައެވެ. މެޗްގައި ނިއުކާސަލްއިން ރަނގަޅު ކުޅުމެއް ދެއްކިއިރު، އެންމެފުރަތަމަ ގޯލެއް ޖަހައި ކުރި ހޯދީވެސް ނިއުކާސަލުންނެވެ. އެއީ މެޗްގެ 86 ވަނަ މިނެޓް ތެރޭގައި ބާނެސް ކާމިޔާބުކޮށްދިން ލަނޑުންނެވެ.

ބާސެލޯނާއިން ލަނޑު ޖަހާފައިވަނީ މެޗް ނިމެން އުޅެނިކޮށް އިތުރުވަގުތު ކުޅުމުގެ ތެރޭގައި ލިބުނު ޕެނަލްޓީއަކުން ޔަމާލް އެވެ.

ޔުއެފާ ޗެމްޕިއަންސްލީގްގައި މިރޭ އިނގިރޭސިވިލާތުގެ އާސެނަލް ނިކުންނާނީ، ޖަރުމަނުވިލާތުގެ ބެޔާ ލެވަކޫސެންއާ ދެކޮޅަށެވެ. މިމެޗް ފަށާނީ 22:45 ގައެވެ.