ހޯއްގޮވާ ކެއްސުމުގެ ވޭދަނަ ތަކެއް ގއ.ވިލިނގިލިން ފެނިއްޖެ

ޕަރޓޫޓިސް ނުވަތަ ހޯއްގޮވާ ކެއްސުމުގެ ވޭދަނަ ތަކެއް ގއ.ވިލިނގިލިން ފެނިއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނެރުނު ބަޔާނެއްގައި ބުނީ 2024 ވަނަ އަހަރުގެ ޖެނުއަރީ މަހު  ހޯއްގޮވާ ކެއްސުމުގެ ބައްޔަށް ގއ.ވިލިނގިލިން 3 ކުޑަ ކުއްޖަކު ފައްސި ވެފައިވާ ކަމަށެވެ.

އެޗްޕީއޭއިން ބުނީ މި ބައްޔަކީ ގަވާއިދުން ވެކްސިން ދޭންފެށުމާއި ގުޅިގެން ކޮންޓްރޯލް ކުރެވިފައިވާ ބައްޔެއް ނަމަވެސް މަދު މަދުން ރާއްޖެއިން ފެންނަ ބައްޔެއް ކަމަށެވެ.

މި ބަލި ޖެހުމުގެ ނުރައްކާ އެންމެ ބޮޑީ ކުޑަކުދިންނަށް ކަމަށްވާތީ 7 އަހަރު ނުވާ ކުޑަކުދިންގެ ތެރެއިން މި ވެކްސިން ފުރިހަމަ ނުކޮށް ތިބި ކުދިންނަށް ވީހާވެސް އަވަހަށް ވެކްސިން ދިނުމަށް އެޗްޕީއޭއިން އިލްތިމާސްކުރެއެވެ. މި ބައްޔަށް ޖަހާ ވެކްސިން އެ ރަށެއްގެ ސިއްހީ ހިދުމަތްދޭ މަރުކަޒުން ލިބެން ހުންނާނެ ކަމަށް ވެސް އެއިދާރާއިން މައުލޫމާތުދެއެވެ.

މި ކޭސްތައް ރާއްޖެއިން ފެނުމާއި ގުޅިގެން އެޗްޕީއޭއިން ވަނީ އައިޖީއެމްއެޗް އާއި ގއ.އަތޮޅު ހޮސްޕިޓަލާއި ގުޅިގެން ޕޮސްިޓިވް ވެފައިވާ ކޭސް ތަކުގެ ކޮންޓެކްޓް ޓްރޭސިން ހަދަން ފަށާފައެވެ. މީގެ ތެރެއިން ބައްޔަށް ޕޮސިޓިވް ވެފައިވާ ފަރާތްތަކުގެ ކޮންޓެކްޓުންގެ ތެރޭގައި ހިމެނޭ އެއް އަހަރުން ދަށުގެ ކުދިންނާއި ބަނޑަށް 6 މަސްވެފައިވާ މާބަނޑު މީހުންނަށް އެންޓިބައޮޓިކް ޕްރޮފައިލެކްސިސް ދިނުން ހިމެނެއެވެ. އަދި ބަލީގެ އަލާމާތްތައް ހުރި ކޮންޓެކްޓުން ބައްޔަށް ޓެސްޓު ކުރުމާއި، ބަލިީގެ އަލާމާތްތައް ހުރި ކޮންޓެކްޓުންނަށް ބޭސްދީ، ގއ. އަތޮޅު ހޮސްޕިޓަލުން މިކަމަށް ހާއްސަ ޓާސްކް ފޯހެއް އެކުލަވާލައި، ބަލި ކޮންޓޮރޯލް ކުރުމުގެ މަސައްކަތް ރަށުގެ މުއައްސަސާތަކާއި ގުޅިގެން ކުރަމުން އަންނަކަމަށް އެޗްޕީއޭއިން މައުލޫމާތުދެއެވެ.

ރޯގާޖެހި ކެއްސާ ފަރާތްތަކުގެ ތެރެއިން، ކެއްސުން ދިގުލައިގެންދާނަމަ، ނުވަތަ ކެއްސުމުގެ ސަބަބުން އިތުރު އުނދަގޫ ތަކެއް ދިމާވާ ނަމަ ނުވަތަ ދިގު މުއްދަތަކަށް ފަރުވާ ކުރާ ބައްޔެއް ހުރި ނަމަ، ނުވަތަ ތުއްތުކުއްޖެއް ނުވަތަ މާބަނޑު މީހެއް ނަމަ ސިއްހީ ހިދުމަތްދޭ ފަރާތެއްގެ ލަފާ ހޯދުމަށް އެޗްޕީއޭއިން އިލްތިމާސް ކުރެއެވެ.

ޕަރޓޫޓިސް ނުވަތަ ހޯއްގޮވާ ކެއްސުމަކީ ބޯޑެޓެލާ ޕަރޓޫސިސް ކިޔާ ވައްތަރެއްގެ ބެކްޓީރިއާއެއްގެ ސަބަބުން ނޭވާލާ ނިޒާމަށް ޖެހޭ ބައްޔެކެވެ. ގައިން ގައިން ވަރަށް ފަސޭހައިން އަރާ މި ބަލި ފުރަތަމަ ޖެހުމުން ފެންނާނީ އާންމު ރޯގާތަކުގައި ވެސް ފެންނަ އަލާމާތްތަކެވެ. އެހެންނަމަވެސް ހަފްތާއެއް ފަހުން ކެއްސުން ދިގުލައިގެން ގޮސް ވަރަށް ގިނަ ދުވަހަށް ދެމިގެންދާނެއެވެ.