ޣައްޒާގެ ދެކުނުން މީހުން ހުސްކުރުމަށް އަނެއްކާވެސް ޔަހޫދީން އަމުރުކޮށްފި

ޣައްޒާގެ ދެކުނުގައި އޮންނަ ޚާން ޔޫނިސް ދޫކޮށް ޣައްޒާގެ އާއްމުން ދިޔުމަށް ހައްދުފަހަނައަޅާފައިވާ އިސްރާއީލުގެ ސިފައިން އަނެއްކާވެސް އަމުރުކޮށްފިއެވެ.

ޚާން ޔޫނިސް ސުންނާފަތިކޮށްލުމަށްފަހު، ޔަހޫދީ ސިފައިން އެ ސަރަހައްދު ދޫކޮށް ދިޔައީ މިދިޔަ އޭޕްރިލް މަހުއެވެ. ނަމަވެސް އަނެއްކާވެސް ޚާން ޔޫނިސް ހުސްކުރުމަށް އަމުރުކުރުމާއިއެކު، އެ ސަރަހައްދުގައި ދިރިއުޅެމުންދިޔަ 250,000 ގިނަ މީހުން އެ ސަރަހައްދު ދޫކޮށް ގޮސްފައިވާ ކަމަށް އދ އިން ބުނެއެވެ.

ޔަހޫދީން މިފަދައިން އަމުރުކޮށްފައިވާއިރު، މިދިޔަ ހޯމަ ދުވަހު ފަލަސްތީނުގެ މުޖާހިދުން ވަނީ އިސްރާއީލަށް އަމާޒުކޮށް ވަރުގަދަ ރޮކެޓް ހަމަލާތަކެއް ފޮނުވާލާފައެވެ. ފަލަސްތީނުގެ މިނިވަންކަމަށް ޖިހާދުކުރަމުންދާ މުޖާހދުން އިސްރާއީލަށް އަމާޒުކޮށް ޖުމްލަ 20 ރޮކެޓް ފޮނުވާލިއިރު، އެ ހަމަލާތަކުގައި ޔަހޫދީ ފައުޖުގެ އެކަކު މަރުވެ، އަނިޔާވި 9 މީހުންގެ ތެރެއިން އެކަކުގެ ހާލު ސީރިއަސް ކަމަށް ބޭރު ދުނިޔޭގެ ހަބަރުތަކުން ރިޕޯޓް ކުރެއެވެ.

މިއާއި ވިދިގެން ޚާން ޔޫނިސް ދޫކޮށް ޣައްޒާގެ އާއްމުން ދިޔުމަށް ޔަހޫދީން އަމުރުކުރުމަށްފަހު، އެ ދުވަހުގެ ރޭގަނޑު އެމީހުން ވަނީ އެ ސަރަހައްދަށް އަމާޒުކޮށް ލާއިންސާނީ އެތައް ހަމަލާއެއް ދީފައެވެ. މި ހަމަލާތަކުގައި ޣައްޒާގެ 8 މީހަކު ޝަހީދުވެފައިވާއިރު، އެތައް ބަޔަކު ވަނީ ޒަހަމްވެފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު ޔަހޫދީން ޣައްޒާއަށް އަރައިގަނެ، ހިންގަން ފެށި ގަތުލުއާއްމަށް 9 މަސް ވެފައިވާއިރު، އަދިވެސް މި އުދުވާން ހުއްޓާނެ ކަމުގެ އިޝާރާތެއް ލިބިފައެއް ނުވެއެވެ. ޔަހޫދީންގެ އަނިޔާވެރި އަމަލުތަކުގެ ސަބަބުން ޣައްޒާގެ 37,925 މީހުން ޝަހީދުވެފައިވާއިރު، 87,141 މީހުން ވަނީ ޒަހަމްވެފައެވެ.