ލިބުނު ކާމިޔާބީއާއެކު އެމްޑީޕީގެ ހަރަކާތްތައް އިތުރު ގިޔަރަކަށް ޖައްސާނަން: ފައްޔާޒު
މާލޭ މޭޔަރު ހޮވުމުގެ އިންތިހާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ލިބުނު ކާމިޔާބީއާއެކު ޕާޓީގެ ހަރަކާތްތައް އިތުރު ގިޔަރެއް ކުރިއަށް ޖައްސަވާނެ ކަމަށް އެޕާޓީގެ ޗެއާޕާސަން ފައްޔާޒް އިސްމާއިލް ރޭ ވިދާޅުވެއްޖެ އެވެ.
ފައްޔާޒް މިފަދައިން ވިދާޅުވީ އެމްޑީޕީގެ ކެނޑިޑޭޓް އާދަމް އާޒިމް މާލޭ ސިޓީގެ މޭޔަރު ކަމަށް ހޮވުމާއި ގުޅިގެން އެމްޑީޕީން އުފާ ފާޅު ކުރުމަށް ކުރިއަށް ގެންދިޔަ "ޝުކުރިއްޔާ ރައްޔިތުން" ކެމްޕޭންގައި ވާހަކަފުޅު ދައްކަވަމުންނެވެ.
އެގޮތުން އޭނާ ވިދާޅުވީ، އިންތިޚާބުގެ އެ ކާމިޔާބީ އާއެެކު، ދެން އެ ޕާޓީން މަސައްކަތް ކުރާނީ މަޖިލިސް އިންތިޚާބު ކާމިޔާބު ކުރަން ކަމަށެވެ.
""މިއީ އާ ފެށުމެއް، އާ ހިތްވަރެއް، މި ލިބުނު ކާމިޔާބާ އެކު ދެން އޮތް މަސައްކަތަކީ މަޖިލީހުން ރަނގަޅު އަދަދެއް ހޯދައި ސަރުކާރު ޖަވާބުދާރީ ކުރުވުން. ކުރިއަށް އޮތް ދުވަސްތަކުގައި އަޅުގަނޑުމެންގެ ޕާޓީގެ ހަރަކާތްތައް އިތުރު ގިޔަރަކަށް ޖައްސާލާނަން. މާލޭގެ މި ނަތީޖާއާއެކު، މާލޭގެ މަޖިލިސް ގޮނޑިތަކާއި އަދި ހަމަ އެހެންމެ ރާއްޖޭގެ އެކި ކަންކޮޅުތަކުގައި މަސައްކަތް ކުރަންވީގޮތް ރާވާލަމުން ދާނަން."
ފައްޔާޒް ވިދާޅުވިއެވެ.
ފައްޔާޒް ވިދާޅުވީ މިހާރު މި ސަރުކާރުން ދާ މިސްރާބަކީ އެމްޑީޕީން ރިޔާސީ އިންތިހާބުގައިވެސް ބުނި ފަދައިން ބިރުވެރި މިސްރާބެއް ކަމަށެވެ. މިއަދު ރައީސް ޑރ.މުއިއްޒު ޗައިނާއިން އެނބުރި އައިސް ނޫސްވެރިންނާއި ބައްދަލކުރައްވައި ދެއްކެވި ވާހަކަފުޅު ތަކުން އެކަން ސާފު ވެގެން ގޮއްސި ކަމަށާއި ފެންނަނީ ދިވެހި ރާއްޖެ މި ވައްޓާލަނީ ކޮންކަހަލަ ތަނަކަށް ކަމެއް ވެސް ނޭނގޭ ވަރުގެ އަނދަވަޅަކާއި ދިމާލަށް ދާތަން ކަމަށް ވެސް ފައްޔާޒް ވިދާޅުވިއެވެ.
މީގެ އިތުރުންވެސް ފައްޔާޒް ވަނީ އާޒިމް މާލެ ސިޓީގެ މޭޔަރަކަށް އިންތިހާބު ވުމަކީ އެމްޑީޕީއަށް ލިބުނު ބޮޑު ކާމިޔާބީއެއްގެ ގޮތުގައި ސިފަ ކުރައްވާފައެވެ. ރިޔާސީ އިންތިހާބުން ލިބުނު ނާކާމިޔާބީ އާއި ގުޅިގެން ލިބުނު މާޔޫސްކަމުގެ ތެރޭގައި ކުޑަކޮށް މަޑުޖެހިފައި ތިބީ "ވާނުވާ" ކުޑަކޮށް ބަލާލައިގެން ކުރިއަށް ގެންދިޔުމަށް ކަމަށާއި ލިބުނު ރަނުގެ ފުރުސަތުގެ ބޭނުން މިވަނީ ހިފިފައި ކަމަށް ވެސް ފައްޔާޒް ވިދާޅުވިއެވެ.
އިއްޔެގެ އިންތިހާބުގައި ވޯޓުލުމުގެ ހައްގު ލިބިގެންވާ 54,680 މީހުންގެ ތެރެއިން ވޯޓުލާފައި ވަނީ 17,410 މީހުންނެވެ. އޭގެ ތެރެއިން 7621 ވޯޓު ހޯއްދެވީ އާޒިމް އެވެ. އޭނާއާ އެންމެ ގާތުން ވާދަ ކުރެއްވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ކެންޑިޑޭޓު އާޒިމާ ޝަކޫރެވެ. އޭނާއަށް ގާތްގަނޑަކަށް 5031 ވޯޓު ލިބިވަޑައިގަތެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
