ޣައްޒާގެ ގަތުލުއާއްމު ހުއްޓާލުމާއި ގުޅޭ މަޝްވަރާތައް ކުރިއަށް!

ޔަހޫދީންގެ ފައުޖުން ޣައްޒާގައި ހިންގަމުން އަންނަ ގަތުލު އާއްމު ހުއްޓާލުމާއި ގުޅޭ މަޝްވަރާތަކަށް ހަމާސް ޖަމާއަތުގެ ޓީމެއް މިޞްރުގައި ހަރަކާތްތެެރި ވަމުންދާ ކަމަށް މަސްދަރުތަކުން ބުނެފިއެވެ.

މިކަމާއި ގުޅޭ ގޮތުން ވާހަކަ ދައްކަމުން ހަމާސް ޖަމާއަތުގެ އިސް ތަރުޖަމާނެއް ކަމަށްވާ އުސާމާ ހަމްދާން ވިދާޅުވީ، މި މަޝްވަރާތަކާއި އެކު ކުރިއަށް ދާކަމަށާއި، އެ ކަމާއި ގުޅޭ ވާހަކަތަކުގެ ތެރޭގައި ރަނގަޅު ބައެއް ނުކުތާތަކެއް ވެސް ހިމެނޭ ކަމަށެވެ.

"އަޅުގަނޑުމެން އަދިވެސް މިދައްކަނީ މައިގަނޑު މައްސަލައިގެ ވާހަކަ، އެއީ ހަނގުރާމަ އެއްކޮށް ހުއްޓާލުމާއި އިސްރާއީލުން ޣައްޒާ ދޫކޮށް ފައިބައިގެން ދިޔުން. އަޅުގަނޑުމެން އުންމީދު ކުރަނީ މިއަދު މިކަމާއި ގުޅޭ ރަނގަޅު ޖަވާބުތަކެއް ލިބޭނެ ކަމަށް."

އުސާމާ ހަމްދާން ވިދާޅުވިއެވެ.

ހަމާސް ޖަމާއަތުން ހަނގުރާމަ ހުއްޓާލުމަށް އެއްބަސް ވާނެ ކަމުގެ ފެހި ސިގްނަލް ލިބިފައިވީނަމަވެސް، ހައްދުފަހަނަ އަޅާފައިވާ އިސްރާއީލުން ވަނީ ހަނގުރާމަ ހުއްޓާލުމުގެ އެއްބަސްވުމަކަށް ދެފަރާތުން އައި ކަމުގައިވިޔަސް ޣައްޒާ އަށް ހަމަލާ ދިނުން ހުއްޓާނުލާނެ ކަމަށް ބުނެފައެވެ.

އިސްރާއީލުގެ މިވާހަކަތަކަށް ރައްދުދީ، ހަމާސް ޖަމާއަތުން ބުނީ ހަނގުރާމަ ހުއްޓާލުމަށް އެއްބަސް ވާނީ ޔަހޫދީން ޣައްޒާގައި ހިންގަމުން އަންނަ ގަތުލުއާއްމު އެއްކޮށް ހުއްޓާލުމަށް އެއްބަސްވާނަމަ ކަމަށެވެ. ކަމާއި ގުޅޭ ގިނަ ފަރާތްތަކުން ބުނީ މި މަޝްވަރާތައް މިހާރު އޮތީ ވަރަށް ނާޒުކު ފައްތަރެއްގައި ކަމަށެވެ.

މި މަޝްވަރާތައް ކުރިއަށް ދާއިރު ވެސް ޔަހޫދީ ފައުޖުން ޣައްޒާ އަށް ދެމުންގެންދާ ހަމަލާތަކަށް ހުއްޓުމެއް އައިސްފައިނުވާކަން ފާހަގަކޮށްލަން ޖެހެއެވެ.

މިގޮތުން 1.5 މިލިއަނަށް ވުރެ ގިނަ އާއްމުން ބޯހިޔާވަހިކަން ހޯދަމުން އަންނަ ރަފާޙް އަށް ހަމަލާތައް އަމާޒުކޮށްފައިވާއިރު، މިއީ އިންސާނީ ބޮޑު ކާރިސާ އަކަށް ވެދާނެ ފަދަ ކަމެއް ކަމަށް ބުނެ އދ އާއި ދުނިޔޭގެ ގިނަ ގައުމުތަކާއި އެހީގެ ޖަމާއަތް ތަކުން ވަނީ އިސްރާއީލަށް އިންޒާރު ވެސް ދީފައެވެ.

މިކަމަށް އަލިއަޅުވާލާ ވާހަކަ ދައްކަމުން އުސާމާ ހަމްދާން ވިދާޅުވީ، މިކަމުން ވެސް އިސްރާއީލުގެ އަނިޔާވެރި ބޮޑުވަޒީރު ހަނގުރާމަ ހުއްޓާލަން ބޭނުންނުވާކަން ދޭހަވާ ކަމަށާއި، ހަމަލާ ކުރިއަށް ގެންދާނެ ކަމަށް ނަތަންޔާހޫ ސާފުކޮށް ބުނެފައިވާކަމަށެވެ.

އޭގެ މާނަ އަކީ ހަނގުރާމަ ނުހުއްޓޭނެ ކަމަށާއި، ހަމަލާ ތައް ބަދަލު ކުރުން ކުރިއަށް ދާނެކަން ފާހަގަކޮށް އުސާމާ ހަމްދާން ވިދާޅުވީ ނަތަންޔާހޫގެ ބަޔާނުން އޭނާ ބުނެދޭން ބޭނުންވާ އެއްޗެއް އެނގެން ބޭނުންވާ ކަމަށާއި، ހަމާސް ގަބޫލު ކުރާގޮތުގައި ހަނގުރާމަ ހުއްޓާލުމަކީ ޔަހޫދީން ޣައްޒާ އާއި ރަފާހް އަށް ދެމުންގެންދާ ހަމަލާތައް އެއްކޮށް ހުއްޓާލުން ކަމަށެވެ.