ބޭރުފައިސާއާ ބެހޭ ބިލަށް އާއްމުންގެ ހިޔާލު ހޯދުމަށް އެމްއެމްއޭއިން ހުޅުވާލައިފި

ބޭރުފައިސާ މާރުކުރުމާ ގުޅޭ ކަންކަން ހަރުދަނާކުރުމުގެ ގޮތުން، ބޭރުފައިސާ އާބެހޭ ބިލެއް އެކުލަވާލުމުގެ މަސައްކަތް މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ފަށައިފިއެވެ.

އެމްއެމްއޭއިން ވަނީ މި ބިލް، ސްޓޭކްހޯލްޑަރުންގެ ހިޔާލު ހޯދުމަށް ފޮނުވާފައެވެ. މި ބިލް އެމްއެމްއޭގެ ވެބްސައިޓްގައި މިހާރު އާއްމުކޮށްފައިވާއިރު، މަރުކަޒީ ބޭންކުން ވަނީ މި ބިލާމެދު އާއްމުންގެ ހިޔާލު ހޯދުމަށްވެސް ހުޅުވާލާފައެވެ. އެމްއެމްއޭއިން ބުނީ ބިލުގެ މައިގަނޑު މަގްސަދަކީ މިއަހަރުގެ އޮކްޓޯބަރުމަހުގެ 1 ވަނަ ދުވަހު އަމަލުކުރަން ފަށާފައިވާ ބޭރުފައިސާއާ ބެހޭ ގަވާއިދުގައި ބަޔާންކޮށްފައިވާ ކަންކަން ހަރުދަނާކުރުން ކަމަށެވެ.

އެމްއެމްއޭއިން ބުނީ މި ބިލަކީ ވިޔަފާރިތަކާއި ރައްޔިތުންގެ ލާބައާއި މަންފާއާ ގުޅިފައިވާ ބިލަކަށްވާތީ، ވިޔަފާރިތަކާއި އާއްމު ރައްޔިތުންގެ ހިޔާލު ބިލަށް ބޭނުންވާކަމަށެވެ.

އެމްއެމްއޭއިން ބޭރުފައިސާ އާބެހޭ ބިލެއް އެކުލަވާލުމުގެ މަސައްކަތް ފަށާފައިމިވަނީ، މީގެކުރިން އެ ބޭންކުން އާއްމުކުރި ބޭރުފައިސާ މާރުކުރުމާ ބެހޭ އައު އުސޫލަށް ޓޫރިޒަމްގެ ބައެެއް ބޮޑެތި ފިޔަފާރިވެރިން އަމަލުނުކުރާނޭކަމަށް ބުނެފައިވަނިކޮށްކަން ފާހަގަކޮށްލެވެއެވެ.

ބިލުގައި ފާހަގަކުރެވޭ މުހިއްމު ބައެއް ކަންކަމުގެ ތެރޭގައި:

- ދިވެހިރާއްޖެއިން ދިވެއްސަކު ހޯދާ މުދަލާއި ޚިދުމަތްތަކަށް ބޭރު ފައިސާއިން އަގު އަދާކުރަން ލާޒިމެއް ނުކުރެވޭނެ.

- އަހަރެއްގެ ތެރޭގައި ވިހި މިލިއަން އެމެރިކާ ޑޮލަރަށް ވާ އަދަދަށް ބޭރު ފައިސާ ލިބޭ ވިޔަފާރިތައް އެ ފަރާތްތަކަށް ލިބޭ ބޭރުފައިސާގެ އާމްދަނީ ރާއްޖޭގެ ބޭންކު އެކައުންޓަކަށް ޖަމާކުރުން.

- ޓޫރިސްޓު ހޮޓާތައް (50 އަށް ވުރެ ގިނަ ވިޔަސް މަދުވިޔަސް މީހުން ދިރިއުޅޭ ރަށެއްގައި ހުންނަ)އާއި ޓޫރިސްޓު އުޅަނދުތައް ކެޓަގަރީ ބީ އަށް ބަދަލުކުރުން.

- އަހަރެއްގެ ތެރޭގައި މަދުވެގެން 20 މިލިއަން އެމެރިކާ ޑޮލަރުގެ އާމްދަނީ ލިބޭ ފަރާތްތަކުން ބޭރުފައިސާގެ އާމްދަނީން %25 އަށް ވުރެ ބޮޑުނުވާ ގޮތަށް އޮތޯރިޓީން ހަދާ ގަވާއިދެއްގެ ތެރެއިން މާރުކުރަންޖެހުން.

- ބޭރުފައިސާ މާރުކުރުން އިސްތިސްނާވާ ފަރާތްތަކުގެ ތެރޭގައި 24 ގަޑިއިރު ހޭދަނުކުރާ ފަތުރުވެރިންނާއި، އަހަރުން ދަށުގެ ކުދިންގެ އިތުރުން ހިލޭ ނުވަތަ ކޮމްޕްލިމެންޓަރީކޮށް ތިބޭ ފަރާތްތައް ހިމެނުން.

- މީގެ އިތުރުން ދިވެހިރާއްޖެއިން ބޭރުގައި ރަޖިސްޓަރީ ކޮށްފައިވާ ޓޫރިސްޓު އުޅަނދުތައް ގާނޫނުން އިސްތިސްނާކުރުން.