އެމްއެމްއޭގެ ފަވަރަ ނިޒާމުގައި ބައިވެރިވުމަށް ފަހިޕޭއާއެކު އެއްބަސްވުމެއްގައި ސޮއިކޮށްފި

ރާއްޖޭގެ މަރުކަޒީ ބޭންކް ކަމަށްވާ މޯލްޑިވްސް މޮނިޓްރީ އޮތޯރިޓީ (އެމްއެމްއޭ) އިން ގާއިމުކޮށްފައިވާ "ފަވަރަ" ނިޒާމުގައި ބައިވެރިވުމަށް ފަހިޕޭއާއެކު މިއަދު އެއްބަސްވުމެއްގައި ސޮއިކޮށްފިއެވެ.

މިއީ މި ނިޒާމާ ގުޅުނު ބޭންކް ނޫން ދެވަނަ ފައިސާގެ ހިދުމަތްދޭ ފަރާތެވެ. މި އެއްބަސްވުމުގެ ދަށުން، ފަހިޕޭއަށް ފަވަރަ ނިޒާމުގެ ތެރެއިން ހިދުމަތް ދިނުމަށް މަގުފަހިވެގެންދާނެއެވެ.

އެމްއެމްއޭއިން ފާހަގަކުރި ގޮތުގައި ކުރިއަށް އޮތީ، ފަހިޕޭއިން ޕައިލެޓް ޓެސްޓިންގ މަސައްކަތްތައް ކުރިއަށްގެންދިޔުމެވެ. އަދި ފަވަރަ ނިޒާމުގެ ބައިވެރިއެއްގެ ގޮތުގައި ރަސްމީކޮށް ހިދުމަތް ފެށުމަށްޓަކައި ބޭނުންވާ އެންމެ ފަހުގެ ތައްޔާރީތަށް އެ ކުންފުނިން ދަނީ ކުރަމުންނެވެ.

މިފަދަ ހިދުމަތްތަކުގެ ސަބަބުން ރާއްޖޭގައި ކުރެވޭ ޑިޖިޓަލް ފައިސާގެ މުއާމަލާތްތައް އިތުރަށް ހަލުވިވެ، އާންމުންނަށް ފަސޭހަވެގެންދާނެއެވެ. ހާއްސަކޮށް ބޭންކް ނޫން ފަރާތްތަކަށް މިފަދަ ގައުމީ ފެންވަރުގެ ނިޒާމުތަކުން ފުރުސަތު ލިބިގެންދިއުމަކީ މާލީ ދާއިރާ ވާދަވެރިވެ، ހިދުމަތްތައް ފުޅާވެގެންދިޔުމަށް މަގުފަހިވާނެ ކަމެކެވެ.

"ފަވަރަ" ނިޒާމަކީ މާލީ ނިޒާމާއި ބީރައްޓެހި ފަރާތްތަކުގެ އިތުރުން ބޭންކް އެކައުންޓެއް ނެތް ފަރާތްތަކާއި ރާއްޖޭގެ ކޮންމެ ބޭންކެއްގައި އެކައުންޓް ހުޅުވާފައިވީނަމަވެސް، އެއްހަމައެއްގައި ފަސޭހަކަމާއެކު ހިދުމަތް ފޯރުކޮށްދިނުމަށް މަގު ފަހިވާގޮތަށް ފަރުމާކޮށްފައިިވާ ނިޒާމެކެވެ. އެގޮތުން، ފަވަރަ އިފްތިތާހުކޮށްފައިވަނީ، 2023 ވަނަ އަހަރުގެ އޮގަސްޓް 27 ގައެވެ.