ވައުދުވީ ގޮތަށް ހުކުރު ދުވަހު އެއާ އެމްބިއުލެންސް ގެ ހިދުމަތް ފަށާނެ: ރައީސް ޑރ.މުއިއްޒު

ރިޔާސީ އިންތިހާބުގެ ކެމްޕޭންގައި ވައުދުވެވަޑައިގެންނެވި ފަދައިން މާރިޗު 1 ވާ ހުކުރު ދުވަހު އެއާ އެމްބިއުލެންސް ގެ ހިދުމަތް ފެށިގެންދާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ނ.މަނަދޫ އަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވަމުން ރައީސް ޑރ.މުއިއްޒު ވިދާޅުވީ ނޭޝަނަލް އެއާ އެމްބިއުލެންސް ސާވިސް ގެ ނަމުގައި އެއާ އެމްބިއުލެންސް ގެ ހިދުމަތް ހުކުރު ދުވަހު ފަށަނީ މޯލްޑިވިއަން ގެ ޑޭޝް 8 ގެ މަތިންދާ ބޯޓެއް ބަދަލުކޮށް ކަމަށެވެ.

އޭރުން އޮންނާނީ މޯލްޑިވިއަން އިން އޮޕަރޭޓް ކުރާ ދިވެހި ރާއްޖޭގެ އަމިއްލަ ބޯޓެއް ކަމަށާއި ރާއްޖޭގެ ކޮންމެ އެއާޕޯޓަކުން ވެސް ކުއްލި ހާލަތުގައި ބަލި މީހުން، އެ ބޯޓު މެދުވެރިކޮށް ގެންދެވޭނެ ކަމަށް ރައީސް ޑރ.މުއިއްޒު ވިދާޅުވިއެވެ. އަދި އެ ބޯޓުގައި ލަންކާ އާއި ހިސާބަށް ވެސް ބަލި މީހުން އުފުލޭނެ ކަމަށާއި، ލަންކާ އަށް މަޑުކުރުމަށްފަހު ތެޔޮ އަޅައިގެން އަދި އެއަށްވުރެ ދުރަށް ވެސް ދެވޭނެ ކަމަށް އެމަނިކުފާނު ވިދާޅުވިއެވެ.

"1 މާޗުގައި، ދެދުވަސް ނޫންތޯ މިއޮތީ. މިއަދު މިއީ 28. ހުކުރުދުވަހު، ހުކުރުދުވަހު ފަށާނެ އިރާދަކުރެއްވިއްޔާ އަޅުގަނޑު ވައުދުވީ ގޮތަށް ރާއްޖޭގައި އެއާ އެމްބިއުލެންސް ގެ ހިދުމަތް. އަޅުގަނޑުމެންގެ މަތިންދާ ބޯޓެއް، ބަދަލުކޮށް، ޑޭޝް 8 ގެ މަތިންދާ ބޯޓެއް ބަދަލުކޮށް، ނޭޝަނަލް އެއާ އެމްބިއުލެންސް ސާވިސް އިރާދަކުރެއްވިއްޔާ މާދަން ނޫން އަނެއްދުވަހު މި ފެށެނީ. އޭރުން އޮންނާނީ ފުލް ޓައިމް އަޅުގަނޑުމެންގެ މޯލްޑިވިއަން އިން އޮޕަރޭޓް ކުރާ، އަޅުގަނޑުމެންގެ އަމިއްލަ ބޯޓެއް. ކޮންމެ ތަނަކުން، ކޮންމެ އެއާޕޯޓަކުން، ރާއްޖޭގެ ކޮންމެ އެއާޕޯޓަކުން ބަލި މީހުން ކުއްލި ހާލަތުގައި އެއްތަނުން އަނެއް ތަނަށް ގެންދެވޭނެ ބޯޓެއް."

ރައީސް ޑރ.މުއިއްޒު ވިދާޅުވިއެވެ.

ރައީސް ޑރ.މުއިއްޒު ވިދާޅުވީ މީގެ އިތުރުންވެސް، އެއާއި އެކީގައި އެއާ އެމްބިއުލެންސް އެއްގެ ގޮތުގައި ސީޕްލޭނެއް ވެސް އެތެރެ ބަދަލުކޮށްގެން ބޭނުން ކުރަން ފަށާނެ ކަމަށެވެ. ސީޕްލޭން ދުއްވާނީ ދުވާލު ގަޑީގައި ކަމަށާއި، ސީޕްލޭން ގެ ސަބަބުން ކޮންމެ ރަށެއް ކައިރިއަށް ވެސް ކުއްލި ހާލަތުގައި ކައިރިކުރުމުގެ ފަސޭހަކަން ލިބިގެން ދާނެ ކަމަށް ވެސް އެމަނިކުފާނު ވިދާޅުވިއެވެ.

"އޭގެ އިތުރަށް ސީ ޕްލޭން އެއް ވެސް އެއާއި އެކީގައި، ބޭނުންކުރަން ފަށާނެ އެތެރެ ބަދަލުކޮށްގެން އެއާ އެމްބިއުލެންސް ގެ ގޮތުގައި. ސީ ޕްލޭން ދެން ކޮންމެ ގޮތެއް ވިޔަސް ދުވާލުގެ ގަޑީގައި ދުއްވާނީ. އެކަމަކު ސީޕްލޭން ގެ އެޑްވާންޓޭޖަކީ ކޮންމެ ރަށެއް ކައިރިއަށް ވެސް ކުއްލި ހާލަތުގައި ކައިރިކޮށްލެވޭނެ. އެއީ ސީޕްލޭން ގެ ފަސޭހަ އަކަށް ވާނީ."

ރައީސް ޑރ.މުއިއްޒު ވިދާޅުވިއެވެ.

އެހެންކަމުން، މި ހަފްތާގެ ހުކުރުދުވަހު ފެށިގެންދާ އެއާ އެމްބިއުލެންސް ގެ ހިދުމަތާއި އެކު ، ރާއްޖޭގެ ކޮންމެ ކަންކޮޅަކުންވެސް ކޮންމެ ރަށަކުންވެސް، މެޑިކަލް އިވެކިއުއޭޝަނެއް ހަދަން ޖެހިއްޖެ ހާލަތެއްގައި، އެކަން ކުރުމުގެ ގާބިލުކަން ފަހިވެގެންދާނެ ކަމަށް ރައީސް ޑރ.މުއިއްޒު ވިދާޅުވިއެވެ.