ރަފާހް އަށް ދެމުންގެންދާ ހަމަލާތައް ވަގުތުން ހުއްޓާލަން އިސްރާއީލަށް އަމުރުކޮށްފި
ޔަހޫދީ ފައުޖުން ރަފާހް އަށް ދެމުންގެންދާ ހަމަލާތައް ވަގުތުން ހުއްޓާލުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިސްރާއީލަށް އަމުރުކޮށްފިއެވެ.
މިކަމާއި ގުޅޭ އަޑުއެހުމުގެ ރިޔާސަތު ބެއްލެވި ފަނޑިޔާރު ނަވާފް ސަލާމް ވިދާޅުވީ ޣައްޒާގެ ހާލަތު ރަނގަޅު ކުރުމަށްޓަކައި އިސްރާއީލަށް ފިޔަވަޅު އަޅަން މީގެ ކުރިން އަންގާފައިވާއިރު، އޭރަށް ވުރެ މިހާރު ޣައްޒާގެ ހާލަތު ދަށަށް ގޮސްފައިވާ ކަމަށެވެ.
އިއްޔެ އިސްރާއީލުގެ މައްޗަށް އައިސީޖޭ އިން ކުރި ހުކުމްގައި ބައިނަލްއަގްވާމީ ގާނޫނުގެ ދަށުން ނަސްލު ނައްތާލުމުގެ ގޮތުގައި ބެލެވޭ ކަންކަމަށް އިޝާރާތްކޮށް ނަވާފް ސަލާމް ވަނީ އިސްރާއީލުން ޣައްޒާގައި ހިންގަމުންގާ ގަތުލުއާއްމަކީ ފަލަސްތީނުގެ އާއްމުންނަށް ޖިސްމާނީ އަނިޔާތައް ލިބެމުންދާ ލާއިންސާނީ އަމަލަކަށް ވާއިރު، އިސްރާއީލުން ރަފާހްއަށް ދެމުންގެންދާ އަސްކަރީ ހަމަލާތަކާއި އެނޫންވެސް އެހެން އަމަލުތައް ވަގުތުން ހުއްޓާލުމަށް އަމުރުކޮށްފައެވެ.
ހަމައެއާއިއެކު، އިސްރާއީލުން ހިންގާ މި ގަތުލުއާއްމާއި ގުޅޭ ކަންކަން ތަހުގީގު ކުރުމަށް ހުރަހެއް ނެތި ޣައްޒާއަށް ވަދެވޭނެ ގޮތް ހަދަން ޖެހޭ ކަމަށާއި، އެއްވެސް ހުރަހެއްނެތި އިންސާނީ އެހީ ޣައްޒާއަށް ފޯރުކޮށްދެވޭނެ މަގު ފަހިކޮށްދިނުމަށް ވެސް ކޯޓުގެ އަމުރުގައި ވެއެވެ.
މީގެ ކުރިންވެސް ފަލަސްޠީނުގެ މުސްލިމް ރައްޔިތުންގެ ޙައްޤުގައި އިސްރާއީލާ ދެކޮޅަށް ދައުވާ ކުރި ދެކުނު އެފްރިކާއިން ހުށައެޅި މައްސަލައަށް މިފަދައިން އަމުރު ނެރެފައިވަނީ 13 ފަނޑިޔާރުންގެ އަޣުލަބިއްޔަތުންނެވެ. އަމުރު ނެރުމާ ދެކޮޅުމަށް ތިބީ ދެ ފަނޑިޔާރެކެވެ.
އައިސީޖޭ ގެ މި އަމުރާއި ގުޅިގެން ފަލަސްތީނުން އދ އަށް ކަނޑައަޅުއްވާފައި ހުންނަވާ މަންދޫބު ރިޔާދު މަންސޫރު، އައިސީޖޭގެ ގަރާރުތައް ފަސްޖެހުމެއް ނެތި ތަންފީޒު ކުރުމަށް ގޮވާލިއިރު އިސްރާއީލުން ވަނީ ޣައްޒާ ގައި އެމީހުން ހިންގަމުން އަންނަ ލާއިންސާނީ އަމަލުތަކަކީ ބައިނަލްއަގްވާމީ ގާނޫނުތަކާ އެއްގޮތަށް ހިންގާ ހަމަލާއެއް ކަމަށް ބުނެ، ގަތުލުއާއްމު ހުއްޓާލުމަށް ދެކޮޅު ހަދާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
