ލަންކާގެ ދަނޑުބިންތަކަށް ލިބުނު ގެއްލުމުން އަރައިގަންނަން 100 މިލިޔަން ޑޮލަރު ބޭނުންވާނެ

ސްރީ ލަންކާގެ ދަނޑުވެރިކަމުގެ ސިނާއަތަށް ދެކުނު އޭޝިޔާގެ ސަރަޙައްދުގައި އުފެދިފައިވާ ބާރުގަދަ ތޫފާން ދިތުވާގެ ސަބަބުން ލިބިފައިވާ ގެއްލުމުން އަރައިގަތުމަށް މަދުވެގެން 100 ވަރަކަށް މިލިޔަން އެމެރިކާ ޑޮލަރު ބޭނުންވާނެ ކަމަށް އެ ޤައުމުގެ ޚާރިޖީ ވުޒާރާއިން ހާމަކޮށްފިއެވެ.

މި ތޫފާނުގެ ސަބަބުން މެދުކެނޑުމެއް ނެތި ބޯކޮށް ވާރޭވެހި ވައިގަދަވުމާއި ގުޅިގެން އެ ޤައުމުގެ ތިންބައިކުޅަ އެއްބައި ސަރަޙައްދަކަށް ވަނީ ފެންބޮޑުވުމުގެ އަސަރުކޮށް، ބޮޑެތި ގެއްލުންތަކެއް ލިބިފައެވެ.

އެ ގައުމުގެ ހާރިޖީ ވުޒާރާއިން ވިދާޅުވާ ގޮތުގައި، ފެންބޮޑުވުމާ ގުޅިގެން އެ ޤައުމުގެ ދަނޑުވެރިކަމުގެ ސިނާއަތަށް ވަނީ ބޮޑެތި ގެއްލުންތަކެއް ލިބިފައެވެ. މި ގޮތުން، އެންމެ ބޮޑު ގެއްލުމެއް ލިބިފައި ވަނީ ހަނޑުލާއި ތަރުކާރީގެ ބާވަތްތައް ހައްދާ ދަނޑުތަކަށް ކަމަށާއި، އެ ދަނޑުތަކަށް ލިބިފައިވާ ގެއްލުމުން އަރައިގަތުމަށް 48 މިލިޔަން އެމެރިކާ ޑޮލަރު ބޭނުންވާނެ ކަން އެ ވުޒާރާއިން ހާމަކުރިއެވެ. މީގެ އިތުރުން، ދަނޑުތަކަށް ފެން ދިނުމަށް ބޭނުން ކުރާ ވަސީލަތްތަކާއި، ދަނޑުތަކަށް ފެން ފޯރުކޮށްދިނުމަށް ބިނާ ކޮށްފައިވާ ކެނޭލްތައް ނުވަތަ ކޯރުތަކަށް ވެސް ފެންބޮޑުވުމާ ގުޅިގެން ބޮޑެތި ގެއްލުންތަކެއް ލިބިފައިވުމުން އެ ގެއްލުންތަކުން އަރައިގަތުމަށް 3 މިލިޔަނެއްހާ އެމެރިކާ ޑޮލަރު ބޭނުންވާނެ ކަމަށްވެސް އެ ވުޒާރާއިން ވިދާޅުވެއެވެ. އަދި، ކެނޭލްތައް މަރާމާތު ކުރުމަށް އިތުރު 6 ވަރަކަށް މިލިޔަން އެމެރިކާ ޑޮލަރު ވެސް ބޭނުންވާނެ ކަމަށް މިނިސްޓްރިއިން ވަނީ ވިދާޅުވެފައެވެ.

ލަންކާއަށް ކުރިމަތިވި މި ތޫފާނާ ގުޅިގެން ހިނގި ނުރައްކާތެރި ހާދިސާތަކުގައި މަރުވި މީހުންގެ އަދަދު ވަނީ 334 އަށް އުފުލިފައެވެ. އަދިވެސް އިތުރު 218 ވަރަކަށް މީހުން ގެއްލިފައިވާ ކަމުގައި ރިޕޯޓުތައް ބުނެއެވެ. އެގައުމުގެ އެކި ކަންކޮޅުތަކުގައި ފެންބޮޑުވުމުގެ އަސަރު ކޮށްފައިވާ މީހުންގެ އަދަދު 998,918 އަށް އުފުލިފައިވާއިރު އޭގެ ތެރެއިން 51,000 ޢާއިލާއަކަށް ނިސްބަތްވާ 180,000 އަށްވުރެ ގިނަ މީހުން ވަގުތީ ހިޔާތަކަށް މިހާރު ވަނީ ބަދަލު ކޮށްފައެވެ. މި ކާރިސާގައި 15,000 އަށްވުރެ ގިނަ ގެދޮރަށް ބޮޑެތި ގެއްލުންތަކެއް ލިބި 200 އެށްހާ މަގާއި 10 ވަރަކަށް ބުރިޖު ހަލާކުވެފައިވާއިރު، ރޭލު ދަތުރުފަތުރުގެ ވިއުގައާއި ކަރަންޓުގެ ޚިދުމަތް ފޯރުކޮށްދިނުމަށް ބޭނުން ކުރާ ވަސީލަތްތަކާއި ވިއުގައަށް ވެސް ވަނީ ބޮޑެތި ގެއްލުންތަކެއް ލިބިފައެވެ.

މި ތޫފާނާ ގުޅިގެން ލިބިފައިވާ ގެއްލުންތަކުން އަރައިގަތުމަށް އެ ޤައުމުގެ އިދާރާތަކުން ދަނީ ކެނޑިނޭޅި މަސައްކަތް ކުރަމުންނެވެ. އަދި މި ކާރިސާއާއި ގުޅިގެން ލިބުނު ގެއްލުމުން އަރައިގަތުމުގައި އެހީތެރިކަން ފޯރުކޮށްދިނުމަށް އެ ޤައުމުގެ ޚާރިޖީ ވުޒާރާއިން ވެސް މިހާރު ވަނީ ބައިނަލްއަޤްވާމީ މުޖުތަމަޢަށް ގޮވައިލާފައެވެ.