އިޒްރޭލުން ޣައްޒާގެ އެކި ސަރަހައްދުތަކަށް ދެމުންދާ ހަމަލާތައް ވަރުގަދަކޮށްފި

އިޒްރޭލުގެ ޓެރަރިސްޓު ސިފައިން ޣައްޒާގެ އެކި ސަރަހައްދުތަކަށް ވައިގެ މަގުންނާއި އެއްގަމު މަގުން ވަރުގަދަ ހަމަލާތަކެއްދީ، ގިނަ އަދަދެއްގެ ފަލަސްތީނު ރައްޔިތުން ޒަހަމްކޮށްލައިފިއެވެ.

މިދިޔަ އޮކްޓޯބަރު މަހުން ފެށިގެން އަމަލުކުރަމުންދާ ގަތުލްއާއްމު މެދުކަނޑާލުމުގެ އެއްބަސްވުމާ އިޒްރޭލުން ކޮންމެ ދުވަހަކުވެސް ދަނީ ހިލާފުވަމުންނެވެ.

ފަލަސްތީނުގެ ރަސްމީ ނޫސް އެޖެންސީ 'ވަފާ' އިން ރިޕޯޓްކޮށްފައިވާ ގޮތުގައި، އާދިއްތަ ދުވަހު ގާޒާ ސިޓީގެ ދެކުނުގައި އޮންނަ ޒައިތޫން އަވަށަށް އިޒްރޭލުގެ ޑްރޯންތަކުން ދިން ހަމަލާތަކެއްގައި އާންމުންގެ ބައެއް މީހުން ވަނީ ޒަހަމްވެފައެވެ.

މީގެ އިތުރުން، ޚާން ޔޫނިސްގެ ހުޅަނގުގައި އޮންނަ އަލް-މަވާސީ ސަރަހައްދަށް އިޒްރޭލުން ދިން ބަޑީގެ ހަމަލާތަކެއްގައި ކުޑަކުއްޖަކާއެކު ދެ މީހަކު ޒަހަމްވެފައިވާ ކަމަށް ރިޕޯޓްތައް ބުނެއެވެ.

ޣައްޒާ ސިޓީގެ އިރުމަތީގައި ހުންނަ އަލް-އަހްލީ އަރަބް ހޮސްޕިޓަލުން މައުލޫމާތު ދިން ގޮތުގައި، ނެޓްޒާރިމް ސަރަހައްދުގައި ތިބި ބަޔަކަށް އަމާޒުކޮށް އިޒްރޭލުގެ ޑްރޯންތަކުން ދިން ހަމަލާތަކެއްގައި ތިން މީހަކު ވަނީ ޒަހަމްވެފައެވެ. އަދި ގާޒާގެ މެދުތެރޭގެ ދެއިރް އަލް-ބަލާހްގައި އިޒްރޭލު ސިފައިން ފަލަސްތީނު މީހެއްގެ ބޮލަށް ބަޑިޖަހައި ވަރަށް ބޮޑަށް ޒަހަމްކޮށްލާފައިވާ ކަމަށް އަލް-އަގްސާ މާޓިއާސް ހޮސްޕިޓަލުން ކަށަވަރުކޮށްދެއެވެ.

މީގެ އިތުރުން ދެކުނުގެ ރަފަހްގެ އިމާރާތްތަކަށް ވައިގެ ހަމަލާތައް ދީފައިވާއިރު، އުތުރުގެ ޖަބަލިއާ އަދި ގާޒާ ސިޓީގެ ތުއްފާ އަވަށަށްވެސް ވަނީ ހަމަލާތައް ދީފައެވެ. އަދި ބުރައިޖް ރެފިއުޖީ ކޭމްޕް ކައިރިއަށް ހެލިކޮޕްޓަރުން ބަޑީގެ ހަމަލާތައް ދީފައިވާ ކަމަށާއި، ކަނޑުގެ ސިފައިން ޚާން ޔޫނިސްގެ އައްސޭރިފަށަށް ހަމަލާދީފައިވާ ކަމަށް އަލްޖަޒީރާއިން ރިޕޯޓްކުރެއެވެ.

ފަލަސްތީނުގެ އޮފިޝަލުން ވިދާޅުވާ ގޮތުގައި، އޮކްޓޯބަރު 10 ވަނަ ދުވަހު ސުލްހައިގެ އެއްބަސްވުން ގާއިމުކުރި ފަހުން، އިޒްރޭލުން އެ އެއްބަސްވުމާ ހިލާފަށް ދިން ހަމަލާތަކުގައި 460 އަށްވުރެ ގިނަ މީހުން ވަނީ ޝަހީދުވެފައެވެ. އަދި 1,200 އަށްވުރެ ގިނަ މީހުން ވަނީ ޒަހަމްވެފައެވެ.

މީގެ އިތުރުން، ގާޒާއަށް ކާބޯތަކެއްޗާއި ބޭހާއި ހިޔާވަހިކަމަށް ބޭނުންވާ ތަކެތި އެތެރެކުރުން އިޒްރޭލުން ދަނީ ހިފަހައްޓަމުންނެވެ. ފިނި މޫސުން ފެށިފައިވާއިރު، ގިނަ ބަޔަކު ދިރިއުޅެމުންދަނީ ވަރަށް ނިކަމެތި ހާލަތެއްގައެވެ.

2023 އޮކްޓޯބަރު 7 އިން ފެށިގެން އިޒްރޭލުން ގާޒާގައި ހިންގަމުންދާ ގަތުލުއާންމުގައި މިހާތަނަށް 71,000 އަށްވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ. އަދި 171,000 އަށްވުރެ ގިނަ މީހުން ވަނީ ޒަހަމްވެފައެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ. އދ. އިން އަންދާޒާކުރާ ގޮތުގައި ގާޒާގެ އާންމު އުމްރާނީ ވަސީލަތްތަކުގެ 90 އިންސައްތަ ވަނީ ސުންނާފަތިވެފައެވެ.