ކުލި ކޮންޓްރޯލްކުރުމަކީ ކުރަން ކަމުދާ ކަމެއްނޫން، އެއިން އިމާރާތުގު ވެރިންނަށް ގެއްލުންވާނެ: ޑރ. ހައިދަރު

މާލެ ސަރަހައްދުގައި ކުއްޔަށް ދޭ ތަންތަނުގެ ކުލި ކޮންޓްރޯލްކުރުން އެއީ އެންމެ ކަމުދާ ގޮތް ނޫން ކަމަށާއި، އޭގެ ސަބަބުން އިމާރާތުގެ ވެރިންނަށް ގެއްލުންތަކެއް ވާނެ ކަމަށް ގެދޮރުވެރިކަމާއި ބެހޭ ވުޒާރާގެ ވަޒީރު ޑރ. އަލީ ހައިދަރު އަހުމަދު ރޭ ވިދާޅުވެއްޖެއެވެ.

ވީޓީވީގެ ފަންމަންޒަރު ޕްރޮގްރާމުގައި މާލެ ސަރަހައްދުގައި ކުލި ކޮންޓްރޯލް ކުރުމާއި ގުޅެ ގޮތުން ކުރެވުނު ސުވާލަށް ޖަވާބު ދެއްވަމުން ވަޒީރު ހައިދަރު ވިދާޅުވީ، ކުލި ކޮންޓްރޯލްކުރުމަކީ މާކެޓަށް ދޫކޮށްލަން ޖެހޭ ކަމެއް ކަމަށެވެ. އަދި ކުލި ކޮންޓްރޯލްކުރަން ފަށައިފި ނަމަ އޭގެ ސަބަބުން އިމާރާތުގެ ވެރިންނަށް ގެއްލުންވާނެ ކަމަށް ވަޒީރު ވިދާޅުވިއެވެ.

"އެހެން ނޫނިއްޔާ އެވާ ގޮތަކީ ކުލި ކޮންޓްރޯލްކުރަން ފަށައިފިއްޔާ ބޮޑެތި ލޯނުތަކާ އެއްޗެހި ނަގައިގެން އިމާރާތްކޮށްފައި ހުންނަ ބަޔަކަށް ލިބޭ ގެއްލުންތަކެއް ވެސް އުޅޭނެ،އެއީ ހުޅުވާލެވިފައިވާ މާކެޓެއް އޮންނަ ގައުމެއްގައި ކުރަން ކަމުދާ ކަމެއް ކަމުގައި އިކޮނޮމިސްޓުން ވެސް ގަބޫލެއްނުކުރޭ. އެހެންވީމަ އަޅުގަނޑަކަށް ހިޔެއްނުވޭ ކުލި ކޮންޓްރޯލްކުރުމަކީ އަޅުގަނޑުމެން ކުރަން ކަމުދާ ކަމެއްހެނެއް.

ޑރ އަލީ ހައިދަރު އަހުމަދު

މާލެ ސަރަހައްދުގައި ދިރިއުޅެން ކުއްޔަށް ދޫކުރާ ތަންތަނުގެ ކުލި ބޮޑު ކަމާއި، އެޑްވާންސް އަށް ދައްކަންޖެހޭ އަދަދުގެ ބޮޑު ކަމުގެ ކަންބޮޑުވުމަކީ ކުއްޔަށް އުޅޭ ފަރާތްތަކުގެ ވަރަށް ބޮޑު ކަންބޮޑުވުމެކެވެ.

އެހެން ކަމުން، ކުލި ކޮންޓްރޯލްކުރުމަށް ވަރަށް ގިނަ ފަރާތްތަކުން ގޮވާލާއިރު، ކުއްޔަށް ދޭ ފަރާތްތަކުން އެތަންތަން ހެދުމަށް ބޮޑެތި ލޯނު ނަގާ ވާހަކައާއި ކުލި ކޮންޓްރޯލް ކޮށްފިނަމަ އެވފަރާތްތަކަށް ދަތި ވާނެ ކަމުގެ ކަންބޮޑުވުން އެ ފަރާތްތަކުން ފާޅުކިރެއެވެ.