ހުރިހާ ކްލަބެއްގެ ތާއީދާއެކު އެފްއޭއެމްގެ ރައީސް ކަމަށް ޠާރިޤު ކުރިމަތިލައްވައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ކަމުގެ މަޤާމަށް، ޤައުމީ ޓީމުގެ ކުރީގެ ފޯވާޑު އަދި މަހިބަދޫ ދާއިރާގެ މެންބަރު އަޙުމަދު ޠާރިޤް (ޓޮމް) ކުރިމަތިލައްވައިފި އެވެ.

އެފްއޭއެމްގެ ރައީސްކަމުގެ މަޤާމަށް ޓޮމް ކުރިމަތިލެއްވީ އެފްއޭއެމްގެ މެމްބަރު 23 ކުލަބުގެ ތާއީދާ އެކު އެވެ.

މިކަމާއި ގުޅިގެން މީސްމީޑިއާގައި ޓޮމް ކުރެއްވި ޕޯސްޓެއްގައި އޭނާ ވަނީ، ރައީސް ކަމަށް އިންތިޚާބް ވެއްޖެނަމަ ރާއްޖޭގެ 4 ސަރަހައްދެއްގައި ރީޖަނަލް އެސޯސިއޭޝަން ހަދައި އެ ރީޖަންތަކުން އެފްއޭއެމްްގެ ކަންކަމުގައި ބަސްކިޔުމުގެ ފުރުސަތު ހޯދައިދިނުމަށް ވައުދުވެވަޑައިގެންފައެވެ.

ޓޮމްގެ އެކްސްކޯ މެންބަރުން:

1- ރައީސް: އަހްމަދު ތާރިޤް

2- ސ. ވީޕީ: އަލީ އިބްރާހިމް (ނިއު)

3- ވީޕީ: ހުސައިން ޝާފިއު (މާޒިޔާ)

4- ވީޕީ: މުޖުތަބާ ޖަލީލް (ނިއު)

5- އިމްރާން މުހައްމަދު (ކުރީގެ ޤައުމީ ކީޕަރު)

6- މުހައްމަދު އުމައިރު (ކުރީގެ ޤައުމީޓީމް ކުޅުންތެރިޔާ)

7- އަޙްމަދު އައްބާސް (ޓީސީ)

8- އަލީ ރިޒްވާން (ބީޖީ)

9- އަންހެން މެންބަރު: ހައްވާ ނަސްރާ ސައީދު

10 އަންހެން މެންބަރު: ހައްވާ ރަޝީދާ

11- އަބްދުالله ނާސިޙް (އޮޑި)

އެފްއޭއެމްގެ ރައީސް ކަމަށް ވާދަކުރުމުގެ މުއްދަތު މިއަދު ހަމަވާއިރު ޓޮމް ފިޔަވައި އިތުރު މީހަކު ފޯމު ހުށަހެޅުއްވިކަން އަދި އިއުލާނު ކުރައްވާފައި ނުވެއެވެ. އަދި ޓޮމް، ހުރިހާ ކްލަބެއްގެ ތާއީދާ އެކު ކުރިމަތިލުމުން ދެން އިތުރު ކެންޑިޑޭޓަކަށް ފުރުސަތެއްވެސް ނޯންނާނެއެވެ.

ޓޮމް ގެ އިތުރުން މީގެ ކުރިން އިއުލާން ކުރެވުނު ދެފަހަރު އެ މަގާމަށް ކުރިމަތިލެއްވި ބައްސާމަށް ދެން ރައީސް ކަމަށް ވާދަ ނުކުރެވޭ ގޮތަށް އެފްއޭއެމްގެ ގަވާއިދު މިހާރު ވަނީ ބަދަލު ކޮށްފައެވެ.