އިސްރާއީލްގެ ގައިދީންތައް މިނިވަންނުކޮށްފިނަމަ، ޣައްޒާއަށް ވަރުގަދަ ހަމަލާތަކެއް ދޭނެ ކަމުގެ އިންޒާރު ދީފި

އަންނަ ހޮނިހިރު ދުވަހުގެ މެންދުރުގެ ކުރިން ހަމާސްއިން ބަންދުކޮށްފައިވާ އިސްރާއީލްގެ މީހުން ދޫކޮށްނުލައިފިނަމަ، ޣައްޒާގައި "ވަރުގަދަ ހަނގުރާމައެއް" އަލުން ފަށާނެކަމުގެ އިންޒާރު އިޒްރޭލުގެ ބޮޑުވަޒީރު ބެންޖަމިން ނެތަންޔާހޫ ދީފިއެވެ.

އިސްރާއީލުން ހަނގުރާމަ ހުއްޓާލުމުގެ އެއްބަސްވުމާ ޚިލާފުވެފައިވާ ކަމަށް ބުނެ، ހަމާސްއިން ހޯމަ ދުވަހު ބުނެފައިވަނީ މި ހަފްތާ ނިމުމުގެ ކުރިން ދޫކޮށްލަން ރޭވިފައިވާ 3 އިސްރާއީލު މީހުން ދޫކޮށްނުލާނެ ކަމަށެވެ.

އެކަމާއި ގުޅިގެން ނެތަންޔާހޫ ބުނީ އިސްރާއީލުގެ ސިފައިން "ހަމާސް ފަނާކޮށްލުމަށް ޓަކައި އަނެއްކާވެސް ގަދަފަދަ ހަނގުރާމައަކަށް" ތައްޔާރަށް ތިބި ކަމަށެވެ.

ހަނގުރާމަ ހުއްޓާލުމުގެ ފުރަތަމަ މަރުހަލާގައި އަދިވެސް 17 އިސްރާއީލު ރަހީނުން ދޫކޮށްލަން ހަމަޖެހިފައިވެއެވެ. އޭގެ ތެރެއިން 8 މީހުން މަރުވެފައިވާ ކަމަށް އިސްރާއީލުން ބުނެއެވެ.

އަހަރަކަށްވުރެ ގިނަ ދުވަސްވަންދެން އިސްރާއީލުން ޣައްޒާގައި ހިންގަމުންދިޔަ ޤަތުލުޢާއްމު އަލުން ފެށުމުގެ ބިރުވެރިކަން އޮތް ވަގުތެއްގައި، އެމެރިކާގެ ރައީސް ޑޮނަލްޑް ޓްރަމްޕް ވަނީ ގާޒާ ހިފުމުގެ ޕްލޭން ތަކުރާރުކޮށް، ޖޯޑަންގެ ރަސްގެފާނު އަބްދުالله ދެވަނަ، އެމެރިކާއަށް ކުރެއްވި ޒިޔާރަތުގައިވެސް، ފަލަސްތީނުގެ ރައްޔިތުން އެގައުމަށް ބަދަލުކުރުމަށް ބިންދޫކުރުމަށް ގޮވާލާފައެވެ.

ނަމަވެސް ރަސްގެފާނު އަބްދުالله ވިދާޅުވީ ފަލަސްތީނުގެ ރައްޔިތުން އެހެން ތަނަކަށް ބަދަލުކުރުމާ ދެކޮޅުހައްދަވާ ކަމަށާއި، އަރަބި ޤައުމުތަކުން އެމެރިކާގެ ޕްލޭނަށް ޖަވާބެއް ދޭނެ ކަމަށެވެ.

މިސްރުގެ ފަރާތުން ބުނެފައިވަނީ "ފުރިހަމަ ޕްލޭނެއް" ގެ ދަށުން ފަލަސްތީނުގެ ރައްޔިތުން ބަދަލުނުކޮށް ގާޒާ އަލުން އިމާރާތްކުރުމަށް މަސައްކަތްކުރާނެ ކަމަށެވެ.

ޣައްޒާގެ ޞިއްޙީ ވުޒާރާއިން ހާމަކޮށްފައިވާ ގޮތުގައި އިޒްރޭލުގެ ޤަތުލުޢާއްމުގައި މިހާތަނަށް 48،219 މީހުން ޝަހީދުވެ، 111،665 މީހުންނަށް އަނިޔާވެފައިވެއެވެ. ނަމަވެސް ޣައްޒާ ސަރުކާރުގެ މީޑިއާއިން ޝަހީދުވި މީހުންގެ އަދަދު އަޕްޑޭޓްކޮށް، ބުނެފައިވަނީ އިމާރާތް ތަކުގެ ދަށުވެފައިވާ މީހުންނާއި ގެއްލިފައިވާގެ އަދަދު ހިމަނައިގެން، ޝަހީދުވި މީހުންގެ އަދަދު ހާހަކަށްވުރެ ގިނަ ވާނެ ކަމަށެވެ. އެގޮތުން މަދުވެގެން 61،709 މީހުން ޝަހީދުވެފައިވާ ކަމަށް ބުނެފައިވެއެވެ.