ތެލުގެ ޚަރަދު ކުޑަކުރުމަށް ސްރީލަންކާއިން ގިނަ ފިޔަވަޅުތަކެއް އަޅަން މަޝްވަރާކޮށްފި

މެދުއިރުމަތީގެ މަސްރަހު ގޯސްވަމުންދާތީ، ޒަރޫރީ ހިދުމަތްތައް މެދުނުކެނޑި ފޯރުކޮށްދިނުމާ ގުޅޭގޮތުން ސްރީލަންކާގެ ރައީސް އަނޫރާ ކުމާރާ ޑިސަނަޔަކަ މިއަދު ސްރީލަންކާ ސަރުކާރުގެ އިސްވެރިންނާ ބައްދަލު ކުރައްވައިފިއެެވެ.

މި ބައްދަލުވުމުގައި މަޝްވަރާ ކުރެވުނު މުހިންމު ކަންތައްތަކުގައި، ސަޕްލައި ޗޭނަށް ކުރާނެ ނޭދެވޭ އަސަރުތައް ކުޑަކުރާނެ ގޮތްތަކާއި، ދަނޑުވެރިކަމާއި މަސްވެރިކަމާއި އަދި ސިނާއީ މަސައްކަތްތަކަށް ބޭނުންވާ ތެޔޮ ނިޒާމު މެދުނުކެނޑި ލިބޭނެ ގޮތް ހެދުމަށްޓަކައި، ތެޔޮ ދޫކުރުމަށް ބޭނުންކުރާ ޑިޖިޓަލް ކޯޑު ނިޒާމު އިތުރަށް ހަރުދަނާ ކުރުން ހިމެނެއެވެ.

މީގެއިތުރުން، ތެޔޮ ސޭވް ކުރުމުގެ ގޮތުން، ސަރުކާރާއި އަމިއްލަ އިދާރާތަކުގެ މުވައްޒަފުން ގޭގައި ތިބިގެން މަސައްކަތް ކުރެވިދާނެ ގޮތްތައް ދިރާސަކޮށް ރިޕޯޓެއް ހުށެހެޅުމަށް ރައީސް ވަނީ އަންގަވައިފައެވެ.

މި ފިޔަވަޅުތަކުގެ މައިގަނޑު ބޭނުމަކީ ދުނިޔޭގެ މަސްރަހަށް އަންނަމުންމިދާ ބަދަލުތަކުގެ ސަބަބުން ސްރީލަންކާގެ އިޤްތިސާދަށް ކުރާނެ އަސަރު ކުޑަކޮށް، އަސާސީ ޚިދުމަތްތައް ހުއްޓުމެއްނެތި ގެންދިއުމެވެ.

މީގެ އިތުރުން، ތެލުގެ ދަތިކަމާ ގުޅިގެން ސަރުކާރު މުވައްޒަފުންނަށް ހަފުތާއަކު ހަތަރު ދުވަހު މަސައްކަތް ކުރާ ގޮތަށް ބަދަލުކުރުމަށްވެސް މަޝްވަރާކޮށްފައިވެއެވެ. މީގެ ބޭނުމަކީ ސަރުކާރު ދަތުރުފަތުރާއި ކޮމިއުޓިންއަށް ހޭދަވާ ތެޔޮ ބޮޑު ތަނުން މަދުކުރުމެވެ. ސަރުކާރު ޑިޕާޓްމަންޓްތަކުގެ ވެރިންނަށް ވަނީ މި ބަދަލު ގެންނަ ނަމަ އެކަން ތަންފީޒުކުރެވޭނެ ގޮތާ ބެހޭ ހުށަހެޅުންތައް ހުށަހެޅުމަށް އަންގާފައެވެ.

ދިވެހިރާއްޖެއިން ވެސް ވަނީ މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ދިމާވެދާނެ ނުރައްކަލަށް ތައްޔާރުވުމުގެ ގޮތުން ފިޔަވަޅުތަކެއް އަޅައިފައެވެ. އޭގެތެރޭގައި ރާއްޖޭގެ ހުރިހާ ރަށެއްގައި ބާއްވަން ނިންމި ޢީދު ދިއްލުން ހަރާކާތް، ހަރަދު ކުޑަކުރުމުގެ ގޮތުން ވަނީ ހަމައެކަނި ސިޓީ ތަކުގައި ބޭއްވުމަށް ނިންމާފައެވެ. އަދީ ދިމާވެދާނެ ސަޕްލައި ޗޭއިން މައްސަލަތަކުން ރައްކާތެރިވުމުގެ ގޮތުން ދިވެހި ސަރުކާރުން ދަނީ އިންޑިއާއާއި މަޝްވަރާކުރަމުންނެވެ.