ޣައްޒާގައި ބޭއްވޭ އެންމެ ބޮޑު އެއް ޖަނާޒާ މިއަދު؛ މިއީ ނިރުބަވެރިން ޝަހީދުކޮށްލި އެއް އާއިލާއެއް 112 މީހުން

އިސްރާއީލުގެ ނިރުބަވެރި ބާރުތަކުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގައި ޝަހީދުކޮށްލާފައިވާ އެއް އާއިލާއަކަށް ނިސްބަތްވާ 112 މީހެއްގެ ހަށިގަނޑު ވަޅުލުމަށް ބާއްވާ ބޮޑު ޖަނާޒާ މިއަދު ބޭއްވުމަށް ތައްޔާރުވެއްޖެއެވެ. މިއީ މި ޤަތުލްއާއްމު ފެށުނު ފަހުން ބޭއްވޭ އެންމެ ބޮޑު އެއް ޖަނާޒާއެވެ.

މި ހަށިގަނޑުތަކަކީ އިސްރާއީލުން ދިން ހަމަލާއެއްގައި އެއް އާއިލާއެއްގެ 308 މީހުން ޝަހީދުކޮށްލި ބޮޑު ގަތުލުއާއްމަށްފަހު، ފެނުނު މީހުންގެ ހަށިގަނޑުތަކެވެ.

ޣައްޒާގެ އެކި ސަރަހައްދުތަކުގައި އިސްރާއީލުން ދެމުންދާ ހަމަލާތަކުގައި ކުޑަކުދިންނާއި އާންމުން ދަނީ އަމާޒުކުރަމުންނެވެ.

އެގޮތުން ޣައްޒާ ސިޓީގެ ހުޅަނގުގައި ހުރި އަލް-ސަވާފިރު ސްކޫލުގައި ކިޔަވަން އިން ހަވަނަ ގްރޭޑްގެ ދަރިވަރު ޚާލިދު އަލް-އަޝްރަމްގެ ގަޔަށް އިސްރާއީލް ސިފައިން ބަޑިޖަހައި ވަނީ ޒަޚަމްކޮށްލާފައެވެ. އޭނާގެ ގަޔަށް ވަޒަން އަރާފައިވަނީ ޑެސްކު ކައިރީގައި ފަންސޫރު ހިފަހައްޓައިގެން ފިލާވަޅު ހަދަން އިންދައެވެ.

ފަލަސްތީނުގެ ތައުލީމީ ވުޒާރާއިން ވަނީ މިއީ ކުޑަކުދިންނަށާއި ތައުލީމީ މުއައްސަސާތަކަށް ދޭ ސީދާ ހަމަލާއެއްގެ ގޮތުގައި ސިފަކޮށް، މިކަން ހަރުކަށި އިބާރާތުން ކުށްވެރިކޮށްފައެވެ. އަދި ދަރިވަރުންނާއި ސްކޫލްތައް ހިމާޔަތްކުރުމަށް ބައިނަލްއަގުވާމީ މުޖުތަމައަށް ވަނީ ގޮވާލާފައެވެ.

މީގެ އިތުރުން ޚާން ޔޫނިސްގެ އަލް-މަވާސީ ސަރަހައްދުގައި ދިން ހަމަލާތަކުގައި ދެ ކުޑަކުދިންނާއި އިތުރު ބަޔަކު ޒަޚަމްވެފައިވާއިރު، ރަފަހްގެ ހުޅަނގު އުތުރު ސަރަހައްދަށް ޑްރޯން ބޭނުންކޮށްގެން ވަނީ ގޮވާތަކެތި އަޅާފައެވެ. 2025 އޮކްޓޯބަރު 11 ގައި ހަމަލާ ބަދަލުކުރުން ހުއްޓާލުމަށް އެއްބަސްވި ފަހުންވެސް 1,250 މީހުން ވަނީ ޝަހީދުވެފައެވެ.

2023 އޮކްޓޯބަރު 7 އިން ފެށިގެން މިހާތަނަށް ޖުމްލަ 73,375 މީހުން ޝަހީދުވެފައިވާ ކަމަށް ރަސްމީ ތަފާސްހިސާބުތަކުން ދައްކައެވެ.

ޣައްޒާގެ ސިއްހީ ދާއިރާވެސް ވަނީ ވަރަށް ބޮޑަށް ހީނަރުވެފައެވެ. ކެންސަރާއި ލޭގެ ބަލިތަކަށް ބޭނުންވާ ބޭހުގެ 61 އިންސައްތަ ހުސްވެފައިވާއިރު، ލެބޯޓްރީ ތަކަށް ބޭނުންވާ ތަކެތީގެ 85 އިންސައްތަ ވަނީ ހުސްވެފައެވެ.

ހުޅަނގު އައްސޭރީގައިވެސް އިސްރާއީލުން ދަނީ ގެދޮރު ސުންނާފަތިކޮށް، ފަލަސްތީނު މީހުން ހައްޔަރުކޮށް، ވަޒަންވެރިންގެ އައު އައުޓްޕޯސްޓްތައް ހަދަމުންނެވެ. 2023 އޮކްޓޯބަރުން ފެށިގެން ހުޅަނގު އައްސޭރިން އެކަނިވެސް 1,177 ފަލަސްތީނު މީހުން ވަނީ ޝަހީދުކޮށްލާފައެވެ. އޭގެ ތެރޭގައި 210 ކުޑަކުދިން ހިމެނެއެވެ.