އެމްޑީޕީ އެތެރޭގެ ހިލާފްތައް ހަމަޔަކަށް އެޅުވުމަށް ފައްޔާޒް އަދާކުރި ދައުރަށް ރައީސް ނަޝީދުގެ ތައުރީފް

އެމްޑީޕީ އެތެރޭގެ ހިލާފްތައް ހަމަޔަކަށް އެޅުވުމަށް އެޕާޓީގެ ކުރީގެ ޗެއާޕާސަން ފައްޔާޒް އަދާކުރެއްވި ދައުރަށް ކުރީގެ ރައީސް މުހައްމަދު ނަޝީދު ތައުރީފް ކުރައްވައިފިއެވެ.

ނިމިގެންދިޔަ އިންތިހާބަށްފަހު އިދިކޮޅު އެމްޑީޕީގެ ތެރޭގައި ހިލާފްތަކެއް އުފެދި، އެ ޕާޓީގެ ޗެއާޕާސަންގެ މަގާމުގައި ހުންނެވި ހަނިމާދޫ ދާއިރާގެ މެންބަރު އަބްދުލްގަފޫރު މޫސާ މަގާމުން ވަކިކުރުމުެގ މަސައްކަތްތަކެއް ވަނީ ފަށާފައެވެ. ގަޕޯ މަޤާމުން ވަކިކުރުމުގެ މަސައްކަތް ފެށީ، އިންތިހާބުގައި އެމްޑީޕީއަށް ލިބުނު ކާމިޔާބީ ފާހަގަކުރުމަށް ބޭއްވި ޖަލްސާގައި ރައީސް ނަޝީދަށް ވާހަކަދެއްކުމުގެ ފުރުސަތު ނުދިން މައްސަލާގައެވެ. އެ މައްސަލާގައި އެމްޑީޕީއަށް ނިސްބަތްވާ ބައެއް ފަރާތްތަކުން ވަނީ ޖަލްސާ ބޮއިކޮށްވެސް ކޮށްފައެވެ.

މިކަން މިހެންވެފައި ވަނިކޮށް އެމްޑީޕީން ހިންނަވަރުގައި ބޭއްވި ޖަލްސާގައި ވާހަކަދައްކަވަމުން ރައީސް އިބްރާހިމް މުހައްމަދު ސޯލިހް ވަނީ އެމްޑީޕީގެ ތެރޭގައި އުފެދުނު ހިޔާލްތަފާތުވުން ނިމުމަކަށް އައިސް އެންމެން އެއްގަލަކަށް އަރާފައިވާކަން ފާަހަގަކުރައްވާފައެވެ.

އެކްސްގައި ކުރެއްވި ޕޯސްޓެއްގައި މިއަދު ރައީސް ނަޝީދު ވިދާޅުވީ، އެމްޑީޕީގެ ތެރޭގައި އުފެދިގެންދިޔަ ހިޔާލް ތަފާތުވުންތައް ހަމަޖެއްސުމަށް ފައްޔާޒް އިސްމާއީލް ބުރަ މަސައްކަތްތަކެއް ކޮށްދެއްވިކަމަށެވެ. އަދި އެކަމަށް ޝުކުރު އަދާކުރައްވާކަމަށް ރައީސް ނަޝީދު ވަނީ ވިދާޅުވެފައެވެ.

ރައީސް ނަޝީދުގެ ޕޯސްޓްގައި ވަނީ ރައީސް ސޯލިހަށާއި، އެމްޑީޕީގެ ރައީސް ޢަބްދުﷲ ޝާހިދަށްވެސް މަރުހަބާ ވިދާޅުވެފައެވެ. އިންތިހާބުގައި އެމްޑީޕީއަށް ލިބުނު ކާމިޔާބީ ފާަހަގަކުރުމަށް ބޭއްވި ޖަލްސާގައި ރައީސް ނަޝީދަށް ފުރުސަތު ނުދިން މައްސަލާގައި ގަޕޯ މަޤާމުން ވަކިކުރުމަށް އެޕާޓީގެ ގައުމީ މަޖިލީހުގެ 55 މެންބަރުން ސޮއިކޮށް ވަނީ ޕެޓިޝަނެއް ހުށަހަޅާފައެވެ. މި މައްސަލާގައި އެމްޑީޕީގެ ގައުމީ މަޖިލީހުގެ ބައްދަލްވުމެއް ހޯމަ ދުވަހު ބާއްވަން ނިންމާ އެކަން ގައުމީ މަޖިލީހުގެ މެމްބަރުންނަށް ވަނީ އަންގާފައެވެ.

މިކަމާ ގުޅިގެން ގަޕޯ ވިދާޅުވެފައިވަނީ، އެމްޑީޕީގެ ޗެއާޕާސަންކަމުގެ މަޤާމުން އިސްތިއުފާ ނުދެއްވާނެ ކަމަށާއި، އިތުބާރު ނެތްކަމުގެ ވޯޓު ނެގުން ކުރިއަށް ގެންދަންވީކަމަށެވެ.

އެމްޑީޕީގެ އެތެރޭގެ ހިޔާލްތަފާތުވުންތައް ނައްތާލެވިއްޖެކަން ފާހަގަކުރައްވަމުން ހިންނަވަރުގައި ބޭއްވި ޖަލްސާގައި ރައީސް ސޯލިހް ވިދާޅުވެފައިވަނީ، އެމްޑީޕީން 2028 ވަނަ އަހަރުގެ ރިޔާސީ އިންތިހާބަށް ނިކުންނާނީ ޕާޓީގެ ލީޑަރޝިޕް އެކަތިގަނޑަކަށް ވެގެން ކަމަށެވެ.